اقمولا وبلىسىنىڭ اكىمى مارات احمەتجانوۆقا اشىق حات

ءبىر توپ سپورت جاناشىرىنىڭ اقمولا وبلىسىنىڭ اكىمى مارات احمەتجانوۆقا اشىق حاتى جاريالاندى. حاتتا سپورت ارداگەرلەرى مەن قايراتكەرلەرى، جۋرناليستەرى وبلىس باسشىسىنان سپورتتىڭ بارلىق ءتۇرىنىڭ ءتيىستى دەڭگەيدە دامىماي جاتقانىن، سوڭعى ون بەس جىل بەدەرىندە اقمولا وڭىرىنەن ءبىر عانا الەم چەمپيونىنىن شىققانىن ايتا كەلىپ،  ايماقتاعى سپورتتى دامىتۋدى قولعا الۋدى سۇرايدى.

تومەندە وقىرمان نازارىنا اشىق حات تولىعىمەن ۇسىنىلىپ وتىر.

اقمولا وبلىسىنىڭ

اكىمى مارات احمەتجانوۆقا

اشىق حات

قادىرلى مارات مۇرات ۇلى! اقمولا وبلىسىنىڭ الەۋمەتتىك-ەكونوميكالىق جاعدايى رەسپۋبليكا بويىنشا وڭىرلەردىڭ الدىڭعى قاتارىنان كورىنىپ كەلە جاتقانىن بىلەمىز. بىراق ءبىز بۇگىن سىزگە اقمولا وبلىسىنىڭ ءبىر توپ ازاماتتارى اتىنان ءوڭىر سپورتىنا قاتىستى حات جازۋدى ءجون سانادىق. سەبەبى، قازاق ەلىنىڭ كىندىگىندە ورنالاسقان، 788 مىڭنان اسا تۇرعىنى بار وبلىستىڭ سپورت سالاسى سىن كوتەرمەيتىن جاعدايعا جەتتى. بۇل سوزىمىزگە دالەل جەتكىلىكتى.

1. 2023 جىلدىڭ كۇزىندە وتكەن جازعى ازيا ويىندارىندا اقمولا وبلىسىنىڭ سپورتشىلارى 1 كۇمىس، 1 قولا مەدال عانا ەنشىلەدى. ازيا قۇرلىعىنىڭ باستى ويىندارىنا اقمولالىق 14 سپورتشى عانا قاتىستى. قازاقستاننىڭ بوكس (ەرلەر)، دزيۋدو (ەرلەر)، ەركىن كۇرەس، تاەكۆوندو، جەڭىل اتلەتيكا، ءجۇزۋ، سپورتتىق گيمناستيكا، كوركەم گيمناستيكا، تاس جولداعى ۆەلوجارىس، كاراتە، ت.ب. كوماندالارىندا اقمولا وبلىسىنىڭ سپورتشىلارى بولعان جوق.
2. كەيىنگى 20 جىل كولەمىندە جاستار كوپ شۇعىلداناتىن گرەك-ريم كۇرەسى، ەركىن كۇرەس جانە دزيۋدودان الەمدىك دەڭگەيدە ءبىر بالۋان دايىندالعان جوق. دەرەكتەرگە سۇيەنسەك، وبلىستا ەركىن كۇرەستەن – 77، گرەك-ريم كۇرەسىنەن – 28، دزيۋدودان – 30 جاتتىقتىرۋشى جۇمىس ىستەيدى. وسىنشا مامان 20 جىلدا داۋلەت تۇرلىقانوۆ پەن ەلدوس سمەتوۆتىڭ دارەجەسىندە ءبىر بالۋان باپتاي الماسا، بۇعان كىم كىنالى؟!
3. ونى ايتاسىز، كەيىنگى 5-6 جىلدا وسى سپورت تۇرلەرىنەن ەرەسەكتەر اراسىنداعى قازاقستان چەمپيوندارى وتە از. بۇل دەگەنىڭىز وبلىستىق سپورت باسقارماسىنىڭ ءوز قاراماعىنداعى جاتتىقتىرۋشىلاردىڭ جۇمىسىنا نەمقۇرايدى قاراۋىنىڭ سالدارى. جاتتىقتىرۋشىلاردىڭ جۇمىستارىن قاداعالاماسا، ولار جۇيەلى جوسپارمەن جۇمىس ىستەمەسە، ناتيجە قايدان بولسىن؟
4. 1980-1990 جىلدارى اقمولا وبلىسىنىڭ تۋمالارى – اۋىر اتلەتشى اناتولي حراپاتىي، شاڭعىشىلار ۆلاديمير سميرنوۆ پەن ۆلاديمير ساحنوۆ وليمپيادا ويىندارى مەن الەم چەمپيوناتتارىندا ولجا سالدى. ال كەيىنگى 15 جىلدا اقمولا وبلىسىنان بوكسشى تەمىرتاس ءجۇسىپوۆ قانا الەم چەمپيونى اتاندى. قالعان وليمپيالىق سپورت تۇرلەرىنەن دۇنيەجۇزىلىك دەڭگەيدە ماڭدايى جارقىراعان سپورتشىمىز ەسكە تۇسپەي تۇر. اقيقاتىن ايتساق، ءبىزدىڭ ولكەمىزدە دارىندى بالالار وتە كوپ. سولاردى وليمپ شىڭىنا ءوزىمىز جەتكىزە الماي ءجۇرمىز.
5. ستەپنوگور قالاسىنداعى بوگەنباي باتىر اتىنداعى سپورت ينتەرناتىنىڭ جۇمىسى ءتىپتى ناشارلاپ كەتتى. ءبىر كەزدەرى بۇل ينتەرناتتان وليمپيادا جۇلدەگەرلەرى مەن ازيا چەمپيوندارى ماريا گرابوۆەتسكايا مەن اننا نۇرمۇحامبەتوۆا شىعىپ ەدى. كەيىنگى جىلدارى بۇل ينتەرناتتان اۋىر اتلەتيكادان عانا ەمەس، سپورتتىڭ باسقا تۇرلەرىنەن دە الەمدىك دەڭگەيدە سپورتشى شىقپايتىن بولدى. توق ەتەرى، بوگەنباي باتىر اتىنداعى سپورت ينتەرنات-كوللەدجى سپورتتىق كورسەتكىشتەر بويىنشا رەسپۋبليكا بويىنشا كوش سوڭىندا تۇر. پرەمەر-ليگاداعى «وقجەتپەس» كومانداسىنىڭ دا جاعدايى جىل سايىن قالت-قۇلت ەتەتىن كۇيدە.
6. اقمولا وبلىستىق سپورت باسقارماسىنا قارايتىن وليمپيادالىق ءىزباسارلار ورتالىعىنىڭ جۇمىسى دا تومەن دارەجەدە. بۇل ورتالىق وبلىستاعى دارىندى جاستاردى شوعىرلاندىرىپ، ۇلتتىق قۇراماعا سپورتشىلار دايىنداۋعا ءتيىس. بىراق ورتالىق ەرەجەسىنە ساي ءار سپورت تۇرىنەن جەتكىلىكتى دارەجەدە كوماندا جاساقتاي الماي وتىر. سونىڭ سالدارىنان وبلىستىڭ جاستار قۇرامالارى ءالسىز.
7. 2023 جىلعى قازاقستان سپارتاكياداسىندا اقمولا وبلىسىنىڭ سپورتشىلارى اۋتسايدەرلەر قاتارىندا قالدى. وبلىس سپورتشىلارىنىڭ جازعى سپورت تۇرلەرىنەن رەسپۋبليكا قۇرامالارىنداعى ۇلەسى 2-3 پايىزدان اسپايدى.

