ۇلتتار ليگاسى: گرەكيا – قازاقستان ماتچىنىڭ بيلەتتەرى ونلاين ساتىلىمعا شىقتى

21 ناۋرىزدا افينا قالاسىندا فۋتبولدان گرەكيا مەن قازاقستان ۇلتتىق قۇراما كوماندارىنىڭ ماتچىنىڭ بيلەتتەرى ونلاين ساتىلىمعا شىقتى.

بۇل ماتچ ۇلتتار ليگاسىنىڭ «تورتتىك ءتۋرنيرى» دەپ اتالىپ كەتكەن پلەي-وفف كەزەڭىنىڭ اياسىندا بولادى. وعان قازاقستان، گرەكيا، گرۋزيا مەن ليۋكسەمبۋرگتىڭ كوماندالارى قاتىسىپ، ەۋروپا چەمپيوناتىنا بەرىلەتىن جالعىز جولدامانى ساراپقا سالادى.

21 ناۋرىزدا گرەكيا مەن قازاقستان جارتىلاي فينالدا كەزدەسەدى. «ەكىنشى جارتىلاي فينالدا گرۋزيا مەن ليۋكسەمبۋرگ وينايدى. وسى ماتچتاردا جەڭگەن كوماندالار ءبىر-بىرىمەن فينالدا كەزدەسىپ، ويىندى جەڭگەن قۇراما ەۋروپا چەمپيوناتىنا جولداما الادى. ەگەر قازاقستان قۇراماسى گرەكيا كومانداسىن جەڭسە، وندا ءوز الاڭىندا گرۋزيا-ليۋكسەمبۋرگ ماتچىندا جەڭگەن جاساقپەن كەزدەسەدى. بۇل مۇمكىندىك ەلىمىزدىڭ باس كومانداسىنا 2022-2023 جىلدارداعى ماۋسىمدا ۇلتتار ليگاسىنداعى س توبىندا 1-ورىن العانى ءۇشىن بەرىلىپ وتىر.

گرەكيا مەن قازاقستان ماتچىنا بيلەتتەردى ticketon.kz سايتىنان ساتىپ الۋعا بولادى. جانكۇيەر ويىنعا بيلەتتى ونلاين ساتىپ السا، برون جاساپ، بيلەتتەردى قاعاز تۇرىندە افينادا ماتچ الدىندا الادى.
سونداي-اق، گرەكيانىڭ زاڭىنا سايكەس بيلەتتە ساتىپ الۋشىنىڭ اتى-ءجونى مەن پاسپورت ءنومىرى جازىلۋى ءتيىس.
بارلىق اقپارات ساتىپ الۋشىنىڭ ەلەكتروندى پوشتاسىنا جىبەرىلەدى.

گرەكيا مەن قازاقستان ماتچى افينا ۋاقىتىمەن ساعات كەشكى 21:45 -تە، ال استانا ۋاقىتىمەن ساعات تۇنگى 00:45 باستالادى.

ماتچ Agia Sophia Stadium ستاديونىندا بولادى.

قازىرگە دەيىن قۇرلىقتىق دودانىڭ فينالدىق ساتىسىنا فرانتسيا، پورتۋگاليا، بەلگيا، يسپانيا، شوتلانديا، تۇركيا، انگليا، اۋستريا، ۆەنگريا، سلوۆاكيا، البانيا، دانيا، نيدەرلاند، شۆەيتساريا، رۋمىنيا، سەربيا قۇرامالارى شىقتى. ال گەرمانيا چەمپيوناتتى ۇيىمداستىرۋشى ەل رەتىندە ىرىكتەۋسىز قاتىسادى.

ۇلتتىق قۇراما ەۋروپا چەمپيوناتىنىڭ ىرىكتەۋ تۋرنيرىندە دانيا (3:2) مەن فينليانديا (1:0) كوماندالارىن ءبىر مارتە جەڭسە، Cولتۇستىك يرلانديا (1:0، 1:0) مەن سان-مارينو (3:0، 3:1) قۇرامالارىنان ەكى رەت باسىم ءتۇستى. دانيا (1:3)، سلوۆەنيا (1:2، 1:2)، فينلياندياعا (0:1) ەسە جىبەردى.

قازاقستان ۇلتتىق قۇراماسى ەۋروپا چەمپيوناتىنا جولداما بەرەتىن ماتچتارعا دايىندىقتى باستاپ كەتتى.

قۇراما كوماندا ءباا-دە 8 ناۋرىزدا جينالىپ، 14 ناۋرىزدا تۇرىكمەنستان قۇراماسىنا قارسى جولداستىق ماتچ وتكىزەدى.

داستان كەنجالين،

استانا