Shavkat Rahmonov UFC-de altynshy ret jeńiske jetti (VIDEO)

Búgin AQSh-tyń Las-Vegas qalasynda UFC 296 týrnıri boldy. Onda aralas jekpe-jek sheberi Shavkat Rahmonov MMA-da on segizinshi kásipqoı jekpe-jegin ótkizip, al UFC-de altynshy ret oktagonǵa shyǵyp, jeńiske jetti.

Qazaqstan faıteri ekinshi raýndta amerıkalyq Stıven Tompsondy qylqyndyrý ádisimen jeńdi. Amerıkalyq jekpe-jek sheberi qazaq faıteriniń ádisine túsip qalyp, tunshyǵyp qala jazdady. Rahmonov ony qylqyndyryp jatqanda Tompson qolymen jeńilgenin moıyndap, belgi berdi. Osylaısha, qazaq jekpe-jek sheberi áli birde-bir ret jeńilmeı keledi. Stıven Tompson bolsa, kásipqoı MMA mansabynda jetinshi ret jeńildi.

Osy aıqasqa deıin Shavkat Rahmonov jartylaı orta salmaq dárejesinde besinshi orynda bolsa,  Stıven Tompson altynshy orynda turǵan edi. Al keshtiń basty jekpe-jeginde jartylaı orta salmaqtaǵy UFC chempıony Leon Edvards pen Kolbı Kovıngton judyryqtasty.

Búgin tań azanymen AQSh-tan jetken aqjoltaı habar búkil qazaq elin qýantty. Týrızm jáne sport mınıstri Ermek Marjyqpaev ta ataqty sportshyny quttyqtap, aldaǵy týrnırlerde de sátti óner kórsetýin tiledi.

Egemendik kúninde el turǵyndaryn qýanyshqa bólegen dańqty sportshymyzdy jeńisimen shyn júrekten quttyqtaımyn!, — dedi ol.

40 jastaǵy amerıkalyq sportshy Stıven Tompson búginge deıin óziniń sporttyq mansabynda 24 ret oktagonǵa shyǵyp, 17 márte jeńis toıyn toılaǵan. Al Shavqat Rahmonovtyń júrip ótken joly jankúıerlerdiń kóz aldynda. 29 jastaǵy otandasymyz 2014 jyldan beri aralas jekpe-jekpen aınalysyp keledi. Osy ýaqyt aralyǵynda 17 ret aıqas alańyna shyǵyp, barlyq jekpe-jekti aıqyn basymdyqpen jeńdi. 8 qarsylasyn merziminen buryn tize búktirdi. Bul – Rahmonovtyń 18-jeńisi.

Dastan KENJALIN,

ASTANA

 

View this post on Instagram

 

A post shared by UFC (@ufc)