SportPress.kz قازاقستان سپورت جاڭالىقتارى
بۇگىن اقش-تىڭ لاس-ۆەگاس قالاسىندا UFC 296 ءتۋرنيرى بولدى. وندا ارالاس جەكپە-جەك شەبەرى شاۆكات راحمونوۆ مما-دا ون سەگىزىنشى كاسىپقوي جەكپە-جەگىن وتكىزىپ، ال UFC-دە التىنشى رەت وكتاگونعا شىعىپ، جەڭىسكە جەتتى.
قازاقستان فايتەرى ەكىنشى راۋندتا امەريكالىق ستيۆەن تومپسوندى قىلقىندىرۋ ادىسىمەن جەڭدى. امەريكالىق جەكپە-جەك شەبەرى قازاق فايتەرىنىڭ ادىسىنە ءتۇسىپ قالىپ، تۇنشىعىپ قالا جازدادى. راحمونوۆ ونى قىلقىندىرىپ جاتقاندا تومپسون قولىمەن جەڭىلگەنىن مويىنداپ، بەلگى بەردى. وسىلايشا، قازاق جەكپە-جەك شەبەرى ءالى بىردە-ءبىر رەت جەڭىلمەي كەلەدى. ستيۆەن تومپسون بولسا، كاسىپقوي مما مانسابىندا جەتىنشى رەت جەڭىلدى.
وسى ايقاسقا دەيىن شاۆكات راحمونوۆ جارتىلاي ورتا سالماق دارەجەسىندە بەسىنشى ورىندا بولسا، ستيۆەن تومپسون التىنشى ورىندا تۇرعان ەدى. ال كەشتىڭ باستى جەكپە-جەگىندە جارتىلاي ورتا سالماقتاعى UFC چەمپيونى لەون ەدۆاردس پەن كولبي كوۆينگتون جۇدىرىقتاستى.
بۇگىن تاڭ ازانىمەن اقش-تان جەتكەن اقجولتاي حابار بۇكىل قازاق ەلىن قۋانتتى. تۋريزم جانە سپورت ءمينيسترى ەرمەك مارجىقپاەۆ تا اتاقتى سپورتشىنى قۇتتىقتاپ، الداعى تۋرنيرلەردە دە ءساتتى ونەر كورسەتۋىن تىلەدى.
ەگەمەندىك كۇنىندە ەل تۇرعىندارىن قۋانىشقا بولەگەن داڭقتى سپورتشىمىزدى جەڭىسىمەن شىن جۇرەكتەن قۇتتىقتايمىن!، — دەدى ول.
40 جاستاعى امەريكالىق سپورتشى ستيۆەن تومپسون بۇگىنگە دەيىن ءوزىنىڭ سپورتتىق مانسابىندا 24 رەت وكتاگونعا شىعىپ، 17 مارتە جەڭىس تويىن تويلاعان. ال شاۆقات راحمونوۆتىڭ ءجۇرىپ وتكەن جولى جانكۇيەرلەردىڭ كوز الدىندا. 29 جاستاعى وتانداسىمىز 2014 جىلدان بەرى ارالاس جەكپە-جەكپەن اينالىسىپ كەلەدى. وسى ۋاقىت ارالىعىندا 17 رەت ايقاس الاڭىنا شىعىپ، بارلىق جەكپە-جەكتى ايقىن باسىمدىقپەن جەڭدى. 8 قارسىلاسىن مەرزىمىنەن بۇرىن تىزە بۇكتىردى. بۇل – راحمونوۆتىڭ 18-جەڭىسى.
داستان كەنجالين،
استانا
View this post on Instagram
