Aqmola oblysynyń ákimi Marat Ahmetjanovqa AShYQ HAT

Bir top sport janashyrynyń Aqmola oblysynyń ákimi Marat Ahmetjanovqa ashyq haty jarııalandy. Hatta sport ardagerleri men qaıratkerleri, jýrnalısteri oblys basshysynan sporttyń barlyq túriniń tıisti deńgeıde damymaı jatqanyn, sońǵy on bes jyl bederinde Aqmola óńirinen bir ǵana álem chempıonynyn shyqqanyn aıta kelip,  aımaqtaǵy sportty damytýdy qolǵa alýdy suraıdy.

Tómende oqyrman nazaryna ashyq hat tolyǵymen usynylyp otyr.

Aqmola oblysynyń

ákimi Marat Ahmetjanovqa

AShYQ HAT

Qadirli Marat Muratuly! Aqmola oblysynyń áleýmettik-ekonomıkalyq jaǵdaıy respýblıka boıynsha óńirlerdiń aldyńǵy qatarynan kórinip kele jatqanyn bilemiz. Biraq biz búgin Sizge Aqmola oblysynyń bir top azamattary atynan óńir sportyna qatysty hat jazýdy jón sanadyq. Sebebi, Qazaq eliniń kindiginde ornalasqan, 788 myńnan asa turǵyny bar oblystyń sport salasy syn kótermeıtin jaǵdaıǵa jetti. Bul sózimizge dálel jetkilikti.

1. 2023 jyldyń kúzinde ótken jazǵy Azııa oıyndarynda Aqmola oblysynyń sportshylary 1 kúmis, 1 qola medal ǵana enshiledi. Azııa qurlyǵynyń basty oıyndaryna aqmolalyq 14 sportshy ǵana qatysty. Qazaqstannyń boks (erler), dzıýdo (erler), erkin kúres, taekvondo, jeńil atletıka, júzý, sporttyq gımnastıka, kórkem gımnastıka, tas joldaǵy velojarys, karate, t.b. komandalarynda Aqmola oblysynyń sportshylary bolǵan joq.
2. Keıingi 20 jyl kóleminde jastar kóp shuǵyldanatyn grek-rım kúresi, erkin kúres jáne dzıýdodan álemdik deńgeıde bir balýan daıyndalǵan joq. Derekterge súıensek, oblysta erkin kúresten – 77, grek-rım kúresinen – 28, dzıýdodan – 30 jattyqtyrýshy jumys isteıdi. Osynsha maman 20 jylda Dáýlet Turlyqanov pen Eldos Smetovtiń dárejesinde bir balýan baptaı almasa, buǵan kim kináli?!
3. Ony aıtasyz, keıingi 5-6 jylda osy sport túrlerinen eresekter arasyndaǵy Qazaqstan chempıondary óte az. Bul degenińiz oblystyq sport basqarmasynyń óz qaramaǵyndaǵy jattyqtyrýshylardyń jumysyna nemquraıdy qaraýynyń saldary. Jattyqtyrýshylardyń jumystaryn qadaǵalamasa, olar júıeli josparmen jumys istemese, nátıje qaıdan bolsyn?
4. 1980-1990 jyldary Aqmola oblysynyń týmalary – aýyr atletshi Anatolıı Hrapatyı, shańǵyshylar Vladımır Smırnov pen Vladımır Sahnov Olımpıada oıyndary men álem chempıonattarynda olja saldy. Al keıingi 15 jylda Aqmola oblysynan boksshy Temirtas Júsipov qana álem chempıony atandy. Qalǵan olımpııalyq sport túrlerinen dúnıejúzilik deńgeıde mańdaıy jarqyraǵan sportshymyz eske túspeı tur. Aqıqatyn aıtsaq, bizdiń ólkemizde daryndy balalar óte kóp. Solardy Olımp shyńyna ózimiz jetkize almaı júrmiz.
5. Stepnogor qalasyndaǵy Bógenbaı batyr atyndaǵy sport ınternatynyń jumysy tipti nasharlap ketti. Bir kezderi bul ınternattan Olımpıada júldegerleri men Azııa chempıondary Marııa Grabovekaıa men Anna Nurmuhambetova shyǵyp edi. Keıingi jyldary bul ınternattan aýyr atletıkadan ǵana emes, sporttyń basqa túrlerinen de álemdik deńgeıde sportshy shyqpaıtyn boldy. Toq eteri, Bógenbaı batyr atyndaǵy sport ınternat-kolledji sporttyq kórsetkishter boıynsha respýblıka boıynsha kósh sońynda tur. Premer-lıgadaǵy «Oqjetpes» komandasynyń da jaǵdaıy jyl saıyn qalt-qult etetin kúıde.
6. Aqmola oblystyq sport basqarmasyna qaraıtyn Olımpıadalyq izbasarlar ortalyǵynyń jumysy da tómen dárejede. Bul ortalyq oblystaǵy daryndy jastardy shoǵyrlandyryp, ulttyq quramaǵa sportshylar daıyndaýǵa tıis. Biraq ortalyq erejesine saı ár sport túrinen jetkilikti dárejede komanda jasaqtaı almaı otyr. Sonyń saldarynan oblystyń jastar quramalary álsiz.
7. 2023 jylǵy Qazaqstan spartakıadasynda Aqmola oblysynyń sportshylary aýtsaıderler qatarynda qaldy. Oblys sportshylarynyń jazǵy sport túrlerinen respýblıka quramalaryndaǵy úlesi 2-3 paıyzdan aspaıdy.

