«سەمەي» فۋتزال كلۋبى برازيليالىق شابۋىلشىمەن كەلىسىمشارت جاساستى

«سەمەي» فۋتزال كلۋبى برازيليالىق سپورتشى لۋكاس ماتەۋس دە كامپوسپەن كەلىسىمشارت جاسادى. برازيليانىڭ ازاماتى كلۋبتا وينايتىن وڭتۇستىك امەريكانىڭ بەسىنشى ويىنشىسى بولادى، دەپ حابارلادى «سەمەي» فۋتزال كلۋبى.

21 جاستاعى شابۋىلشى بۇعان دەيىن «چوپينزينو»، «ەس مادۋرەيرا» مەن «پيندا» سياقتى كلۋبتاردا ويناعان. سونداي-اق، لۋكاس ماتەۋس دە كامپوس 2019 جىلى كاريوكا چەمپيوناتىندا جانە BR كۋبوگىندا دوپ تەپكەن. 2022 جىلى برازيليا كۋبوگىنىڭ ارنايى ديۆيزيونى اتاعىن جەڭىپ العان.

مەن بۇل كومانداعا قوسىلۋعا مۇمكىندىك العانىما وتە قۋانىشتىمىن. كوماندا مەنى جىلى قابىلداپ، العاشقى كەزدەسۋدە جاعىمدى اسەر قالدىردى. مەن قازاقستاندا ويناپ جۇرگەن برازيليالىق فۋتزالشىلارمەن حابارلاسىپ، سەمەيدە جاڭا جوبانى تالقىلادىق. بۇل مەن ءۇشىن وتە ۇلكەن مۇمكىندىك. مۇنداعى باستى ماقساتىم — قازاقستان چەمپيونى بولۋ. مەندە قازىر موتيۆاتسيا، نيەت ءبارى بار. مەن وسى ماقساتقا جەتۋ ءۇشىن بار كۇشىمدى سالۋعا دايىنمىن، — دەدى لۋكاس ماتەۋس دە كامپوس.

«سەمەي» فۋتزال كلۋبىنىڭ سپورت ديرەكتورى اسلان سماقوۆتىڭ ايتۋىنشا،كومانداعا  لۋكاسپەن كەلىسىمشارت جاساۋ ءۇشىن 2،5 اي ۋاقىت ءوتتى.

كەلىسىمشارتتى ءبىراز ۋاقىت تالدادىق. سوسىن قول قويىلدى. دايىندىق كەزىندە ءبىز ونىڭ ويىن داعدىلارىن مۇقيات زەرتتەدىك، شابۋىلدا دا، قورعانىستا دا ونىڭ ونەرىن تالدادىق، پاركەتتە دە، كۇندەلىكتى ومىردەگى مىنەز-قۇلقىن باعالادىق. ءبىز سونداي-اق مەديتسينالىق كورسەتكىشتەردى، ستاتيستيكانى جانە ءبىز ءۇشىن ماڭىزدى ساناتتاردىڭ ءبىرى — ويىنشىنىڭ ادامي قاسيەتتەرىن ەسكەردىك، — دەدى ول.

ايتا كەتەيىك، «سەمەي» فۋتزال كلۋبى جارتى جىل بۇرىن قۇرىلدى. وسى ۋاقىتتا قازاقستان كۋبوگىندا كۇمىس مەدالگە يە بولدى.  قازاقستان چەمپيوناتىندا «سەمەي» فۋتزال كلۋبى تۋرنير كەستەسىندە ءۇشىنشى ورىنعا تۇراقتاپ، كلۋبتىڭ دەڭگەيىن كورسەتتى.

قازىرگى ۋاقىتتا فۋتزال كلۋبى فۋتزال ارەناسىنا كىرىپ قانا قويماي، بىردەن ۇلتتىق جارىستاردا جوعارى ورىندار ءۇشىن كۇرەسۋگە قابىلەتتى قارسىلاسقا اينالدى.