وزبەكستاندا قىلمىس الەمنىڭ اۆتوريتەتتەرى ۇستالىپ جاتىر (ۆيدەو)

وزبەكستاندا قىلمىس الەمنىڭ اۆتوريتەتتەرى ۇستالىپ جاتىر.

ELTUZ-دىڭ حابارلاۋىنشا، ەلدىڭ ءار بۇرىشىندا جۇرگەن قىلمىس الەمىنىڭ بىرنەشە ليدەرى تۇتقىندالدى. ولاردىڭ اراسىندا 73 جاستاعى ساليمباي ابدۋللاەۆ پەن 52 جاستاعى باحتيەر كۋدراتۋللاەۆ تا بار. ءبىرىنشىسى كوپشىلىككە «ساليمباي» نەمەسە «ساليمبويۆاچچا» دەگەن اتپەن تانىمال بولسا، ەكىنشىسى «باحتي تاشكەنتسكي» دەگەن لاقاپ اتىمەن بەلگىلى اۆتوريتەت.

تاعى ءبىر اۆتوريتەتتى ۇستاۋ مۇمكىن بولمادى. اڭگىمە ازيا بوكس فەدەراتسياسىنىڭ بۇرىنعى پرەزيدەنتى، ازيا بوكس كونفەدەراتسياسىنىڭ پرەزيدەنتى «قارا گافۋر» دەگەن لاقاپ اتى بار گافۋر راحيموۆ تۋرالى بولىپ وتىر.

وزبەكستان پوليتسياسىنىڭ ارنايى جاساعى ونىڭ ۇيىنە بارعاندا ول ۇيىندە بولماعان. ودان كەيىن ارنايى جاساق كاسىپكەردىڭ ساياجايىنا بارعان. بۇل جەردەن دە تابىلماعان.

پوليتسيانىڭ حابارلاۋىنشا، ول بويتاسالاپ، وزبەكستانناننىڭ ءبىر جەرىندە جاسىرىنۋى مۇمكىن. باسقا دەرەككە قاراعاندا، راحيموۆ بىرىككەن اراب امىرلىكتەرىنىڭ دۋباي قالاسىنا قاشىپ كەتكەن. ال ساليمباي ابدۋللاەۆ پەن باحتيەر كۋدراتۋللاەۆ ءوز ۇيدەرىندە ۇستالعان. وزبەكستاننىڭ قۇقىق قورعاۋ ورگاندارىنىڭ ارنايى جاساعى ولاردى كوپتەگەن كۇزەتشى، نوكەرلەرىمەن قوسا اۆتوزاكقا وتىرعىزىپ، ىشكى ىستەر دەپارتامەنتىنە اكەتكەن. سول جەردە «ساليمباي» ءوزىن جايسىز سەزىنىپ، جەدەل جاردەم كولىگىن شاقىرتقان. الايدا جەدەل جاردەم پوليتسيا ۋچاستوگىنا جەتىپ كەلگەنىمەن ول ەشقايدا جىبەرىلمەگەن.

زاڭ بارىنە بىردەي. سولاي ەمەس پە؟ الدە ءبىز قاتەلەسەمىز بە؟، – دەدى قالالىق ىشكى ىستەر دەپارتامەنتىندەگى پوليتسەيلەر.

ساليمباي ابدۋللاەۆ – بۇرىنعى كەڭەس وداعى كەڭىستىگىندەگى بەلگىلى كاسىپكەر، مەتسەنات، فيلانتروپ. ول 1997 جىلدان بەرى وزبەكستاننىڭ سپورت كۇرەسى قاۋىمداستىعىن باسقارىپ كەلەدى. ال 2017 جىلى ول وزبەكستان وليمپيادا كوميتەتى توراعاسىنىڭ ورىنباسارى قىزمەتىنە سايلانعان. كەيبىر دەرەكتە ول قىلمىس الەمىنىڭ بەلسەندىسى بولىپ سانالادى. وسىدان بىرنەشە جىل بۇرىن اقش-تىڭ وزبەكستانداعى ەلشىسى كاسىپكەردى «وزبەك مافياسىنىڭ بەلدى وكىلى» دەپ اتاعان.

«باحتي تاشكەنتسكي» بولسا، جاقىندارىنىڭ بىرىمەن حابارلاسىپ، ءبىر-ەكى جىل «ۇيدە» بولاتىنىن ايتىپتى. ونىڭ «ءۇي» دەگەنى تۇرمە بولىپ تۇر. قىلمىس الەمىندە تۇرمەنى «ءۇي» دەپ ايتادى.

«ۇيدە» ءبىراز ءتارتىپ ورناتۋ كەرەك ەكەن. «ۇيگە» دە بارماعانىمىزعا كوپ بولىپتى عوي، – دەگەن ەكەن ول سەرىگىنىڭ بىرىنە.

«قارا گافۋرعا» كەلسەك، ول اۋەلى قازاقستانعا بارىپ، ودان كەيىن شىمكەنتتەن دۋبايعا جەكە ۇشاعىمەن ۇشىپ كەتكەن كورىنەدى. ونى دۋبايدا ءوز كوزىمەن كورگەن ادامدار بار ەكەن.

جالپى، پوليتسيانىڭ ارنايى وپەراتسياسى كەزىندە 200-گە جۋىق اۆتوريتەت قولعا تۇسكەن. ولاردىڭ ءبارى تاشكەنتتە ۇستالعان. ونىڭ ىشىندە سايدازيز سايداليەۆ («سايدازيز مەدگورودوك»)، باحودير سۋلتانوۆ («بوحو-زاۆحوز»، «زيكي ەسكي شاحار»)، ابباس حادجاەۆ («كونتورسكي»)، جاحونگير بادالوۆ («سنوبس»)، ەدەم وسانوۆ («ازيز چۋچۆارا»)، ديلشود شاريپوۆ، انۆار ميرزاحانوۆ، «شۋكۋر يانگيبازارسكي»، «اۆاز كوراكاميش» دەگەن تانىمال اۆتوريتەتتەر دە بار.

داستان كەنجالين،

استانا