قادىرلى مارات مۇرات ۇلى! ءبىز وبلىس سپورتىنداعى پروبلەمالاردىڭ شەت جاعاسىن عانا جازىپ وتىرمىز. بۇل سالادا شەشۋىن كۇتكەن وزەكتى ماسەلەلەر وتە كوپ. سوندىقتان اقمولا وبلىسىنىڭ سپورتىنا تۇپكىلىكتى رەفورما قاجەت. ال رەفورمانى جۇزەگە اسىرۋعا ەلگە جانى اشيتىن، بىلىكتى ءارى ىسكەر ماماندار قاجەت. وبلىستىڭ قازىرگى سپورت باسشىلارى بۇل پروبلەمانى شەشە المايدى.

بىزدەر، وسى ءوڭىردىڭ تۇرعىلىقتى ازاماتتارى، اقمولا وبلىسىنىڭ سپورتىن باسقارۋعا وسى ولكەنىڭ ءتولتۋما جىگىتتەرىن تاعايىنداۋىڭىزدى ءوتىنىپ سۇرايمىز. سەبەبى، وسى وڭىردە تۋعان جىگىتتەردىڭ كىندىك قانى تامعان جەرىنە، جەرلەستەرىنە دەگەن كوڭىلى، پەيىلى ەرەكشە بولادى. ولار «مەنىڭ تۋعان ولكەمنىڭ سپورتى جامبىل، شىمكەنت وڭىرلەرىنەن نەسى كەم؟!» دەپ نامىسقا باسادى. جەرلەستەرىنەن، اعايىندارىنان ۇيالىپ جۇمىسقا ەرەكشە ىنتامەن كىرىسەدى. ءبىز رۋعا، ەلگە بولىنەتىن جاندار ەمەسپىز. ءبىزدىڭ دوستارىمىز، جاقىندارىمىز قازاق ەلىنىڭ بارلىق قيىرىندا بار. بىراق ءار ازاماتقا ءوزىنىڭ تۋعان توپىراعى ىستىق، ءارى ولار وزدەرى ارالاس-قۇرالاس وسكەن جەرگىلىكتى حالىقتىڭ مەنتاليتەتىن جاقسى بىلەدى. جەرگىلىكتى حالىق تا ءوز اراسىنان شىققان جىگىتتەرگە سەنىممەن قارايدى. سونى ەسكەرە كەلە، اقمولا وبلىسىنىڭ سپورتىن العا سۇيرەۋگە قابىلەتى جەتەتىن، اۋداندىق، قالالىق، وبلىستىق، رەسپۋبليكالىق سپورت سالاسىنىڭ جۇمىسىندا ىسىلىپ، مول تاجىريبە جيناقتاعان قانات جۇرقاەۆ، ازامات يماشەۆ، نۇرجان كارىمجانوۆ سەكىلدى جىگىتتەردىڭ بار ەكەنىن ايتقىمىز كەلەدى.

