وليمپياداعا دايىندىق ويداعىداي – دياس احمەتشارىپ (فوتو)

بيىل ءتورت جىلدا ءبىر اينالىپ كەلەتىن جازعى وليمپيالىق ويىنداردىڭ جالاۋى 33 رەت كوتەرىلەدى. بۇل دۇرمەكتى دودا فرانتسيانىڭ استاناسى – پاريج قالاسىندا 26 شىلدە مەن 11 تامىز ارالىعىندا بولادى.

تورتجىلدىقتىڭ باستى دوداسىنا الەمنىڭ 205 ەلىنەن 10 مىڭنان استام سپورتشى قاتىسادى دەپ جوسپارلانعان. پاريجدەگى دودادا 32 سپورت تۇرىنەن 329 مەدال جيىنتىعى ساراپقا سالىنادى.

قازىر قازاقستان ۇلتتىق قۇراماسىنىڭ قورجىنىندا سپورتتىڭ 8 تۇرىنەن پاريج وليمپياداسىنىڭ 19 ليتسەنزياسى بار. سپورتشىلار ساداق اتۋدان – 4، ۆەلوشوسسەدەن – 3، نىسانا كوزدەۋدەن – 5، قازىرگى بەسسايىس پەن بوكستان ەكى-ەكىدەن، گرەك-ريم كۇرەسى، ەركىن كۇرەس پەن سپورتتىق گيمناستيكادان ءبىر-ءبىر ليتسەنزيانى جەڭىپ الدى.

وليمپياداعا ليتسەنزيا العان سپورتشىلارىمىز وعان دايىندىقتى جان-جاقتى باستاپ كەتتى. جاتىر. ال ءالى جولداما الماعان وتانداستارىمىز جازعا دەيىن حالىقارالىق تۋرنيرلەر مەن قۇرلىقتىق چەمپيوناتتارعا قاتىسىپ، ليتسەنزيا الۋعا كۇش سىناسادى. تۋريزم جانە سپورت مينيسترلىگىنىڭ مالىمەتىنە قاراعاندا، وليمپيا ويىندارىنا دەيىن 69 ليتسەنزيالىق جارىس قالدى. ونىڭ ىشىندە 5 الەم چەمپيوناتى، 7 ازيا چەمپيوناتى مەن 57 رەيتينگتىك تۋرنير بار.

وليمپياداعا جولداما بەرەتىن جارىستىڭ ءبىرى — جاقىن ارادا بوكستان يتاليانىڭ بۋستو-ارسيتسيو قالاسىندا بولادى. بۇل سىنعا 114 ەلدەن 668 سپورتشى قاتىسادى. وعان ۇلتتىق قۇرامانى باس جاتتىقتىرۋشى مىرزاعالي ايتجانوۆ باستاپ بارادى.

جاقىندا استانادا تۋريزم جانە سپورت مينيسترلىگى جانىنان سپورتشىلاردىڭ حالىقارالىق تۋرنيرلەردە ءساتتى ونەر كورسەتىپ، وليمپياداعا مۇمكىندىگىنشە كوپ ليتسەنزيا الۋىنا جاعداي جاساۋ ءۇشىن جەدەل شتاب قۇرىلعان بولاتىن. شتابتىڭ باسشىسى بولىپ كوپ جىل سپورت سالاسىن باسقارعان بەلگىلى سپورت قايراتكەرى ەلسيار قاناعاتوۆ، ال ونىڭ ورىنباسارى بولىپ بەلگىلى جۋرناليست، سپورت مامانى، تۋريزم جانە سپورت ءمينيسترىنىڭ ەرمەك مارجىقپاەۆتىڭ كەڭەسشىسى دياس احمەتشارىپ تاعايىندالدى.

بۇگىن ءبىز مينيسترلىكتىڭ جانىنان قۇرىلعان وسىناۋ شتابتىڭ جۇمىسى مەن قىزمەتىمەن تانىسىپ، شتاب باسشىسىنىڭ ورىنباسارى دياس احمەتشارىپپەن سۇحباتتاستىق.

