امەريكالىق كوۆبويلار كوشپەندىلەر ويىندارىنا قاتىسادى

تۋريزم جانە سپورت ءمينيسترى ەرمەك مارجىقپاەۆ ايگىلى امەريكالىق كوۆبوي كەيسي فيلد پەن كوكپاردان اقش قۇراماسىنىڭ كاپيتانى لەدد حوۋەلل باستاعان اقش دەلەگاتسياسىمەن كەزدەستى، دەپ حابارلادى تۋريزم جانە سپورت مينيسترلىگى.

كەزدەسۋدە  تاراپتار ات سپورتى تۇرلەرىن دامىتۋدى، ەكى ەلدە كوكپار مەن امەريكالىق رودەونى كەڭىنەن ناسيحاتتاۋدى، سونداي-اق بيىل ەلىمىزدە وتەتىن V دۇنيەجۇزىلىك كوشپەندىلەر ويىندارىن تالقىلادى.

امەريكالىقتار V دۇنيەجۇزىلىك كوشپەندىلەر ويىندارىنىڭ كوكپار جارىسىنا قاتىسقىسى كەلەتىندەرىن ايتتى. بۇعان دەيىن اقش-تىڭ كوكپاردان ۇلتتىق قۇراماسى 2018 جانە 2022 جىلدارى دۇنيەجۇزىلىك كوشپەندىلەر ويىندارىنا قاتىسقان بولاتىن.

كوكپار – ەجەلگى كوشپەندىلەر ويىنىنىڭ ءبىرى. ونىڭ تاريحى تەرەڭدە جاتىر. ارينە، كوكپار وتە اسەرلى ويىن. قازاقستاندا «كوكپار» فەدەراتسياسى جۇمىس ىستەيدى. ەلىمىزدىڭ كوپتەگەن قالاسى مەن اۋىلىندا جىل سايىن كوكپاردان جارىستار وتكىزىلىپ تۇرادى. ەڭ كەيىنگى دۇنيەجۇزىلىك كوشپەندىلەر ويىندارىندا قازاقستان كوكپارشىلارى باس جۇلدەنى جەڭىپ الدى. سوندىقتان ءبىز بيىل دا سپورتشىلارىمىزعا زور سەنىم ارتامىز. ءبىز سىزدەردى وسى سپورت ءتۇرى بويىنشا الدىڭعى قاتارلى كوماندا دەپ بىلەمىز. سونىمەن قاتار سىزدەر ورتالىق ازياداعى كوشپەلى حالىقتارىنىڭ ات سپورتى ويىندارىنا بەلسەندى ارالاسىپ، ونى اقش اۋماعىندا ناسيحاتتاپ جۇرگەندەرىڭىز ءبىزدى قۋانتادى. اقش كومانداسىنىڭ كوكپاردا ونەر كورسەتۋى ەستە قالارلىق وقيعا بولادى دەپ ويلايمىز، — دەدى ەرمەك مارجىقپاەۆ.

كەزدەسۋدە تۋريزم جانە سپورت ءمينيسترى اقش-تان كەلگەن قوناقتاردى V دۇنيەجۇزىلىك كوشپەندىلەر ويىندارىنىڭ كەرى ساناق تاقتاسىن ىسكە قوسۋ راسىمىنە قاتىسۋعا شاقىردى. ءوز كەزەگىندە دەلەگاتسيا وكىلدەرى رودەو سپورتىن  دۇنيەجۇزىلىك كوشپەندىلەر ويىندارىنىڭ كورمە قويىلىمدارى باعدارلاماسىنا ەنگىزۋدى ۇسىندى.