«پاري سەن-جەرمەن» مباپپەگە قاتىستى مالىمدەمە جاسادى

فرانتسيانىڭ «پاري سەن-جەرمەن» كلۋبى ۇلتتىق قۇرامانىڭ شابۋىلشىسى كيلليان مباپپەنى باسقا كومانداعا اۋىسۋىنا قاتىستى مالىمدەمە جاسادى.

كلۋبتىڭ پرەزيدەنتى ناسسەر ءال-حەلايفي فورۆاردتى «پسج» قۇرامىندا قالدىرىعىسى كەلەتىنىن ايتتى.

مەن كيلياننىڭ كلۋبىمىزدا قالعانىن قالايمىن. ونى ەشقايدا جىبىرگىم كەلمەيدى. ول الەمدەگى ەڭ مىقتى ويىنشى. مەنىڭ ويىمشا، كيليان ءۇشىن «پسج» كومانداسىنان ارتىق كلۋب جوق. مباپپە ءۇشىن ەڭ جاقسى كلۋب — ول بىزدىڭ كوماندامىز. مەن وعان سەنىمىن. ودان ەندى باسقا كلۋب تۋرالى سۇراي بەرمەڭىزدەرشى. ونى جونىنە قالدىرىڭىزدارشى. ءبىز ءبارىمىز ءبىر وتباسىنىڭ ادامدارى سياقتىمىز، — دەدى ول.

كوماندا باسشىسى مباپپەدەن تاعى دا باسقا كلۋبقا اۋىسۋى تۋرالى سۇراماۋدى ءوتىندى.

اسىرەسە، باق مەن سىزدەرگە ايتامىن، جاعدايدى ۋشىقتىرا بەرمەڭىزدەر، — دەدى فرانتسيا كلۋبىنىڭ تەگى اراب يەسى ءال-حەلايفي.

ەسكە سالساق، بۇعان دەيىن كيلليان مباپپەنىڭ بيىلعى ماۋسىم اياقتالىسىمەن ءمادريدتىڭ «رەال» كلۋبىنا اۋىساتىنى تۋرالى اڭگىمە شىققان ەدى. ونى فۋتبولشىنىڭ ءوزى دە جاسىرماي ايتقان بولاتىن.

قازىر مباپپە فرانتسيا چەمپيوناتىندا مەرگەندەر كوشىن باستاپ كەلەدى. ول 16 ويىندا 18 گولدىڭ اۆتورى اتانىپ وتىر. بەس رەت 11 مەترلىك ايىپ دوبىنان قاقپانى ءدال كوزدەپتى.

داستان كەنجالين،

استانا