دەۆيس كۋبوگى: قازاقستان قۇراماسى ارگەنتيناعا اتتاندى

3-4 اقپاندا ارگەنتينانىڭ روساريو قالاسىندا تەننيستەن قازاقستاننىڭ ەرلەر قۇراماسى مەن وىس ەلدىڭ كومانداسى اراسىندا دەۆيس كۋبوگى جولىنداعى ىرىكتەۋ ماتچ بولادى، دەپ حابارلادى  Telegram-داعى RRaketkasi.

كوماندالار «جوكەي كلۋب دە روساريو» توپىراق توسەنىشىندەگى كورتتا وينايدى.

قازىر قازاقستان قۇراماسى ارگەنتينادا ماتچقا دايىندالىپ جاتىر. جاتتىعۋعا كىرىسىپ كەتتى.

ارگەنتيناعا كوماندانى يۋري ششۋكين باستاپ باردى. ول — كوماندانىڭ كاپيتانى.  قۇرامادا دەنيس ەۆسەەۆ، تيموفەي سكاتوۆ، دميتري پوپكو پەن الەكساندر نەدوۆەسوۆ بار.

كورتتىڭ ساپاسى وتە جاقسى. اسىرەسە، وتكەن جىلى ءبىز ويناعان بولگاريا نەمەسە چيليدەگى جاعدايمەن سالىستىرعاندا، شىنىمەن دە جاقسى ەكەن. ارگەنتينالىقتار جاقسى دايىندالعان. ولار توپىراق توسەنىشتە ويناۋدى ۇناتادى.

ارگەنتينانىڭ مىقتى قۇراممەن وينايتىنىن ءبارى جاقسى بىلەدى. دەگەنمەن ءبىز بارىنشا قارسى تۇرىپ، ولاردىڭ جوسپارىن بۇزۋعا تىرىسامىز، — دەدى تيموفەي سكاتوۆ.

ارگەنتينا – 2016 جىلعى دەۆيس كۋبوگىنىڭ يەگەرى. 1981، 2006، 2008 بەن 2011 جىلدارى فينالعا شىققان تاجىريبەلى كوماندا. قازاقستان ارگەنتينامەن ءۇشىنشى رەت وينايتىن بولادى. ازىرشە ەسەپ تەڭ – 1:1.