رىباكينا تاعى دا دەنساۋلىعىنىڭ سىر بەرگەنىن ايتتى

ەلىمىزدىڭ ءبىرىنشى، الەمنىڭ ءتورتىنشى راكەتكاسى ەلەنا رىباكينا تاعى دا دەنساۋلىعىنىڭ سىر بەرىپ جاتقانىن ايتتى.

باس كەزىندە تەننيسشىدە دەنە قىزۋى بولىپ، تەمپەراتۋراسى كوتەرىلگەن كورىنەدى. ال قازىر تەننيسشى ازداپ جوتەلىڭكىرەپ سويلەيدى. ونىڭ ەمدەلىپ جاتقانىنا دا بىرنەشە كۇن بولىپتى. سول ءۇشىن رىباكينا اقش-تىڭ ينديان-ۋەللس WTA 1000 تۋرنيرىنە قاتىسۋدان نەگە باس تارتقانىن ايتتى.

بيىل دەنساۋلىعىم بولماي ءجۇر. قايتا-قايتا ەمدەلەمىن. ەندى منە، ينديان-ۋەللس تۋرنيرىنە دە قاتىسا الماي وتىرمىن. بۇل مەن ءۇشىن  ۇلكەن وكىنىش. جارىسقا قاتىسا الماعانىما وكىنەمىن. ءبىزدىڭ جاقىن ادامدارىمىز جارىستىڭ مەن ءۇشىن قانشالىقتى ماڭىزى زور ەكەندىگىن، بىلتىرعى چەمپيوندىق اتاعىمدى قورعاعىم كەلگەنىن بىلەدى. مەنى قولداۋعا كەلگەن بارلىق جانكۇيەرگە ريزاشىلىعىمدى بىلدىرەمىن. ولاردىڭ بيىل مەنىڭ ويىنىمدى كورە المايتىنى وكىنىشتى. ەندى مەن كورتقا قايتا ورالۋ ءۇشىن دەمالىپ، قالپىما كەلەمىن، — دەدى رىباكينا.

ەلەنا رىباكينا ينديان-ۋەللستە ءجۋرناليستىڭ الداعى وليمپياداعا قاتىسۋ تۋرالى ساۋالىنا دا جاۋاپ بەردى.

ەلىمىزدىڭ كوشباسشى تەننيسشىسى قازاقستان ءۇشىن وليمپيادا مەدالىن جەڭىپ الۋدىڭ اسا ماڭىزدى ەكەنىن ايتتى.

ول «ۇلكەن دۋلىعا» ءتۋرنيرىنىڭ جەڭىمپازى اتانعاننان كەيىن قازاقستان حالقى ءۇشىن وليمپيادا مەدالىن جەڭىپ الۋ ماڭىزدى ەكەنىن، وتكەن جولى مەدالعا قول سوزىم جەردە جەڭىلۋگە ءماجبۇر بولعانىن اتاپ ءوتتى.

سوندىقتان مەن ءۇشىن وليمپيادانىڭ ورنى بولەك. ەگەر وليمپيادا جۇلدەسىن جەڭىپ السام، بۇل  ەل ۇشىن ەرەكشە وقيعا، مەن ءۇشىن جانە بارشا قازاقستان ءۇشىن ۇلكەن جەتىستىك بولادى. قازاقستاندىقتار مەنى بەلسەندى تۇردە قولداپ، بارىنشا قولداپ-كومەكتەسىپ كەلەدى.

قازىر قازاقستاندا تەننيس بارعان سايىن كەڭىنەن تاراپ جاتىر. بۇل تاماشا ءۇردىس. بالالار تەننيس ويناي باستادى. مەن وليمپيادادا بار كۇشىمدى سالىپ وينايمىن، — دەدى سپورتشى.

توكيو وليمپياداسىندا ەلەنا رىباكينا ءتورتىنشى ورىنعا تابان تىرەگەن ەدى.

داستان كەنجالين،

استانا