SportPress.kz قازاقستان سپورت جاڭالىقتارى
استانانىڭ بىرقاتار ۋنيۆەرسيتەتتەرىندە ستۋدەنتتەرگە V دۇنيەجۇزىلىك كوشپەندىلەر ويىندارىنىڭ ۆولونتەرلىك باعدارلاماسى تانىستىرىلدى، دەپ حابارلادى تۋريزم جانە سپورت مينيسترلىگى.
جيىنداردا دۇنيەجۇزىلىك كوشپەندىلەر ويىندارىن دايىنداۋ جانە وتكىزۋ جونىندەگى ديرەكتسيا باسشىلىعى ۆولونتەرلەردىڭ وسى ويىندارعا ۇلەس قوسۋعا مۇمكىندىگى بار ەكەنىن، ەرىكتىلەر قىزمەتىنىڭ تاجىريبە جيناۋداعى جۇمىسىنىڭ ماڭىزدىلىعىن ايتتى. سونىمەن قاتار ۆولونتەرلەرگە قويىلاتىن تالاپ، ەرەجە، ىرىكتەۋ كەزەڭدەرى تۋرالى مالىمەت جان-جاقتى ءتۇسىندىرىلدى.
جاستاردىڭ ەرىكتىلەر جاساعى – سپورتتىق جانە مادەني شارالاردىڭ ماڭىزدى بولىگى. مەيماندى قارسى الۋ، ولارعا جول كورسەتىپ، باعىت سىلتەۋ، شەتەلدىكتەرگە اۋدارماشى بولۋ سياقتى كوزگە كورىنبەيتىن ءىستىڭ بارىندە ۆولونتەر جۇرەدى. بىلايشا ايتقاندا، ەرىكتى دەگەنىمىز ءوزارا رياسىز كومەك پەن ءپاتريوتيزمنىڭ، قوعامعا جانە ەلگە پايدالى ادام بولۋدىڭ جارقىن ۇلگىسى. دەرەك ءۇشىن ايتساق، EXPO-2017 كورمەسىنە 7000-نان استام ەرىكتى قاتىستى. قىسقى ازيا ويىندارىندا دا جاس ورەندەرىمىز ۆولونتەر رەتىندە بەلسەندىلىك تانىتتى، — دەلىنگەن مينيسترلىكتىڭ حابارلاماسىندا.
V دۇنيەجۇزىلىك كوشپەندىلەر ويىندارىنا ۆولونتەر بولۋعا نيەت بىلدىرۋشىلەر https://worldnomadgames.kz/ سايتى ارقىلى «ەرىكتى بول» بولىمىنە كىرىپ، ساۋالنامانى تولتىرۋى كەرەك. بارلىق تالاپتان سۇرىنبەي وتكەن ۇمىتكەر سۇحباتقا شاقىرىلادى. ۆولونتەر جۇمىسىنا 18 جاستان اسقان ۇمىتكەر تاڭدالادى.
قوسىمشا Instagram، Tik Tok الەۋمەتتىك جەلىلەرىندە @Volunteer_nomadgameskz پاراقشالارىند كورسەتىلگەن. سونداي-اق WhatsApp، Telegram-دا 8 701 841 20 24 بايلانىس ءنومىرى ارقىلى سۇراقتارىڭىزدى جولداي الاسىزدار، — دەلىنگەن حابارلامادا.
كوشپەندىلەر ويىندارى بيىل استانادا 8-15 قىركۇيەك ارالىعىندا بولادى.
وندا سپورتتىڭ 20 تۇرىنەن جارىستار ۇيىمداستىرىلادى. وعان الەمنىڭ 100-دەن اسا ەلىنەن 4 مىڭعا جۋىق وكىل قاتىسادى.
«قازانات» يپپودرومىندا جانە ەتنواۋىل اۋماعىندا ات جارىسى، ءداستۇرلى ساداق اتۋ جانە قۇستارمەن اڭ اۋلاۋ جارىستارى، جاقسىلىق ۇشكەمپىروۆ اتىنداعى جەكپە-جەك سارايى مەن «الاۋ» مۇز ايدىنى سارايىندا ۇلتتىق كۇرەس تۇرلەرى مەن حالىق ويىندارى بويىنشا جارىستار، «دۋمان» كەشەنىندە ءداستۇرلى زياتكەرلىك ويىندار وتەدى.