-دياس سوۆەتقالي ۇلى، بيىل وليمپيادا جىلى بولىپ وتىر. ونىڭ ءبىرىنشىسى جاقىندا كورەيا رەسپۋبليكاسىنىڭ كانۆون پروۆينتسياسىنداعى كاننىن قالاسىندا بولدى. وندا ازيا قۇرلىعىندا جاسوسپىرىمدەردىڭ العاشقى اق وليمپياداسى جالاۋ كوتەردى. ەكىنشى تاعى ءبىر ۇلكەن وليمپيادا جاز ايلارىندا فرانتسيانىڭ پاريج قالاسىندا بولادى. مەنىڭ سۇرايىن دەگەنىم، شتاب وليمپيادا قارساڭىندا قۇرىلعان كەزدە جۇمىسى قالاي باستالدى؟ شتاب قاشان اشىلدى؟

-بىلتىر قىتايدىڭ حۋانچجوۋ قالاسىندا وتكەن جازعى ازيا ويىندارىنان كەيىن مەملەكەت باسشىسى قاسىم-جومارت توقاەۆ ازيادانىڭ جەڭىمپازدارى مەن جۇلدەگەرلەرىن قابىلداعان كەزدە تۋريزم جانە سپورت مينيسترلىگىنە تاپسىرما بەرگەن بولاتىن. ول ەڭ الدىمەن سپورتتى باسقارۋ ينستيتۋتتارىنىڭ باسىن بىرىكتىرۋدى تاپسىرعان ەدى. ياعني، تۋريزم جانە سپورت مينيسترلىگى، ۇلتتىق وليمپيادا كوميتەتى مەن سپورت تۇرلەرى فەدەراتسيالارىنىڭ باسىن قوسىپ، بىرگە جۇمىس ىستەۋدى تاپسىردى. بۇل دەگەنىمىز ءبىر جاعادان باس، ءبىر جەڭگەن قول شىعارىپ جۇمىس ىستەۋ دەگەن ءسوز. پرەزيدەنتتىڭ تاپسىرماسىن ورىنداۋعا بايلانىستى مينيسترلىك 4 قاڭتاردا رەسمي تۇردە شتابتىڭ تۇساۋىن كەستى.

شتاب استاناداعى جەكپە-جەك سارايىندا اشىلدى. ول 150 شارشى مەتردى الىپ جاتىر. سول كۇنى شتاب ءوز جۇمىسىن باستادى.

كانۆونعا باراتىن سپورتشىلار وسى شتابتان اتتاندى. تۋ ۇستاۋشىلار مەن باسقا دا سپورتشىلار انت بەرىپ، وليمپياداشىلاردى شىعارىپ سالدىق.

شتابقا نەشە ادام قىزمەتكە الىندى؟ ولاردىڭ مىندەتى قانداي؟

-شتابقا التى ادام مۇشە. ونىڭ باسشىسى — ەلسيار بايمۇحامەد ۇلى قاناعاتوۆ. شتابقا تۋريزم جانە سپورت مينيسترلىگى، ۇلتتىق وليمپيادا كوميتەتى مەن سپورت تۇرلەرى فەدەراتسياسىنىڭ وكىلدەرى كىرەدى. سونىمەن بىرگە وعان بوكستان وليمپيادا چەمپيونى سەرىك ساپيەۆ تە مۇشە. ارقايسىنىڭ ءوز مىندەتى بار. اركىم ءوز جۇمىسىمەن اينالىسادى.

شتاب – تۋريزم جانە سپورت مينيسترلىگى، ۇلتتىق وليمپيادا كوميتەتى جانە سپورت فەدەراتسيالارىنىڭ وليمپياداعا بىرىگىپ جۇمىس ىستەۋ ءۇشىن قۇرىلعان ۋاكىلەتتى ورگان. ونىڭ نەگىزگى جۇمىسى – سپورتشىلاردىڭ الداعى جارىستارعا جاقسى دايىندىعىن قامتاماسىز ەتۋ.

ءبىزدىڭ باستى ماقساتىمىز – الداعى وليمپيالىق ويىندارعا بارشا سپورتشىلار مەن ۇلتتىق قۇرامالاردىڭ جۇمىسىن ۇيلەستىرىپ، بارلىق ماسەلە بويىنشا ورتاق شەشىم قابىلداۋ.

شتاب بارلىق كەشەندى جارىستار اياقتالعانعا دەيىن تۇراقتى نەگىزدە جۇمىس ىستەيتىن بولادى.

