«جوق نارسەنى بار دەۋ قاتەلىك»: تامارا دۇيسەنوۆا وبلىستاعى سپورتتى سىنادى

پرەمەر-ءمينيستردىڭ ورىنباسارى تامارا دۇيسەنوۆا تۋريزم جانە سپورت مينيسترلىگىندە وتكەن دەنە شىنىقتىرۋ جانە سپورت، ويىن بيزنەسى مەن لوتەرەيا قىزمەتىن رەتتەۋ سالالارىنداعى 2023 جىلعى قىزمەتى مەن 2024 جىلعا قويىلعان نەگىزگى مىندەتتەرى تۋرالى كەڭەيتىلگەن القا ماجىلىسىندە سپورت سالاسىن ودان ءارى دامىتۋعا قاتىستى بىرنەشە تاپسىرما بەردى.

ۇكىمەت باسشىسىنىڭ ووىنباسارى دەنە شىنىقتىرۋ مەن سپورتتى ودان ءارى دامىتۋدا حالىقارالىق سپورت ۇيىمدارىنىڭ تەز وزگەرەتىن تالاپتارىن ەسكەرە وتىرىپ، بۇقارالىق دەنە شىنىقتىرۋدى، وقۋ-جاتتىعۋ پروتسەسىن ۇيىمداستىرۋدا جاڭا تاسىلدەردى تالاپ ەتەتىنىن ايتتى.

بۇقارالىق سپورتتى دامىتۋعا جەتكىلىكتى دەڭگەيدە كوڭىل بولىنبەيدى. ماسەلەن، 2023 جىلى بۇقارالىق سپورتقا جۇمسالعان قارجى وڭىرلەردىڭ بيۋدجەت قاراجاتىنىڭ جالپى كولەمىنىڭ نەبارى 0،061% بولدى. سونىمەن قاتار قاراجاتتى بولۋدە بۇرمالانۋلار بار. جوعارى جەتىستىكتەر سپورتىنا جۇمسالاتىن قارجى كولەمى – 97،2 % بولسا، بۇقارالىق سپورتقا جۇمسالاتىن شىعىستار نەبارى 2،8%.

حالىقارالىق تاجىريبە كورسەتكەندەي، بۇقارالىق سپورتتى دامىتۋدىڭ ءتيىمدى قۇرالى مەكتەپ جاسىنان ەگدە جاسقا دەيىنگى سپورت ليگالارىن دامىتۋ، ونىڭ ىشىندە جارىس الدىندا تىكەلەي سپورت كوماندالارىن قۇرۋدان تۇراقتى جۇمىس ىستەيتىن كوماندالارعا كوشۋ جولىمەن دامىتۋ، — دەدى پرەمەر-ءمينيستردىڭ ورىنباسارى.

وسى رەتتە ءسوز سويلەۋشى ەلىمىزدە ءتيىستى ينفراقۇرىلىمنىڭ جوقتىعىنان بۇقارالىق سپورتتىڭ دامىماي، كەنجەلەپ جاتقانىن ايتتى.

ودان ءارى سپورتتى دامىتۋداعى بارلىق ماسەلە دەنە شىنىقتىرۋ جانە سپورتتى دامىتۋ تۋرالى زاڭ مەن مەملەكەتتىك تاپسىرىس تۋرالى زاڭعا قاتىستى بولىپ جاتقانىن دا اتاپ ءوتتى. ونىڭ ايتۋىنشا، قازىر پارلامەنت ماجىلىسىمەن بىرگە اتالعان زاڭ جوباسى دايىندالىپ جاتىر. وسى قۇجاتتاردا مەملەكەتتىك تاپسىرىس تۋرالى ماسەلەگە دە باسا نازار اۋدارىلىپ وتىر.

بايانداماشى جەرگىلىكتى سپورتتىڭ ءتيىستى دەڭگەيدە دامىماي جاتقانىن دا تىلگە تيەك ەتتى. ول جيىندا پاۆلودار وبلىسىن مىسالعا الىپ، بۇل وڭىردەگى سپورتقا جاۋاپتى لاۋازىم يەلەرىنىڭ وبلىس سپورتىنا قاتىستى تەرىس اقپارات بەرگەنىنە نارازىلىق ءبىلدىردى.

قاي جەر، قاي وبلىس بولسىن ءبىز الدىمەن مەملەكەتتىك قىزمەتكەرلەردىڭ اقپاراتىنا قاراپ ماسەلەنى شەشەمىز. شەشىم قابىلدايمىز. سوندىقتان وبلىس اكىمدەرى مەن ولاردىڭ ورىنباسارلارى رەسپۋبليكالىق القا ماجىلىسىنە وكىلدەرىن جىبەرسە، ۇكىمەتكە تەكسەرىلگەن دۇرىس اقپاراتتارىن دايىنداپ بەرۋى كەرەك.