Qadirli Marat Muratuly! Biz oblys sportyndaǵy problemalardyń shet jaǵasyn ǵana jazyp otyrmyz. Bul salada sheshýin kútken ózekti máseleler óte kóp. Sondyqtan Aqmola oblysynyń sportyna túpkilikti reforma qajet. Al reformany júzege asyrýǵa elge jany ashıtyn, bilikti ári isker mamandar qajet. Oblystyń qazirgi sport basshylary bul problemany sheshe almaıdy.

Bizder, osy óńirdiń turǵylyqty azamattary, Aqmola oblysynyń sportyn basqarýǵa osy ólkeniń tóltýma jigitterin taǵaıyndaýyńyzdy ótinip suraımyz. Sebebi, osy óńirde týǵan jigitterdiń kindik qany tamǵan jerine, jerlesterine degen kóńili, peıili erekshe bolady. Olar «Meniń týǵan ólkemniń sporty Jambyl, Shymkent óńirlerinen nesi kem?!» dep namysqa basady. Jerlesterinen, aǵaıyndarynan uıalyp jumysqa erekshe yntamen kirisedi. Biz rýǵa, elge bólinetin jandar emespiz. Bizdiń dostarymyz, jaqyndarymyz Qazaq eliniń barlyq qıyrynda bar. Biraq ár azamatqa óziniń týǵan topyraǵy ystyq, ári olar ózderi aralas-quralas ósken jergilikti halyqtyń mentalıtetin jaqsy biledi. Jergilikti halyq ta óz arasynan shyqqan jigitterge senimmen qaraıdy. Sony eskere kele, Aqmola oblysynyń sportyn alǵa súıreýge qabileti jetetin, aýdandyq, qalalyq, oblystyq, respýblıkalyq sport salasynyń jumysynda ysylyp, mol tájirıbe jınaqtaǵan Qanat Jurqaev, Azamat Imashev, Nurjan Kárimjanov sekildi jigitterdiń bar ekenin aıtqymyz keledi.

Bul problema – kóp jyldan beri kóptegen adamdardyń kókeıinde júrgen másele. Sizdiń el basqarý isindegi mol tájirıbeńizdi, kóptiń arasyndaǵy abyroı-bedelińizdi, elge janashyrlyǵyńyz ben iskerligińizdi bilgennen keıin osy ótinishti aıtyp otyrmyz. Dana halqymyz «Halyq qalasa, han túıesin soıady» degen. Sizdiń el azamattarynyń tilegin jerge tastamaıtynyńyzǵa senim bildiremiz. Al joǵarydaǵy jigitterdiń jaýapkershiligi bizdiń moınymyzda. Bul sózimizdi pármen emes, kásibı turǵydan keńes dep qabyldaǵanyńyzdy qalaımyz.

Zor qurmetpen, Aqmola oblysynyń sport qaıratkerleri:

1. Qojabekov Ǵalym — jýrnalıst, Qazaqstan Jýrnalıster akademııasynyń akademıgi, «Qurmet» ordeniniń ıegeri, Aýǵanstan soǵysynyń ardageri;
2. Qamenov Faızolla – QR eńbek sińirgen jattyqtyrýshysy, qoıan-qoltyq urysynan sport sheberi;
3. Súleımenov Ospan – Qazaqstannyń eńbek sińirgen ustazy, aqyn, kompozıtor, sport ardageri;
4. Bekseıitov Erkin – bokstan KSRO sport sheberi, sport ardageri;
5. Nazarov Aǵzam – QR eńbek sińirgen jattyqtyrýshysy, sambo kúresinen sport sheberi;
6. Masabaev Beıbit – bokstan QR eńbek sińirgen jattyqtyrýshysy;
7. Tuıamashev Azamat – bokstan QR eńbek sińirgen jattyqtyrýshysy, respýblıkanyń jastar qurama komandasynyń bas bapkeri;
8. Tahanov Marat – halyqaralyq dárejedegi sport sheberi, joǵary sanatty jattyqtyrýshy, Qorǵaljyn aýdany boıynsha dzıýdo bapkeri;
9. Jandildın Ábishan – sport ardageri, elınograd aýdanynyń turǵyny;
10. Temirbaev Abaı – sport ardageri, 2003–2012 jyldary Bógenbaı batyr atyndaǵy oblystyq sport ınternatynyń basshysy bolǵan;
11. Bókeev Qazbek – «Ereımen» sport klýbynyń prezıdenti;
12. Ignatov Vladımır – sport ardageri;
13. Esembekov Qajymurat – sport ardageri;
14. Ahanov Dáýren – sport ardageri;
15. Tuıamashev Berik – QR sport qaıratkeri;
16. Toqabaev Erǵalı – kókpar jáne at sportynyń sheberi, Aqmola oblysynyń kókpar quramasynyń bapkeri;
17. Hasenov Amanjol – QR eńbek sińirgen jattyqtyrýshysy, Ulttyq jáne at sporty túrleri ortalyǵynyń dırektory;
18. Súleımenov Ilııas – bokstan halyqaralyq dárejedegi sport sheberi, Azııa oıyndarynyń jeńimpazy;
19. Abýtalıpov Qanat – Qazaqstannyń eńbek sińirgen sport sheberi, WSB versııasy boıynsha álem chempıony;
20. Ardaq Toǵymov – sport jýrnalısi-sarapshysy.