SportPress.kz قازاقستان سپورت جاڭالىقتارى
تۇركيانىڭ ەرزۋرۋم قالاسىندا ءوتىپ جاتقان XX-قىسقى سۋردليمپيادا ويىندارىندا قازاقستان ەرلەر قۇراما كومانداسى كلاسسيكالىق شاحماتتان 10 ۇپاي جيناپ، قولا مەدالعا يە بولدى. ال جارىستىڭ التىن جۇلدەسىن 12 ۇپاي جيناعان حورۆاتيانىڭ سپورتشىلارى جەڭىپ الدى. كۇمىس مەدال 11 ۇپاي جيناعان پولشا كومانداسىنا بۇيىردى.
ۇلتتىق قۇراما ساپىندا سۇلتان قوجاحمەتوۆ، ساماجان كەتتەبەكوۆ، ماكسيم روجكوۆ، امانگەلدى ناۋرىزعاليەۆ، مەيىرمان پەرنەەۆ پەن ۆيكتور ماكسيمەنكو وينادى.
كلاسسيكالىق شاحماتتان جارىس قىزىقتى دا تارتىستى بولدى. قارسىلاستارىمىز وسال بولمادى. ويىن كەزىندە ەلىمىزدىڭ سپورتشىلارى يتاليا، گەرمانيا مەن سەربيا قۇراما كوماندالارىن جەڭىپ، ۋكراينا مەن پولشا كوماندالارىمەن تەڭ ويناپ، تەك حورۆاتيا كومانداسىنا ەسە جىبەرگەن بولاتىن. جارىستىڭ ناتيجەسىندە كوماندامىز 7 تۋردان ءوتىپ، ون ءۇش كوماندا اراسىندا ءۇشىنشى ورىنعا تۇراقتادى، — دەدى شاحماتتان اعا جاتتىقتىرۋشى ەلدوس كۇزەرباەۆ.
2 ناۋرىزدا باستالعان XX-قىسقى سۋردليمپيادا ويىندارى 12 ناۋرىزعا دەيىن بولدى. وعان قازاقستاننان 26 سپورتشى قاتىسىپ، شاحمات، سنوۋبورد پەن شاڭعى جارىسىنان باق سىنادى.
قۇرالاي ءاشىمحانوۆا،
استانا
