SportPress.kz قازاقستان سپورت جاڭالىقتارى
اۋستراليادا تەننيستەن ءوتىپ جاتقان Australian open تۋرنيرىندە اسىلجان ارىستانبەكوۆا جاسوسپىرىمدەر جارىسىنىڭ شيرەك فينالىنا شىقتى، دەپ حابارلادى قازاقستان تەننيس فەدەراتسياسى.
ول بەلارۋستىڭ وكىلى يۋليا پەرەپيحينامەن بىرگە جاپونيانىڭ سپورتشىلارى حايۋ كينوسيتا مەن ۆاكانا سونوبەنى جەڭدى.
ءبىرىنشى پارتيادا ارىستانبەكوۆا مەن پەرەپيحينا قارسىلاستارىن 6:4 جەڭسە، ەكىنشى پارتيادا كۇنشىعىس ەلىنىڭ تەننيسشىلەرى 6:2 ەسەبىمەن ەسە قايتاردى. وسىدان كەيىن سۋپەر تاي-برەيكتە ارىستانبەكوۆا مەن پەرەپيحينا قولدان شىعىپ بارا جاتقان ۇپايدى ۇستاپ قالىپ، 10:7 ەسەبىمەن ايلاسىن اسىردى.
ەندى اسىلجان ارىستانبەكوۆا مەن يۋليا پەرەپيحينا جارتىلاي فينالعا شىعۋ ءۇشىن جارىستىڭ ەكىنشى راكەتكالارى، ۇلىبريتانيالىق حاننا كلاگمەنمەن جانە مينگگە سيۋيمەنمەن كورتقا شىعادى.
قازاقستاننىڭ ءبىرىنشى، الەمنىڭ بەسىنشى راكەتكاسى ەلەنا رىباكينا بولسا، اۋستراليانىڭ اشىق چەمپيوناتىنداعى جەڭىلىستەن كەيىن ءسال ءۇزىلىس جاساپ، بىرىككە اراب امىرلىكتەرىنىڭ استاناسى — ءابۋ-دابي قالاسىندا بولاتىن Mubadala Abu Dhabi Open WTA 500 حالىقارالىق تۋرنيرىنە قاتىسادى.
تۋرنير 3-11 اقپان ارالىعىندا بولادى. جارىستىڭ جالپى جۇلدە قورى — 922 573 اقش دوللارى. جەڭىمپاز 142 مىڭ دوللار مەن 500 ۇپاي السا، فينالعا شىققان تەننيسشىگە 87 655 دوللار مەن 325 ۇپاي بەرىلەدى.
بۇل دوداعا رىباكينادان باسقا الەمنىڭ ۇزدىك 20 سپورتشىنىڭ قاتارىنداعى ونس جابەر، ماريا ساككاري، باربورا كرەيچيكوۆا مەن wild card العان ناومي وساكا باق سىنايدى.