-شتابتىڭ تەحنيكالىق جاراقتانۋى قالاي؟ سپورتشىلار شتابتىڭ جۇمىسىن قالاي باعالاپ جاتىر؟ كانۆون وليمپياداسى كەزىندە قانداي جۇمىس ىستەلىندى؟

-شتابتا كەرەك-جاراقتىڭ ءبارى بار. جۇمىسقا كەرەكتى ينتەرنەت، كومپيۋتەر بولسىن شتاب بارىمەن قامتاماسىز ەتىلگەن. بىرىڭعاي قوڭىراۋ ورتالىعى دا جۇمىس ىستەيدى. ءبىز شتاب اشىلعاننان كەيىن قاڭتاردا الدىمەن كورەيانىڭ كانۆون پروۆينتسياسىندا جاسوسپىرىمدەر اراسىندا وتكەن وليمپياداعا دايىندالىپ، وتكىزدىك.

شتاب ءوز جۇمىسىن كورسەتتى. وليمپيادادان جان-جاقتى اقپارات تاراتتىق. ودان كەيىن اككرەديتاتسيا ماسەلەسىمەن اينالىستىق. سپورتشىلار كيىمدەردى شتابتان الدى. بارلىق ۇيلەستىرۋ جۇمىستارىن وتكىزدىك. سونىمەن قاتار كانۆوننىڭ الدىندا ءبىز كورەيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسىمەن كەزدەسۋ ۇيىمداستىردىق. ونىمەن كەلىسسوز وتكىزدىك. ەلشى بىزگە كانۆون وليمپياداسىنىڭ بويتۇمارىن سىيلادى. ءسويتىپ، ەكىجاقتى كەلىسسوزدەن كەيىن تۋريزم جانە سپورت ءمينيسترى ەرمەك بورانباي ۇلى مارجىقپاەۆ كورەياعا بارعان كەزدە سول ەلدىڭ سپورت مينيسترىمەن كەزدەستى.

ەندى الدا پاريج وليمپياداسىنا تىكەلەي دايىندىق باستالىپ كەتتى.

-وتكەن وليمپيادالاردىڭ قارساڭىندا قۇرىلعان شتابتاردان قازىر سىزدەر جۇمىس ىستەيتىن شتابتىڭ ايىرماشىلىعى، ەرەكشەلىگى بار ما؟

-جالپى، بۇرىن وليمپياداعا الدىندا مۇنداي ورتالىقتاندىرىلعان شتاب بولماعان ەدى. بۇعان دەيىن مينيسترلىك وزىنە تيەسىلى ماسەلەمەن اينالىسىپ، سوعان جاۋاپ بەرەتىن. ۇلتتىق وليمپيادا كوميتەتى وزىنە جۇكتەلگەن مىندەتتەرمەن اينالىساتىن. سپورت تۇرلەرى فەدەراتسيالارى دا سولاي ءوز جۇمىستارىن اتقارا بەرەتىن. ال ەندى بيىل پرەزيدەنتتىڭ تاپسىرماسىمەن قۇرىلعان شتاب بارشامىزعا جۇمىستى جەڭىلدەتەدى دەگەن ويدامىز. جۇمىستى جەڭىلدەتۋدى كانۆون وليمپياداسى دا كورسەتتى. ەندى الداعى پاريج وليمپياداسىنا دا وسى شتابتىڭ پايداسى دا كومەگى دە تيەدى دەپ ويلايمىن. باستى ايىرماشىلىعى وسى. بۇرىن مۇنداي ورتالىقتاندىرىلعان شتاب بولماعان.

-بىلتىر ازيا ويىندارى كەزىندە سپورتشىلاردىڭ كيىمدەرىنە قاتىستى داۋ شىققان ەدى. بيىلعى پاريج وليمپياداسىنا سپورتشىلاردىڭ كيىمدەرىن كىم تىگەدى؟

-كيىم ۇلگىسىنە كەلەتىن بولساق، سپورتتىق ەپيكيروۆكا وزدەرىڭىز كورگەندەي، كانۆون وليمپياداسىنا سپورتشىلار مەن دەلەگاتسيا مۇشەلەرىنە جاقسى كيىم-كەشەك بەردىك. كيىمدى وتاندىق ءوندىرۋشى تىكتى. سونىمەن بىرگە ءبىز بالالارىمىزعا ۇلتتىق نىشاندا تاقيا كيگىزدىك. ونى ءبارى ەسكەردى، ەلەدى. ۇلتتىق سيپاتتاعى كيىمدەرىمىز ءبارىن ءتانتى ەتتى. وليمپيادادا جۇرگەندە ءبىزدىڭ ءجاسوسپىرىم سپورتشىلارىمىزبەن ءبارى سۋرەتكە ءتۇستى. وتە ءبىر كورىكتى، كوزگە تۇسەتىندەي ادەمى فورما بولىپ شىقتى. سپورتشىلارىمىزدىڭ سىرتقى كيىمى دە كوك بايراعىمىز تۇستەس بولىپ، كوپشىلىكتىڭ كوڭىلىن جاۋلاپ الدى. كيىم وتە ساپالى بولدى.

