مينيستر وليمپيادا قالاشىعىنداعى سپورتشىلاردىڭ جاعدايىمەن تانىستى (ۆيدەو)

تۋريزم جانە سپورت ءمينيسترى ەرمەك مارجىقپاەۆ پەن ۇلتتىق وليمپيادا كوميتەتىنىڭ باسشىلىعى كانۆون پروۆينتسياسىنىڭ كاننىن قالاسىنداعى وليمپيادا قالاشىعىنا بارىپ، سپورتشىلار جانە جاتتىقتىرۋشىلارمەن كەزدەستى، دەپ حابارلادى ۆەدومستۆو.

ەرمەك مارجىقپاەۆ IV قىسقى جاسوسپىرىمدەر وليمپياداسىنا قاتىسۋعا كەلگەن اتلەتتەرىمىز ورنالاسقان بولمەلەردى ارالاپ، جالپى جينالىس وتكىزدى.

ءبارىڭىزدى وسىندا، جارىس وتەتىن جەردە كورگەنىمە قۋانىشتىمىن. قانشاما قوناق پەن سپورتشىلاردىڭ كەلگەنىن وزدەرىڭىز كورىپ جاتىرسىزدار. بارلىعى 70-تەن استام ەلدەن 1800-گە جۋىق سپورتشى بار. سىزدەرگە كۇندەلىكتى تىنىمسىز ەڭبەكتىڭ ارقاسىندا وسىندا كەلۋدىڭ ءساتى ءتۇستى. وتباسىلارىڭىز، جانكۇيەرلەر مەن بۇكىل قازاقستان سىزدەرگە كوز تىگىپ، قولداۋ كورسەتىپ وتىر. ايتارىم، تەك قانا العا!، — دەدى ەرمەك مارجىقپاەۆ.

وسىدان كەيىن وليمپياداعا دايىندىق بويىنشا شتابتىڭ باسشىسى مينيسترگە دەلەگاتسيانىڭ جۇمىسى تۋرالى باياندادى. دەلەگاتسيا وكىلدەرى قازىرگى تاڭدا قازاقستاننان كەلەتىن سپورتشىلاردىڭ ەكىنشى كەزەگىن قالاشىققا ورنالاستىرۋ، جاتتىعۋ كەستەسىن ۇيلەستىرۋ بويىنشا جۇمىس ىستەپ جاتىر.

جيىننان كەيىن ەرمەك مارجىقپاەۆ دەلەگاتسيانىڭ جاۋاپتى وكىلدەرىنە كومانداعا بارلىق جاعداي جاساۋعا اتسالىسۋدى تاپسىردى.

ايتا كەتەيىك، IV قىسقى جاسوسپىرىمدەر وليمپياداسىنىڭ سالتاناتتى اشىلۋ ءراسىمى بۇگىن 19 قاڭتاردا كاننىن قالاسىنداعى كونكيمەن جۇگىرۋ سپورت كەشەنىندە (Gangneung Oval) بولادى. ال جابىلۋ سالتاناتىن 1 اقپاندا Gangneung Olympic Park سپورت كەشەنى قابىلدايدى.

كانۆون-2024 ويىندارىنا 14 پەن 17 جاس ارالىعىنداعى الەمنىڭ 80-گە جۋىق ەلىنەن كەلگەن 1800 سپورتشى قاتىسادى. مۇندا 7 سپورت ءتۇرىنىڭ 15 باعدارلاماسى بويىنشا 81 مەدال جيىنتىعى ساراپقا سالىنادى. قازاقستان نامىسىن 5 سپورت تۇرىنەن 41 اتلەت قورعايدى.