Para sportshylar Mysyrda ústel tennısinen eki medal jeńip aldy

Mysyr elinde para ústel tennısinen ótken Fa40 ashyq chempıonatynda elimizdiń sportshylary 1 kúmis jáne 1 qola medal jeńip aldy, dep habarlady Týrızm jáne sport mınıstrligi.

Jarysta aralas jup razrıadynda óner kórsetken Talǵat Erekeev pen Altynaı Erjanqyzy kúmis medaldi ıelendi. Al, juptyq razrıadtaǵy básekede Alı Mahýlbekov pen Talǵat Erekeev qola júldeni qanaǵant tutty.

Fa40 ashyq chempıonaty Paralımpıada oıyndaryna qatysý úshin reıtıngtik jarystardyń biri bolyp keledi. Bizdiń sportshylarymyz árdaıym óz sheberligin shyńdap, kórsetkishterin jańartyp otyrý kerek. Para ústel tennısinde reıtıngterge upaılar  Fa20 jáne Fa40 jarystarynda beriledi. Fa40-tyń ereksheligi, reıtıngke joǵary upaılar beriledi. Jarysqa tek Fa20-da óner kórsetken sportshylar ǵana qatysa alady. Jalpy, bir jylda Fa40 jarystary bes ret ótse, Fa20 shamamen 20-25 ret bolady.

Jýyrda naýryz aıynda Astanada tuńǵysh ret reıtıngtik  Fa20 ashyq chempıonaty  ótetin bolady. Oǵan 14 memleketten 135 sportshy qatysýy josparlanýda, — dedi Dene múmkindikteri shekteýli tulǵalarǵa arnalǵan sporttyq daıarlaý ortalyǵynyń para ústel tennısinen komanda basshysy Erlan Dýsmaılov.

Fa40 chempıonaty 23-28 qańtar aralyǵynda Gıza qalasynda ótti. Jarysqa 27 elden 190 sportshy qatysty.