بۇل پروبلەما – كوپ جىلدان بەرى كوپتەگەن ادامداردىڭ كوكەيىندە جۇرگەن ماسەلە. ءسىزدىڭ ەل باسقارۋ ىسىندەگى مول تاجىريبەڭىزدى، كوپتىڭ اراسىنداعى ابىروي-بەدەلىڭىزدى، ەلگە جاناشىرلىعىڭىز بەن ىسكەرلىگىڭىزدى بىلگەننەن كەيىن وسى ءوتىنىشتى ايتىپ وتىرمىز. دانا حالقىمىز «حالىق قالاسا، حان تۇيەسىن سويادى» دەگەن. ءسىزدىڭ ەل ازاماتتارىنىڭ تىلەگىن جەرگە تاستامايتىنىڭىزعا سەنىم بىلدىرەمىز. ال جوعارىداعى جىگىتتەردىڭ جاۋاپكەرشىلىگى ءبىزدىڭ موينىمىزدا. بۇل ءسوزىمىزدى پارمەن ەمەس، كاسىبي تۇرعىدان كەڭەس دەپ قابىلداعانىڭىزدى قالايمىز.

زور قۇرمەتپەن، اقمولا وبلىسىنىڭ سپورت قايراتكەرلەرى:

1. قوجابەكوۆ عالىم — جۋرناليست، قازاقستان جۋرناليستەر اكادەمياسىنىڭ اكادەميگى، «قۇرمەت» وردەنىنىڭ يەگەرى، اۋعانستان سوعىسىنىڭ ارداگەرى;
2. قامەنوۆ فايزوللا – قر ەڭبەك سىڭىرگەن جاتتىقتىرۋشىسى، قويان-قولتىق ۇرىسىنان سپورت شەبەرى;
3. سۇلەيمەنوۆ وسپان – قازاقستاننىڭ ەڭبەك سىڭىرگەن ۇستازى، اقىن، كومپوزيتور، سپورت ارداگەرى;
4. بەكسەيىتوۆ ەركىن – بوكستان كسرو سپورت شەبەرى، سپورت ارداگەرى;
5. نازاروۆ اعزام – قر ەڭبەك سىڭىرگەن جاتتىقتىرۋشىسى، سامبو كۇرەسىنەن سپورت شەبەرى;
6. ماساباەۆ بەيبىت – بوكستان قر ەڭبەك سىڭىرگەن جاتتىقتىرۋشىسى;
7. تۇياماشەۆ ازامات – بوكستان قر ەڭبەك سىڭىرگەن جاتتىقتىرۋشىسى، رەسپۋبليكانىڭ جاستار قۇراما كومانداسىنىڭ باس باپكەرى;
8. تاحانوۆ مارات – حالىقارالىق دارەجەدەگى سپورت شەبەرى، جوعارى ساناتتى جاتتىقتىرۋشى، قورعالجىن اۋدانى بويىنشا دزيۋدو باپكەرى;
9. ءجاندىلدين ءابىشان – سپورت ارداگەرى، تسەلينوگراد اۋدانىنىڭ تۇرعىنى;
10. تەمىرباەۆ اباي – سپورت ارداگەرى، 2003–2012 جىلدارى بوگەنباي باتىر اتىنداعى وبلىستىق سپورت ينتەرناتىنىڭ باسشىسى بولعان;
11. بوكەەۆ قازبەك – «ەرەيمەن» سپورت كلۋبىنىڭ پرەزيدەنتى;
12. يگناتوۆ ۆلاديمير – سپورت ارداگەرى;
13. ەسەمبەكوۆ قاجىمۇرات – سپورت ارداگەرى;
14. احانوۆ داۋرەن – سپورت ارداگەرى;
15. تۇياماشەۆ بەرىك – قر سپورت قايراتكەرى;
16. توقاباەۆ ەرعالي – كوكپار جانە ات سپورتىنىڭ شەبەرى، اقمولا وبلىسىنىڭ كوكپار قۇراماسىنىڭ باپكەرى;
17. حاسەنوۆ امانجول – قر ەڭبەك سىڭىرگەن جاتتىقتىرۋشىسى، ۇلتتىق جانە ات سپورتى تۇرلەرى ورتالىعىنىڭ ديرەكتورى;
18. سۇلەيمەنوۆ ءىلياس – بوكستان حالىقارالىق دارەجەدەگى سپورت شەبەرى، ازيا ويىندارىنىڭ جەڭىمپازى;
19. ابۋتاليپوۆ قانات – قازاقستاننىڭ ەڭبەك سىڭىرگەن سپورت شەبەرى، WSB ۆەرسياسى بويىنشا الەم چەمپيونى;
20. ارداق توعىموۆ – سپورت ءجۋرناليسى-ساراپشىسى.