« ۇلى جىبەك جولى» ءتۋرنيرى: قازاقستان ءۇش التىن مەدال الدى

بوكستان ازەربايجاننىڭ باكۋ قالاسىندا ءوتىپ جاتقان « ۇلى جىبەك جولى» تۋرنيرىندە قازاقستان قۇراماسى ءۇش التىن مەدالدى جەڭىپ الدى.

60 كەلى سالماق دارەجەسىندە تالعات سىرىمبەتوۆ فينالدا شارشى الاڭ يەسى ازراك بابيروۆتى جەڭدى. قازاق بوكسشىسى قارسىلاسىنان ءۇش راۋندتا ايقىن باسىمدىلىق تانىتتى. ول ءبىرىنشى راۋندتا-اق قارسىلاسىنا ەش مۇمكىندىك بەرمەي، ۇپاي سانىن جيناپ وتىردى. ال ءۇشىنشى راۋندتا ازەربايجان بوكسشى «بەسىنشى» بۇرىشتى ىزدەپ، جۇدىرىقتاسۋدان قالدى. جەكپە-جەكتىڭ سوڭىندا تورەشىلەردىڭ ءبىراۋىزدان سىرىمبەتوۆتىڭ جەڭىسكە لايىق ەكەنىن ايتتى.

71 كەلى سالماق دارەجەسىندە دارحان دۇيسەباي فينالدا وزبەكستاننىڭ وكىلى بەكزود حاميدوۆتان باسىم ءتۇستى. وتانداسىمىز العاشقى ەكى راۋندتا ۇپايىن تۇگەلدەپ، ءۇشىنشى راۋندتا جاقسى تاكتيكا قولداندى. ول قارسىلاسىنا شەگىنە ءجۇرىپ، سوققى بەرىپ وتىردى. سونىڭ ناتيجەسىندە ۇپاي سانىن كوبەيتىپ، جەڭىسكە جەتتى.

92 كەلىدەگى ساعىندىق توعامباي دا فينالدا الەم چەمپيونى، توكيو وليمپياداسىنىڭ قولا جۇلدەگەرى لورەن الفونسو دومينگەستى جەڭدى. قازاق بوكسشىسى كۋبالىق بىلعارى قولعاپ يەسىنە  ەش مۇمكىندىك بەرمەدى.  كۋبالىق قابىلان قازاق بوكسشىسىنىڭ جەڭىسىن مويىندادى.

كۇمىس جۇلدەنى تەمىرتاس ءجۇسىپوۆ (48 كگ)، تيمۋر قابدەشەۆ (54 كگ) يەلەندى.

وسى جارىسقا بارعان «سپورت جۇلدىزدارى» رەسپۋبليكالىق جۋرنالىنىڭ اتقارۋشى ديرەكتورى بولاتبەك ساعىمباەۆتىڭ ايتۋىنشا، فينالدا ونەر كورسەتكەن تەمىرتاس ءجۇسىپوۆ پەن تيمۋر قابدەشەۆ جەڭىلگەن جوق ەدى. الايدا تورەشىلەر شەشىمى باسقا بولدى.

86 كگ سالماقتاعى بەكزات تاڭاتار قولا مەدالگە يە بولدى.

قازاقستان اتىنان حالىقارالىق دارەجەدەگى ايبا تورەشىسى الىشەر التاەۆ ادىلقازىلىق ەتتى.

داستان كەنجالين،

استانا