بولماعان سايلاۋدىڭ قورىتىندىسىن ءبىر اپتا بۇرىن جاريالاۋ — قيانات!

كەشە بەلگىلى جازۋشى، پۋبليتسيست، قازاقستان رەپۋبليكاسىنىڭ ەڭبەك سىڭىرگەن قايراتكەرى، قازاقستان رەسپۋبليكاسىنىڭ ەڭبەك سىڭىرگەن سپورت قايراتكەرى نەسىپ ءجۇنىسباي ۇلىنىڭ ۇلتتىق وليمپيادالىق كوميتەتىنىڭ پرەزيدەنتى قىزمەتىنە بىرنەشە اتاقتى سپورتشىلاردىڭ لايىق ەكەنىن ايتىپ، SportPress.kz اقپاراتتىق-ساراپتامالىق سپورت سايتىنا حات جولداعان بولاتىن.

بۇگىن قالامگەر ۇوك پرەزيدەنتىگىنە سايلاۋ تۋرالى تاعى  بىر پىكىرىن جازىپ، حات جولدادى. وقىرمانعا وسى حاتتى جاريالاۋدى ءجون كورىپ وتىرمىز.

… مىنا ەكى-ءۇش جازبامنان كەيىن ماعان ءبىراز ادام حابارلاستى: «نەسىپ،سەن دالاعا سويلەپ جاتىرسىڭ، بار ماسەلە شەشىلىپ قويعان!» دەدى. استاپىراللا! سايلاۋ بولعان جوق، تيمۋر ق ۇلىباەۆ ورنىن بەرگەن جوق، سوندا ول قالاي بىتكەن شارۋا بولادى؟ ولمەگەن ادامدى كومۋ، بولماعان سايلاۋدىڭ قورىتىندىسىن ءبىر اپتا بۇرىن جاريالاۋ — قيانات قوي!

دەموكراتياعا بەت العان ادال، ادىلەتتى قوعامدا ءبارى اشىق ورىندالۋى كەرەك ەمەس پە؟ جارايدى، قايتا سايلانعانىنا جىل دا تولماعان ق ۇلىباەۆتىڭ ورنىن بوساتۋى ورىندى دەيىك، بىراق ونىڭ ورنىنا وسى سالاداعى ەل بىلەتىن، ەل باعالايتىن بىرنەشە ادام وزدەرىن وسى قىزمەتكە ۇسىنىپ، باعدارلامالارىن تالقىلاۋعا جاريالاپ، سودان سوڭ اتاۋلى كۇنى سايلاۋعا تۇسپەي مە ەكەن؟! سەرىك قوناقباەۆ تا، داۋلەت تۇرلىحانوۆ تا، يسلام بايرامۋكوۆ تە، سەرىك ساپيەۆ تە بۇل قىزمەتكە ابدەن لايىق جانە مەن اتاماعان قانشاما لايىقتى تۇلعالار بار — باقتيار ارتاەۆ، اسقار ورازالينوۆ، ەرماحان يبرايموۆ، اسحات جيتكەەۆ، اسحات شاحاروۆ، نۇرباقىت تەڭىزباەۆ، ۇلان رىسقۇل، دياس دوسقاراەۆ… ءتاۋبا، سپورتتاعى تۇلعا بولۋعا لايىق جىگىتتەر بارشىلىق. ال، وسىنداي ماڭىزدى ماسەلە سپورتشى قاۋىم اراسىنداعى كەڭ تالقىلاۋعا نەگە تۇسپەدى؟ كىم ول شەشىمدى كوپشىلىككە سالماي قابىلداي سالعان؟ مۇنى ەل پرەزيدەنتىنە جەتكىزۋ كەرەك. جاس ۇكىمەت شارۋاشىلىقپەن اينالىسقانى ءجون،ەلىمىزدىڭ پارلامەنتى مۇنى ءبىر تالقىلاپ السا نۇر ۇستىنە نۇر بولار ەدى. سونىمەن قاتار، وسى سالالارعا ۇنەمى نازار سالىپ وتىرۋعا ءتيىس مەملەكەتتىك حاتشى دا ماسەلەنىڭ ءمان-جايىنان قاباردار بولىپ، ءوز ىقپالىن تيگىزگەنى ءجون.

…ماعان «دالاعا سويلەپ وتىرسىڭ…» دەگەندەردىكى بەكەر بولار. ادىلەتتى دەموكراتيالىق جاڭا قازاقستان قۇرامىز دەپ جاتقان ەلدە ونداي ويلانباعان شەشىم بولا قويماس. ءبىر ادامنىڭ ايتقانى تۇكىرىگى جەرگە تۇسكەنشە ورىندالا بەرەتىن زاماننان وتتىك،بارلىق شەشىم زاڭ اياسىندا شەشىلەدى دەپ پرەزيدەنتىمىزدىڭ ءوزى ايتقان جوق پا؟! ولاي بولسا، ەلىمىز ءۇشىن ەرەكشە ماڭىزدى قىزمەت بوپ تابىلاتىن قر ۇلتتىق وليمپيادالىق كوميتەتىنىڭ پرەزيدەنتتىگىن سايلاۋ دا سول ادىلەتتى زاڭ مەن سول سالاعا بايلانىستى ەرەجە اياسىندا وتەدى دەپ كۇتەيىك.

نەسىپ جۇنىسباي ۇلى،

سپورت ءجۋرناليسى، جازۋشى، سپورت قايراتكەرى