Jánibek Álimhanuly ózine berilgen kólikti menedjerine syılady (VIDEO)

Almatyda ótken kásipqoı boks keshinde WBO jáne IBF tujyrymy boıynsha eki chempıondyq belbeýdiń ıegeri Jánibek Álimhanuly kásipker, meenat, Almaty qalasy máslıhatynyń depýtaty, TAS Group kompanııalar tobynyń jetekshisi Dýlat Tastekeevtiń ózine syılaǵan kóligin menedjeri Berik Sultanǵa tartý etti.

Meenat boksshyny sharshy alańǵa shaqyryp, jurttyń kózinshe oǵan  Zeekr 001 avtokóliginiń kiltin bergen edi. Jánibek Álimhanuly bolsa bul syılyqty óz qolymen alǵanymen kásipkerden ruqsat surap, kóliktiń kiltin ózimen birge egizdiń syńaryndaı bolyp júrgen menedjeri Berik Sultanǵa syılaıtynyn aıtty.

Barshańyzdy kórgenime qýanyshtymyn. Sizderdiń qoldaýlaryńyzdy muhıttyń arǵy jaǵynan sezinemiz. Sizderge kóp rahmet!  Dýlat aǵa, syılyǵyńyzǵa kóp rahmet! Men osy sátti paıdalana otyryp ózimniń iniligimdi, qazaqylyǵymdy jasaǵym kelip otyr. Biz Qazaq style-dy álem tarıhynda qaldyramyz. Sol tarıhty menimen birge jasap júrgen Berik Sultan aǵama osy kólikti syılaǵym keledi. Ol — meniń aǵam, menedjerim. Bul kisi bolmasa bizdiń Qazaq style tarıhy baıaý jazylýshy edi. Sondyqtan osy kisige rahmet! Al myna temir tulpar ózińizdiki, – dedi boksshy menedjerine.

Odan ári ol kópshilikke Qazaq style uǵymynyń máni men maǵynasyn aıtyp berdi.

Qazaq style degen tek urý men qulatý ǵana emes. Durys aǵa bolý, durys ini bolý da qazaqtyń stıli. Baýyrmaldyqty, syılastyq pen qurmetti nasıhattaý da qazaqtyń stıli. Qazaqsha, dástúrli ustanymdarmen ómir súrý de qazaqtyń stıli!, – dedi Jánibek Álimhanuly.

Osydan keıin sóz alǵan Berik Sultan boksshynyń aldaǵy jekpe-jekterin aıtty.

Aldymyzdy Charlo baor, Kanelo bar. Solardy qulatýdy násip etsin, — dedi ol.

Almatyda keshegi boks keshiniń basty jekpe-jeginde Janqosh Turarov japondyq qarsylasy Akıhıro Kondony aıqyn basymdyqpen utty.

Dastan KENJALIN,

ASTANA

 

View this post on Instagram

 

A post shared by TEAM JANIBEK | QAZAQ STYLE (@janibek_qazaqstyle)