ماگومەد اديەۆ قازاقستان ازاماتتىعىنا قاتىستى ويىن ايتتى

فۋتبولدان ۇلتتىق قۇراما كومانداسىنىڭ باس جاتتىقتىرۋشىسى، رەسەيلىك مامان ماگومەد اديەۆ ءالى قازاقستان ازاماتتىعىن الاتىن ويى جوق ەكەنىن اشىپ ايتتى.

ول ەۋروپا چەمپيوناتىنا جولداما بەرەتىن ماتچتار اياقتالعان سوڭ، قازاقستان فۋتبول فەدەراتسياسىنان كەلىسىمشارتتى ۇزارتۋ تۋرالى ۇسىنىس تۇسپەسە، ءوز وتانى – رەسەيگە قايتىپ كەتەتىنىن جاسىرمادى. ونىڭ ايتۋىنشا، بار ماسەلە قازاقستان ازاماتتىعىن الۋعا تىرەلىپ تۇرعان جوق. ول قازاقستاندى ەۋرو-2024 تۋرنيرىنە شىعارىپ، وتانداستارىمىزعا ۇلكەن سىي جاساعىسى كەلەدى. بىراق ءبارىن ۋاقىت كورسەتەدى.

قازىر ازاماتتىقتى تالقىلايتىن ۋاقىت ەمەس. ءبىز الدىمەن ەۋروپا چەمپيوناتىنا جولداما الۋدى ويلاۋىمىز كەرەك. ءارى قاراي ەن بولاتىنىن ۋاقىت كورسەتەدى. الايدا مەن قازاقستان ازاماتتىعىن الامىن دەپ ايتا المايمىن. مەنىڭ ءوز وتانىم بار. ول – رەسەي.

قازىر بىزگە ويىندارعا دايىندالۋ قاجەت. مەندە دە، قازاقستان فۋتبول فەدەراتسياسىندا دا ازاماتتىعىما قاتىستى ماسەلە تىرەلىپ تۇرعان جوق. ءيا، ازاماتتىق تۋرالى ءسوز بولعان. قاي كەزدە بولعانىن ۇمىتىپ قالىپپىن، — دەدى ول.

ول ازاماتتىق تۋرالى ويلامايتىنىن ايتتى.

مەن — ءوز ەلىمنىڭ ازاماتىمىن، گروزنىيدا تۋعانمىن. سول جەردە تۋىپ-ءوستىم، ەندى قارتتىقتى دا سول جەردە قارسى الۋىم كەرەك شىعار. قالاي ويلايسىز؟!، — دەدى ول Sport24-كە.

سونىمەن بىرگە ول رەسەي مەن قازاقستاننىڭ فۋتبولىن سالىستىرىپ، ەكەۋىنىڭ اراسى جەر مەن كوكتەي ەكەنىن تىلگە تيەك ەتتى. ونىڭ پىكىرىنشە، سانك-پەتەربۋرگتىڭ «زەنيت» كلۋبى پرەمەر-ليگادا ويناسا، ءسوزسىز قاتارىنان ون دۇركىن ەل چەمپيونى بولار ەدى.  رەسەيدە فۋتبول جاقسى دامىپ جاتىر. ونداعى ينفراقۇرىلىم قازاقستانداعى ستاديوندار مەن باسقا دا فۋتبول الاڭدارىنان مىڭ ەسە ارتىق.

46 جاستاعى رەسەيلىك مامان 2022 جىلدان بەرى ەلىمىزدىڭ باس كومانداسىن جاتتىقتىرىپ كەلەدى. سول كەزدەن بەرى اديەۆتىڭ جاساقتاپ كەلە جاتقان ۇلتتىق قۇراما حالىقارالىق ارەنادا لايىقتى ونەر كورسەتىپ جاتقانىن ايتۋ كەرەك.

قازىر قازاقستان ۇلتتىق قۇراماسى ەۋروپا چەمپيوناتىنا جولداما بەرەتىن ماتچتارعا دايىندىقتى باستاپ كەتتى. ەلىمىزدىڭ باس كومانداسى وقۋ-جاتتىعۋ جيىنىن تۇركيادا ەمەس، بىرىككەن اراب امىرلىكتەرىندە وتكىزەتىن بولىپ شەشىلدى.

قۇراما كوماندا ءباا-دە 8 ناۋرىزدا جينالىپ، 14 ناۋرىزدا تۇرىكمەنستان قۇراماسىنا قارسى جولداستىق ماتچ وتكىزەدى.

قازاقستان قۇراماسى اراب امىرلىكتەرىندە ەۋروپا چەمپيوناتىنا ۇلتتار ليگاسى ارقىلى بەرىلەتىن جولدامانى الۋ ءۇشىن دايىندالادى.

21 ناۋرىزدا «تورتتىك تۋرنيرىندە» سىرت الاڭدا گرەكيامەن ماتچ بولادى. ەكىنشى جارتىلاي فينالدا گرۋزيا مەن ليۋكسەمبۋرگ كەزدەسەدى. وسى ماتچتاردا جەڭگەن كوماندالار ءبىر-بىرىمەن فينالدا كەزدەسىپ، ويىندى جەڭگەن قۇراما ەۋروپا چەمپيوناتىنا جولداما الادى. ەگەر قازاقستان قۇراماسى گرەكيا كومانداسىن جەڭسە، وندا ءوز الاڭىندا گرۋزيا-ليۋكسەمبۋرگ ماتچىندا جەڭگەن جاساقپەن كەزدەسەدى. بۇل مۇمكىندىك ەلىمىزدىڭ باس كومانداسىنا 2022-2023 جىلدارداعى ماۋسىمدا ۇلتتار ليگاسىنداعى س توبىندا 1-ورىن العانى ءۇشىن بەرىلىپ وتىر.

جاقىندا فرانتسيانىڭ پاريج قالاسىندا وتكەن 2024-2025 جىلعى UEFA ۇلتتار ليگاسىنىڭ جەرەبەسى بولعاندا ۇلتتىق قۇراما ۆ ليگاسىندا اۋستريا، نورۆەگيا، سلوۆەنيا قۇرامالارىمەن بىرگە ءبىر توپقا ءتۇستى.

داستان كەنجالين،

استانا