شىڭعىسحان مەن شۋمەكوۆا وليمپيادادا قازاقستان تۋىن ۇستاپ شىعادى

19 قاڭتاردا وڭتۇستىك كورەيانىڭ كانۆوندو پروۆينتسياسىنداعى كاننىن قالاسىندا IV قىسقى جاستار وليمپياداسىنىڭ اشىلۋ سالتاناتىندا ەلىمىزدىڭ تۋىن ۇستاپ شىعاتىن سپورتشىلاردىڭ ەسىمدەرى بەلگىلى بولدى، دەپ حابارلادى تۋريزم جانە سپورت مينيسترلىگى.

وليمپيادانىڭ اشىلۋ سالتاناتىندا «مەملەكەتتەر شەرۋى» كەزىندە قازاقستاننىڭ بايراعىن كونكيشى كريستينا شۋمەكوۆا مەن شورت-ترەكشىسى ەراسىل شىڭعىسحان ۇستاپ شىعادى. شۋمەكوۆا پەتروپال قالاسىنىڭ، شىڭعىسحان – ورال قالاسىنىڭ تۇرعىنى.

سپورتشىلار جارىستارداعى ۇزدىك ناتيجەلەرى ءۇشىن عانا ەمەس، حالىقارالىق ارەناداعى جەڭىسكە دەگەن جىگەرى ءۇشىن تاڭدالدى.

كريستينا شۋماكوۆانىڭ جاسى 18-دە. ول كونكيمەن جۇگىرۋ سپورتىنان قازاقستان رەسپۋبليكاسىنىڭ سپورت شەبەرى، ءوزىنىڭ جاس ساناتىنداعى قازاقستان چەمپيونى، 2023 جىلعى الەم كۋبوگىنىڭ كۇمىس جۇلدەگەرى.

ەراسىل شىڭعىسحاننىڭ جاسى 17-دە. ول شورت-ترەكتەن سپورت شەبەرىنە كانديدات، ءوزىنىڭ جاس ساناتىنداعى قازاقستان چەمپيونى. سونىمەن بىرگە «ازيا بالالارى» 2023 حالىقارالىق جارىسىنىڭ كۇمىس جۇلدەسىن جەڭىپ العان.

بۇل – مەن ءۇشىن وتە اسەرلى ءسات. جاستاردىڭ قىسقى وليمپياداسىندا  قازاقستاندى تانىستىرۋ – ابىرويلى مىندەت قانا ەمەس، ۇلكەن جاۋاپكەرشىلىك. مەن جارىس جولىندا بار كۇش-جىگەرىمدى سالۋعا ۋادە بەرەمىن. ءتورت جىلدىقتىڭ باستى دوداسىنا قاتىساتىن ارقايسىمىز وليمپيادا مەدالىن جەڭىپ العىمىز كەلەدى جانە بۇل ويىندار ءبىزدىڭ وسى ماقساتقا جەتۋ جولىنداعى تاماشا مۇمكىندىگىمىز، — دەدى كريستينا شۋمەكوۆا.

شورت-ترەكتەن قازاقستان قۇراماسىنىڭ مۇشەسى ەراسىل شىڭعىسحان دا ءوز ويىن ورتاعا سالدى.

مەن ءۇشىن تۋ ۇستاۋشى بولۋ – ۇلكەن جاۋاپكەرشىلىك. ءبىزدىڭ ۇلتتىق قۇراما سپورتشىلارى الداعى بايراقتى باسەكەگە دايىن جانە ءبىز وڭتۇستىك كورەياداعى جارىستا ەل نامىسىن ابىرويمەن قورعايتىنىمىزعا سەنىمدىمىن. جاستار وليمپياداسىنا قاتىسۋ – ارقايسىمىز ءۇشىن زور تاجىريبە، كاسىبي سپورتشى رەتىندە وسۋىمىزگە مول مۇمكىندىك، — دەدى سپورتشى.

وليمپيالىق ويىندارعا دايىندىق بويىنشا شتاب باسشىسى ەلسيار قاناعاتوۆ تۋ ۇستاۋشىلاردىڭ دۇرىس تاڭدالعانىن اتاپ ءوتتى. ونىڭ ايتۋىنشا، كريستينا مەن ەراسىل – قازاقستان كومانداسىنىڭ لايىقتى سپورتشىلارى.

ەكەۋى دە ءبىزدىڭ مىقتى ءارى ۇيىمشىل كوماندامىزدىڭ جارقىن وكىلدەرى. ولاردىڭ كاسىبيلىگى، ىنتا-جىگەرى مەن سپورتقا دەگەن ادالدىعى وڭتۇستىك كورەياعا باراتىن جاستار قۇراماسى مۇشەلەرىنىڭ بويىنان ەڭ جاقسى قاسيەتتەرى دالەلدەپ تۇر. سپورتشىلار – ەل سپورتىنىڭ جاڭا بۋىنى. ءبىز ولاردىڭ قىسقى جاستار وليمپياداسىندا ونەر كورسەتۋىن اسىعا كۇتەمىز. سونىمەن قاتار جاس سپورتشىلار ويىندارعا قاتىسۋ ارقىلى تەك تاجىريبە جيناپ قانا قويماي، ءوز شەبەرلىكتەرىن شىڭداۋ جولىندا قۇندى ساباق الادى دەپ ۇمىتتەنەمىز، — دەدى سپورت فۋنكتسيونەرى.

IV قىسقى جاستار وليمپياداسى 19 قاڭتاردادان 1 اقپانعا دەيىن وڭتۇستىك كورەيانىڭ كانۆون پروۆينتسياسىندا بولادى. ازيا قۇرلىعىندا العاش رەت ۇيىمداستىرىلىپ جاتقان جاستاردىڭ قىسقى وليمپياداسىنا الەمنىڭ 50 ەلىنەن 1800 سپورتشى قاتىسادى دەپ جوسپارلانعان. 7 سپورت تۇرىنەن (15 باعدارلاما) 81 مەدال جيىنتىعى ساراپقا سالىنادى. قازاقستان قۇراماسىنىڭ 42 سپورتشىسى 5 سپورت ءتۇرى بويىنشا باق سىنايدى.