قازىر وبلىستاردا ينفراقۇرىلىم وتە ناشار. پاۆلودار وبلىسىندا ۇلكەن قاتەلىكتەر بار ەكەن. جوق نارسەنى بار دەۋ قاتەلىك، — دەدى ول.

جيىندا ۇكىمەت باسشىسىنىڭ ورىنباسارى لوتورەيا ، لۋدومانياعا زاڭدارعا وزگەرىس ەنگىزىپ جاتقانىن، وسى باعىتتا مينيسترلىككە جۇكتەلگەن مىندەتتى ءتيىستى دەڭگەيدە اتقارىپ شىعۋدى تاپسىردى. ودان كەيىن ول وليمپيالىق سپورت تۇرلەرىنە بەرىلەتىن قاراجاتتى ءتيىمدى جۇمساۋ كەرەكتىگىن ايتتى.

مىسالى، گەرمانيادا 80 ملن حالىق بولسا، بيۋدجەتتەن 18 سپورت تۇرىنە عانا اقشا بولىنەدى ەكەن. 18 ملن حالقى بار نيدەرلاندتا سپورتتىڭ بەس تۇرىنە قاراجات بەرىلەدى. ال بىزدە 20 ملن حالىق بولسا، سپورتتىڭ 45 تۇرىنە اقشانى ساناپ بەرەدى ەكەنبىز. سوندىقتان مينيسترلىككە وسى ماسەلەنى دە پىسىقتاپ الۋدى تاپسىرامىن، — دەدى تامارا بوسىمبەكقىزى.

سونىمەن بىرگە ول بالالار مەن جاسوسپىرىمدەر سپورت مەكتەبىن قارجىلاندىرۋ ماسەلەسىمەن دە شىنداپ كىرىسۋدى تاپسىردى. ونىڭ پىكىرىنشە، قازىر اتالعان وقۋ ورىندارىن قارجىلاندىرۋ سمەتالىق نەگىزدە بولىپ جاتىر. ياعني، بالالار مەن جاسوسپىرىمدەر سپورت مەكتەبىن بيۋدجەتتە قالعان اقشا عانا بەرىلەدى. سول سەبەپتى  بىلىم وردالارىن قارجىلاندىرۋ ماسەلەسى دۇرىس جولعا قويىلۋ كەرەك. ودان ءارى  بالالار مەن جاسوسپىرىمدەر سپورت مەكتەبىنىڭ وقۋ باعدارلاماسى دا جالپى ءبىلىم بەرەتىن مەكتەپتەردىڭ باعدارلاماسىمەن بىردەي بولۋ كەرەكتىگىن اتاپ ايتتى.

وكىنىشكە قاراي، سپورتتى دامىتۋدا كوپ پروبلەما بار. بۇقارالىق سپورتتان باستاپ جوعارى جەتىستىك سپورتىنا دەيىن پروبلەما شاش ەتەكتەن. بالالار كىشكەنتاي كەزىنەن سپورتقا قىزىقسا، ولاردى دەمەپ، قولداپ جاتقانىمىز شامالى. كەرىسىنشە، ساعى سىنىپ قالىپ جاتقاندار بار. مىسالى، سپورتقا قىزىققان بالا 3-4 اي ۇيىرمەدە ءجۇرىپ، ونى بىردەن جارىسقا قاتىستىرىپ، جاراقات الۋىنا سەبەپشى بولىپ جاتامىز. مۇنداي وقيعالار از ەمەس. سول سەكىلدى كادر ماسەلەسىندە دە پروبلەما كوپ. سپورتتا كادرلار از. سپورت زاڭگەرى، سپورت دارىگەرى، سپورت پسيحولوگى، سپورت ديەتولوگى دەگەن ماماندىقتار اتىمەن جوق. تورەشىلەردى دايىنداۋدا دا پروبلەما بار. سوندىقتان ءبارىن ءبىر كۇندە جاساۋ كەرەك دەپ ايتپايمىن. بىراق بىرتە-بىرتە سپورتتى دامىتۋدى قولعا الىپ، ءجۇمىس ىستەۋ كەرەك. ۇلتتىق سپورت تۇرلەرىنناسيحاتتاۋ بويىنشا دا جۇمىستى جالعاسىرۋ كەرەك،  — دەدى پرەمەر-ءمينيستردىڭ ورىنباسارى.

بايانداماشى ءسوز سوڭىندا ۇكىمەت پەن پارلامەنت سپورت پەن دەنە شىنىقتىرۋ ىسىنە ارقاشان قولداۋ كورسەتەتىنىن ەسكەرتتى.

داستان كەنجالين،

استانا