كيپر كلۋبى ماكسيم سامورودوۆتى كومانداعا شاقىردى

كيپردىڭ «كراساۆا» فۋتبول كلۋبىنىڭ پرەزيدەنتى ەۆگەني ساۆين ۇلتتىق قۇراما مەن «اقتوبە» كلۋبىنىڭ شابۋىلشىسى ماكسيم سامورودوۆتى كومانداعا شاقىردى.

ول فۋتبولشىنى «كراساۆا» جاساعىنا ساتىپ العىسى كەلەتىنىن ايتتى.

ماكس، بەرى قاراشى. مەن ساعان مىناداي ۇسىنىس ايتقىم كەلەدى. سەن ۇسىنىستان باس تارتپايدى لەپ ويلايمىن. ەندى ول جاعىن ءوزىڭ كورەسىڭ. بيىلعى ماۋسىمدا «كراساۆا» جوعارعى ليگاعا شىقسا، سەن بىزگە كەلەسىڭ. چەمپيوناتتا 20 گول سالساڭ، يتاليانىڭ «تورينو» كلۋبىنا كەتەسىڭ. ءبىز اقشا تابۋ ءۇشىن سەنى «تورينوعا» ساتامىز. ەندى ول جاعىن ءوزىڭ جاقسى تۇسىنەسىڭ عوي، — دەدى كيپر كلۋبىنىڭ باسشىسى الەۋمەتتىك جەلىدەگى پاراقشاسىندا.

ازىرشە سامورودوۆ ۇسىنىسقا جاۋاپ بەرگەن جوق. قازىر ول «اقتوبەنىڭ» قۇرامىندا تۇركيادا وقۋ-جاتتىعۋ جيىنىندا ءجۇر. ال «كراساۆا» كلۋبىنا كەلسەك، بۇل كوماندا 2020 جىلى 8 جەلتوقساندا رەسەيدە قۇرىلعان. رەسەيدە ءبىر جارىم جىل كوماندا رەتىندە تىركەلىپ،  فۋتبول ۇلتتىق ليگاسىنىڭ ەكىنشى ديۆيزيونى مەن ەل كۋبوگى جولىنداعى جارىستاردا ويناعان. 2022 جىلى 31 مامىردا كوماندا رەسەيدەن كەتىپ، كيپرگە قونىس اۋداردى. كلۋبتىڭ باسشىسى دا كەزىندە فۋتبولشى بولعان. ول 1996 جىلدان 2006 جىلعا دەيىن رەسەيدىڭ 15 شاقتى كومانداسىندا دوپ تەپكەن. 2006 جىلى رەسەيدىڭ 21 جاسقا دەيىنگى جاستار قۇراماسىندا ءبىر رەت جاسىل الاڭعا شىققان.

«ماتچ تۆ» تەلەارناسىندا فۋتبول ويىندارىنىڭ كوممەنتاتورى بولىپ ىستەيدى. ءساۆيننىڭ جەكە You tube ارناسى دا بار. ول كراساۆا دەپ اتالادى.

داستان كەنجالين،

استانا