اندرەي شەۆچەنكو ۋكراينا فۋتبول قاۋىمداستىعىنىڭ باسشىسى بولدى

ۋكراينانىڭ اتاقتى فۋتبولشىسى اندرەي شەۆچەنكو جاڭا قىزمەتكە تاعايىندالدى. ول ۋكراينا فۋتبول قاۋىمداستىعىنىڭ پرەزيدەنتى بولىپ سايلاندى.

بۇل قىزمەتكە شەۆچەنكو جالعىز ۇمىتكەر بولدى. بۇعان دەيىن قاۋىمداستىقتى اندرەي پاۆەلكو باسقاردى. ول بىلتىر قاراجات جىمقىردى دەگەن كۇدىكپەن ۇيىمنان الاستاتىلدى.

اندرەي شەۆچەنكو 19876 جىلى كيەۆ وبلىسىندا تۋعان. 47 جاستا. ول — كيەۆتىڭ «دينامو» فۋتبول كلۋبىنىڭ تۇلەگى. 1986-1993 جىلدارى وسى كلۋبتىڭ جاستار جاساعىندا ويناپ، 1993-1999 جىلدارى، سوسىن 2009-2012 جىلدارى ەرەسەكتەر كومانداسىندا دوپ تەپكەن. 1996-2006، 2008-2009 جىلدارى يتاليانىڭ «ميلان» كلۋبىندا، 2006-2009 جىلدارى انگليانىڭ «چەلسي» جاساعىندا ونەر كورسەتكەن.

2004 جىلى «ميلان» كلۋبىنىڭ ساپىندا الەمنىڭ ۇزدىك فۋتبولشىسىنا بەرىلەتىن «التىن دوپ» سىيلىعىن العان.

1993-2012 كلۋبتاردا ويناعان كەزدە الاڭعا 442 رەت شىعىپ، 221 گول سالعان. سونىڭ ىشىندە كيەۆتىڭ «ديناموسىندا» 168 ماتچ ويناپ، 82 گولدىڭ اۆتورى اتانعان. «ميلاندا» ويناعاندا 226 ماتچقا قاتىسىپ، 130 رەت قاقپانى ءدال كوزدەگەن. ال «چەلسيدە» 48 رەت كوماندانىڭ جەيدەسىن كيىپ، 9 دوپتى تورعا تۋلاتقان.

شەۆچەنكو 1994-1995 جىلدارى ۋكراينانىڭ 18 جانە 21 جاسقا دەيىنگى ۇلتتىق قۇراما كوماندالارىنىڭ ساپىندا 15 رەت الاڭعا شىعىپ، 13 گول سالعان. وسىدان كەيىن ول 1995 جىلى بىردەن ەرەسەكتەر قۇرامىنا شاقىرىلىپ، 2013 جىلعا دەيىن وينادى. وسى ۋاقىتتا 111 رەت ۇلتتىق قۇرامانىڭ جەيدەسىندە ويناپ، 46 گولدىڭ اۆتورى بولعان.

2016-2021 جىلدارى ۋكراينا ۇلتتىق قۇراماسى باس جاتتىقتىرۋشىسى بولىپ قىزمەت ەتتى. سودان كەيىن قازىرگى كۇنگە دەيىن يتاليانىڭ «دجەنوا» كلۋبىنىڭ باس باپكەرى بولدى.

شەۆچەنكونىڭ جەتەكشىلىگىمەن فۋتبولشىلار 2021 جىلعى ەۋروپا چەمپيوناتىنا جولداما الىپ، شيرەك فينالعا جەتكەن بولاتىن. ال ءوزى 2006 جىلى ۇلتتىق قۇرامادا ساپىندا الەم چەمپيوناتىنىڭ ¼ فينالىندا ويناعان.

داستان كەنجالين،

استانا