جانىبەك ءالىمحان ۇلى وزىنە بەرىلگەن كولىكتى مەنەدجەرىنە سىيلادى (ۆيدەو)

الماتىدا وتكەن كاسىپقوي بوكس كەشىندە WBO جانە IBF تۇجىرىمى بويىنشا ەكى چەمپيوندىق بەلبەۋدىڭ يەگەرى جانىبەك ءالىمحان ۇلى كاسىپكەر، مەتسەنات، الماتى قالاسى ءماسليحاتىنىڭ دەپۋتاتى، TAS Group كومپانيالار توبىنىڭ جەتەكشىسى دۋلات تاستەكەەۆتىڭ وزىنە سىيلاعان كولىگىن مەنەدجەرى بەرىك سۇلتانعا تارتۋ ەتتى.

مەتسەنات بوكسشىنى شارشى الاڭعا شاقىرىپ، جۇرتتىڭ كوزىنشە وعان  Zeekr 001 اۆتوكولىگىنىڭ كىلتىن بەرگەن ەدى. جانىبەك ءالىمحان ۇلى بولسا بۇل سىيلىقتى ءوز قولىمەن العانىمەن كاسىپكەردەن رۇقسات سۇراپ، كولىكتىڭ كىلتىن وزىمەن بىرگە ەگىزدىڭ سىڭارىنداي بولىپ جۇرگەن مەنەدجەرى بەرىك سۇلتانعا سىيلايتىنىن ايتتى.

بارشاڭىزدى كورگەنىمە قۋانىشتىمىن. سىزدەردىڭ قولداۋلارىڭىزدى مۇحيتتىڭ ارعى جاعىنان سەزىنەمىز. سىزدەرگە كوپ راحمەت!  دۋلات اعا، سىيلىعىڭىزعا كوپ راحمەت! مەن وسى ءساتتى پايدالانا وتىرىپ ءوزىمنىڭ ىنىلىگىمدى، قازاقىلىعىمدى جاساعىم كەلىپ وتىر. ءبىز Qazaq style-دى الەم تاريحىندا قالدىرامىز. سول تاريحتى مەنىمەن بىرگە جاساپ جۇرگەن بەرىك سۇلتان اعاما وسى كولىكتى سىيلاعىم كەلەدى. ول — مەنىڭ اعام، مەنەدجەرىم. بۇل كىسى بولماسا ءبىزدىڭ Qazaq style تاريحى باياۋ جازىلۋشى ەدى. سوندىقتان وسى كىسىگە راحمەت! ال مىنا تەمىر تۇلپار وزىڭىزدىكى، – دەدى بوكسشى مەنەدجەرىنە.

ودان ءارى ول كوپشىلىككە Qazaq style ۇعىمىنىڭ ءمانى مەن ماعىناسىن ايتىپ بەردى.

Qazaq style دەگەن تەك ۇرۋ مەن قۇلاتۋ عانا ەمەس. دۇرىس اعا بولۋ، دۇرىس ءىنى بولۋ دا قازاقتىڭ ءستيلى. باۋىرمالدىقتى، سىيلاستىق پەن قۇرمەتتى ناسيحاتتاۋ دا قازاقتىڭ ءستيلى. قازاقشا، ءداستۇرلى ۇستانىمدارمەن ءومىر ءسۇرۋ دە قازاقتىڭ ءستيلى!، – دەدى جانىبەك ءالىمحان ۇلى.

وسىدان كەيىن ءسوز العان بەرىك سۇلتان بوكسشىنىڭ الداعى جەكپە-جەكتەرىن ايتتى.

الدىمىزدى چارلو باور، كانەلو بار. سولاردى قۇلاتۋدى ءناسىپ ەتسىن، — دەدى ول.

الماتىدا كەشەگى بوكس كەشىنىڭ باستى جەكپە-جەگىندە جانقوش تۇراروۆ جاپوندىق قارسىلاسى اكيحيرو كوندونى ايقىن باسىمدىقپەن ۇتتى.

داستان كەنجالين،

استانا

 

View this post on Instagram

 

A post shared by TEAM JANIBEK | QAZAQ STYLE (@janibek_qazaqstyle)