شتابتا سپورتشىلارعا كيىمدەرگە الدىن الا تاپسىرىلىس بەرىلدى. ەگەر كيىمدەرى سىيماي نەمەسە تار بولعان كەزدە ءبىز ءبارىن ۋاقىتىندا اۋىستىرىپ بەرىپ وتىردىق. ءسويتىپ، سپورشىلارىمىز وليمپيالداعا تاپ-تياناقتى دايىن بولىپ شىقتى.

پاريج وليمپايداسىنا دا سولاي جۇمىس ىستەيمىز. قازىر سپورتشىلاردىڭ كيىمدەرىنىڭ ەرەجەسىنە قاتىستى زاڭ جوباسى دايىندالىپ جاتىر. ديزاين بەكىتىلەدى. سوسىن ونى تىگەتىن كومپانيا انىقتالادى. وعان اشىق كونكۋرس جاريالانادى. ول جاقىن ارادا شەشىلەتىن ماسەلە. قازىر وسىنىڭ ءبارى زەرتتەلىپ، زاڭ جاعىنان شەشىلدى. ارينە، ءبىز الدىمەن وتاندىق ونىمگە كوڭىل بولەمىز. ەگەر شەتەل كومپانيالارى نيەت بىلدىرسە، سپورت كيىمدەرىن تىگىپ بەرۋدى قالسا، ءبىز وعان دا قارسى بولمايمىز. ەڭ اۋەلى بىزگە كيىم ساپالى، كوزگە تۇسەتىندەي ادەمى بولىپ شىعۋى كەرەك.

ءبىزدىڭ سپورتشىلار پاريج وليمپياداسىندا ەڭ باستىسى، جاقسى ونەر كورسەتىپ قانا قويماي، كيىمدەرى دە ادەمى شىعۋى كەرەك دەپ ويلايمىن. وسىعان ءبىز اتسالىسىپ جاتىرمىز.

-شتابتىڭ الداعى جوسپارى قانداي؟

-شتابتىڭ الداعى جوسپارى تۋرالى ايتسام، ءبىز اي سايىن مەديا جوسپار دايىنداپ وتىرمىز. اقپان ايىنا قاتىستى ايتسام، سپورتتى دامىتۋ ديرەكتسياسى وكىلدەرىمەن كەزدەسەمىز.

15 اقپاندا تۋريزم جانە سپورت مينيسترلىگىنىڭ ۇلكەن القا ءماجىلىسى بولادى. كوللەگياعا قاتىسامىز. سول كۇنى وبلىستىق سپورت باسقارما باسشىلارىمەن كەزدەسەمىز.

قازىر وليمپياداعا جولداما الۋعا مۇمكىندىگى زور سپورتشىلار كوپ. ولاردىڭ كوبى وبلىستان دا شىعىپ جاتىر.  مىنە، سول وبلىستارداعى سپورت باسقارماسى باسشىلارىمەن كەزدەسۋ جوسپارلانىپ وتىر. ودان كەيىن پاراليمپيادا كوميتەتىنىڭ وكىلدەرىمەن دە كەزدەسەمىز. ويتكەنى، شتاب وليمپيادادان كەيىن پاراليمپيادا ويىندارى كەزىندە دە جۇمىس ىستەيدى.  بۇل كەزدەسۋ اقپان ايىنىڭ سوڭىنا دەيىن بولادى. سونىمەن بىرگە اقپان ايىنداعى تاعى ءبىر ماڭىزدى كەزدەسۋ تۋريزم جانە سپورت مينيسترىمەن جوسپارلانعان. ونى 23 اقپانعا جوسپارلاپ وتىرمىز. سول كۇنى شتابقا فرانتسيانىڭ قازاقستانداعى توتەنشە جانە وكىلەتتى ەلشىسى كەلەدى. ول مينيسترمەن كەزدەسەدى. كەزدەسۋدە پاريج وليمپياداسى اڭگىمە بولادى. وندا ەلشىلىك پەن ءبىزدىڭ جاعىمىزدان قانداي ۇسىنىستار بار، سونىڭ ءبارى تالقىلانادى.

ناۋرىز ايىنا بولەك جوسپار قۇراتىن بولامىز.

-اڭگىمەڭىزگە راحمەت!

اڭگىمەلەسكەن، داستان كەنجالين

استانا