«Uly jibek joly» týrnıri: Qazaqstan úsh altyn medal aldy

Bokstan Ázerbaıjannyń Baký qalasynda ótip jatqan «Uly jibek joly» týrnırinde Qazaqstan quramasy úsh altyn medaldi jeńip aldy.

60 keli salmaq dárejesinde Talǵat Syrymbetov fınalda sharshy alań ıesi Azrak Babırovty jeńdi. Qazaq boksshysy qarsylasynan úsh raýndta aıqyn basymdylyq tanytty. Ol birinshi raýndta-aq qarsylasyna esh múmkindik bermeı, upaı sanyn jınap otyrdy. Al úshinshi raýndta ázerbaıjan boksshy «besinshi» buryshty izdep, judyryqtasýdan qaldy. Jekpe-jektiń sońynda tóreshilerdiń biraýyzdan Syrymbetovtiń jeńiske laıyq ekenin aıtty.

71 keli salmaq dárejesinde Darhan Dúısebaı fınalda О́zbekstannyń ókili Bekzod Hamıdovtan basym tústi. Otandasymyz alǵashqy eki raýndta upaıyn túgeldep, úshinshi raýndta jaqsy taktıka qoldandy. Ol qarsylasyna shegine júrip, soqqy berip otyrdy. Sonyń nátıjesinde upaı sanyn kóbeıtip, jeńiske jetti.

92 kelidegi Saǵyndyq Toǵambaı da fınalda álem chempıony, Tokıo Olımpıadasynyń qola júldegeri Loren Alfonso Domıngesti jeńdi. Qazaq boksshysy kýbalyq bylǵary qolǵap ıesine  esh múmkindik bermedi.  Kýbalyq qabylan qazaq boksshysynyń jeńisin moıyndady.

Kúmis júldeni Temirtas Júsipov (48 kg), Tımýr Qabdeshev (54 kg) ıelendi.

Osy jarysqa barǵan «Sport juldyzdary» respýblıkalyq jýrnalynyń atqarýshy dırektory Bolatbek Saǵymbaevtyń aıtýynsha, fınalda óner kórsetken Temirtas Júsipov pen Tımýr Qabdeshev jeńilgen joq edi. Alaıda tóreshiler sheshimi basqa boldy.

86 kg salmaqtaǵy Bekzat Tańatar qola medalge ıe boldy.

Qazaqstan atynan halyqaralyq dárejedegi AIBA tóreshisi Álisher Altaev ádilqazylyq etti.

Dastan KENJALIN,

ASTANA