بيىل سپورتشىلار بەس ۇلكەن جارىسقا قاتىسادى

بيىلعى جارىستاردى IV قىسقى جاسوسپىرىمدەر وليمپياداسى باستاپ بەرەدى. بۇل جارىس 19 قاڭتار مەن 1 اقپان ارالىعىندا وڭتۇستىك كورەيانىڭ كانۆوندو قالاسىندا بولادى. قازاقستان سپورتشىلارى دا قاتىسادى، دەپ حابارلادى تۋرزيم جانە سپورت مينيسترلىگى.

قازىرگى ۋاقىتتا ەل قۇراماسىندا 10 ديستسيپلينا بويىنشا سپورتتىڭ بەس تۇرىنەن 30 ليتسەنزيا بار. 42 سپورتشى جولداما الدى.

بيىلعى جىلدىڭ باستى جارىسى – پاريج قالاسىندا الاۋى تۇتاناتىن جازعى وليمپيالىق ويىندار دەپ ايتۋعا بولادى. بۇل دودا 26 شىلدە مەن 11 تامىز ارالىعىندا وتەدى. وعان الەمنىڭ 205 ەلىنەن كەلگەن 10 مىڭنان استام سپورتشى قاتىسىپ، كۇش سىناسادى.

ءتورت جىلدىقتىڭ جارىسىندا سپورتتىڭ 32 تۇرىنەن 329 مەدال جيىنتىعى ساراپقا سالىنادى. قازاقستان ۇلتتىق قۇراماسى سپورتتىڭ 20 تۇرىنەن قاتىسۋدى جوسپارلاپ وتىر. بۇگىنگى تاڭدا وتانداستارىمىزدا سپورتتىڭ 8 ءتۇرى بويىنشا (ساداق اتۋ، ۆەلوشوسسە، وق اتۋ، قازىرگى بەسسايىس، گرەك-ريم كۇرەسى، ەركىن كۇرەس، سپورتتىق گيمناستيكا جانە بوكس) 17 ليتسەنزيا بار. الدا 90-عا جۋىق ليتسەنزيالىق جارىس كۇتىپ تۇر. سوندىقتان جولدامالار سانىن ءالى دە كوبەيتۋ مۇمكىندىگى بار.

8-14 قىركۇيەك ارالىعىندا ەلىمىز ءۇشىن ءمانى مەن ماڭىزى جاعىنان الىپ قاراعاندا، تاعى ءبىر ۇلكەن جارىس بولادى. ول — V دۇنيەجۇزىلىك كوشپەندىلەر ويىندارى. بۇل باسەكە استانادا بولادى، وعان  الەمنىڭ 100-دەن استام ەلىنەن دەلەگاتسيالار كەلەدى دەپ جوسپارلانىپ وتىر.

ويىنداردىڭ ءبىر ەرەكشەلىگى، مۇندا سپورتتىق، مادەني جانە عىلىمي باعدارلامالار بىرىگىپ وتكىزىلەدى.  باعدارلاماعا 20 جارىستىق جانە 10 كورنەكى سپورت ءتۇرى كىرىپ، 110 مەدال جيىنتىعى ويناتىلادى.

جارىس ات سپورتى، ۇلتتىق كۇرەس، ساداق اتۋ، قۇستارمەن اڭ اۋلاۋدىڭ تۇرلەرى، ءداستۇرلى زياتكەرلىك ويىندار بويىنشا وتەدى. قازىرگى ۋاقىتتا ۇلتتىق قۇراما دايىندىقتى باستادى. كوماندالار قۇرامى جاساقتالىپ جاتىر. وقۋ-جاتتىعۋ شارالارى وتكىزىلۋدە.

بيىل استانادا ايەلدەر اراسىنداعى بوكستان الەم چەمپيوناتى وتەدى. بۇل تۋرالى تاشكەنتتە وتكەن حالىقارالىق بوكس قاۋىمداستىعىنىڭ (IBA) رەسمي وتىرىسىندا حابارلاندى. IBA پرەزيدەنتىنىڭ ايتۋىنشا، ءتۋرنيردىڭ جالپى جۇلدە قورى 4،8 ملن اقش دوللارى بولادى. الەم چەمپيونى اتانعان بوكسشى 200 مىڭ اقش دوللارىن الادى.

سونداي-اق 2024 جىلدىڭ قاراشاسىنا استانا قالاسىندا سامبودان الەم چەمپيوناتى جوسپارلانعان. بىلتىر كۇزدە ەرەۆاندا وتكەن سامبودان 48-ءشى الەم چەمپيوناتىنا 65 ەل قاتىسىپ، جالپى ەسەپتە قازاقستان قۇراماسى 1 التىن، 2 كۇمىس جانە 5 قولامەن ءۇشىنشى ورىنعا تابان تىرەدى.