Rybakına taǵy da densaýlyǵynyń syr bergenin aıtty

Elimizdiń birinshi, álemniń tórtinshi raketkasy Elena Rybakına taǵy da densaýlyǵynyń syr berip jatqanyn aıtty.

Bas kezinde tennısshide dene qyzýy bolyp, temperatýrasy kóterilgen kórinedi. Al qazir tennısshi azdap jótelińkirep sóıleıdi. Onyń emdelip jatqanyna da birneshe kún bolypty. Sol úshin Rybakına AQSh-tyń Indıan-Ýells WTA 1000 týrnırine qatysýdan nege bas tartqanyn aıtty.

Bıyl densaýlyǵym bolmaı júr. Qaıta-qaıta emdelemin. Endi mne, Indıan-Ýells týrnırine de qatysa almaı otyrmyn. Bul men úshin  úlken ókinish. Jarysqa qatysa almaǵanyma ókinemin. Bizdiń jaqyn adamdarymyz jarystyń men úshin qanshalyqty mańyzy zor ekendigin, byltyrǵy chempıondyq ataǵymdy qorǵaǵym kelgenin biledi. Meni qoldaýǵa kelgen barlyq jankúıerge rızashylyǵymdy bildiremin. Olardyń bıyl meniń oıynymdy kóre almaıtyny ókinishti. Endi men kortqa qaıta oralý úshin demalyp, qalpyma kelemin, — dedi Rybakına.

Elena Rybakına Indıan-Ýellste jýrnalıstiń aldaǵy Olımpıadaǵa qatysý týraly saýalyna da jaýap berdi.

Elimizdiń kóshbasshy tennısshisi Qazaqstan úshin Olımpıada medalin jeńip alýdyń asa mańyzdy ekenin aıtty.

Ol «Úlken dýlyǵa» týrnıriniń jeńimpazy atanǵannan keıin Qazaqstan halqy úshin Olımpıada medalin jeńip alý mańyzdy ekenin, ótken joly medalǵa qol sozym jerde jeńilýge májbúr bolǵanyn atap ótti.

Sondyqtan men úshin Olımpıadanyń orny bólek. Eger Olımpıada júldesin jeńip alsam, bul  el úshin erekshe oqıǵa, men úshin jáne barsha Qazaqstan úshin úlken jetistik bolady. Qazaqstandyqtar meni belsendi túrde qoldap, barynsha qoldap-kómektesip keledi.

Qazir Qazaqstanda tennıs barǵan saıyn keńinen tarap jatyr. Bul tamasha úrdis. Balalar tennıs oınaı bastady. Men Olımpıadada bar kúshimdi salyp oınaımyn, — dedi sportshy.

Tokıo Olımpıadasynda Elena Rybakına tórtinshi orynǵa taban tiregen edi.

Dastan KENJALIN,

ASTANA