Australian open: Asyljan Arystanbekova shırek fınalǵa shyqty

Aýstralııada tennısten ótip jatqan Australian open týrnırinde Asyljan Arystanbekova jasóspirimder jarysynyń shırek fınalyna shyqty, dep habarlady Qazaqstan tennıs federaııasy.

Ol Belarýstiń ókili Iýlııa Perepıhınamen birge Japonııanyń sportshylary Haıý Kınosıta men  Vakana Sonobeni jeńdi.

Birinshi partııada Arystanbekova men Perepıhına qarsylastaryn 6:4 jeńse, ekinshi partııada Kúnshyǵys eliniń tennısshileri 6:2 esebimen ese qaıtardy. Osydan keıin sýper taı-breıkte Arystanbekova men Perepıhına qoldan shyǵyp bara jatqan upaıdy ustap qalyp,  10:7 esebimen aılasyn asyrdy.

Endi Asyljan Arystanbekova men Iýlııa Perepıhına jartylaı fınalǵa shyǵý úshin jarystyń ekinshi raketkalary, ulybrıtanııalyq Hanna Klagmenmen jáne Mıngge Sıýımenmen kortqa shyǵady.

Qazaqstannyń birinshi, álemniń besinshi raketkasy Elena Rybakına bolsa, Aýstralııanyń ashyq chempıonatyndaǵy jeńilisten keıin sál úzilis jasap, Birikke Arab Ámirlikteriniń astanasy — Ábý-Dabı qalasynda bolatyn Mubadala Abu Dhabi Open WTA 500 halyqaralyq týrnırine qatysady.

Týrnır 3-11 aqpan aralyǵynda bolady. Jarystyń jalpy júlde qory — 922 573 AQSh dollary. Jeńimpaz 142 myń dollar men 500 upaı alsa, fınalǵa shyqqan tennısshige 87 655 dollar men 325 upaı beriledi.

Bul dodaǵa Rybakınadan basqa álemniń úzdik 20 sportshynyń qataryndaǵy Ons Jaber, Marııa Sakkarı, Barbora Kreıchıkova men wild card alǵan Naomı Osaka baq synaıdy.