ەلىمىزدە 15 مىڭ جاتتىقتىرۋشى-وقىتۋشى جۇمىس ىستەپ جاتىر

تۋريزم جانە سپورت مينيسترلىگى ەلىمىزدە جۇمىس ىستەپ جاتقان دەنە شىنىقتىرۋ قىزمەتكەرى مەن جاتتىقتىرۋشى-وقىتۋشىلاردىڭ سانىن جاريالادى.

ۆەدومستۆونىڭ حابارلاۋىنشا، دەنە شىنىقتىرۋ جانە سپورت ساباقتارىن 67 755 شتاتتىق قىزمەتكەر وتكىزەدى. بۇل – 2022 جىلمەن سالىستىرعاندا 1 433 ادامعا كوپ.

اۋىلدىق جەرلەردە 31 329 دەنە شىنىقتىرۋ قىزمەتكەرى جۇمىس ىستەيدى. بىلتىر 29 796 ادام تىركەلگەن.

بۇعان دەيىنگى ەسەپتى كەزەڭدەگى دەرەكتەرگە سايكەس، كەي وڭىرلەردە شتاتتىق قىزمەتكەرلەردىڭ كوبەيگەنى بايقالادى. دەنە شىنىقتىرۋ سالاسىنىڭ شتاتتىق قىزمەتكەرلەرىنىڭ سانى ارتۋى بويىنشا الماتى (+595)، اتىراۋ (+222)، جەتىسۋ (+129) جانە پاۆلودار وبلىستارى (+112) كوش باستاپ كەلەدى.

ەلىمىز بويىنشا 10 مىڭنان اسا جالپى ءبىلىم بەرۋ ۇيىمدارى بار. وندا 32 مىڭنان استام دەنە شىنىقتىرۋ سالاسىنىڭ وقىتۋشى-مۇعالىمدەرى ەڭبەك ەتەدى. ونىڭ ىشىندە اۋىلدى جەرلەردە 19 مىڭنان استام ادام جۇمىس ىستەيدى.

بۇدان بولەك، ءبىلىم بەرۋ جانە سپورت مەكەمەلەرىندە سپورت باعىتىن دامىتۋ ءۇشىن 15 مىڭنان اسا جاتتىقتىرۋشى-وقىتۋشى جۇمىس ىستەيدى. ونىڭ ىشىندە اۋىلدا 5 مىڭنان اسا جاتتىقتىرۋشى شاكىرتتەرىن تاربيەلەۋگە، وقىتۋعا جانە شەبەرلىكتەرىن شىڭداۋعا، فۋنكتسيونالدىق مۇمكىندىكتەرىن دامىتۋعا باعىتتالعان وقۋ-جاتتىعۋ جۇمىسىن جۇرگىزىپ، سپورتشىلاردى جاڭا جەتىستىكتەرگە جەتۋگە ىنتالاندىرادى.

سونىمەن قاتار بۇعان دەيىنگى ەسەپتى كەزەڭمەن سالىستىرعاندا جاتتىقتىرۋشى-وقىتۋشىلار سانى 321 ادامعا ارتقان. 2023 جىلى 13 وڭىردە وڭ ديناميكا تىركەلگەن. اتاپ ايتقاندا، ەڭ ۇلكەن ءوسىم الماتى (+318)، اتىراۋ (+142) جانە جەتىسۋ وبلىستارىندا (+122) بايقالادى.

تۋريزم جانە سپورت ءمينيسترىنىڭ ورىنباسارى سەرىك جاراسباەۆتىڭ ايتۋىنشا، قازىرگى قوعامدا بۇقارالىق سپورتتى دامىتۋ باستى مىندەتتەردىڭ ءبىرى. دەنى ساۋ ۇلتتى قالىپتاستىرۋ ءۇشىن سپورت ينفراقۇرىلىمىن دامىتىپ قانا قويماي، دەنە شىنىقتىرۋ جانە سپورت سالاسىنىڭ قىزمەتكەرلەرىن كادرلىق رەسۋرستارمەن قامتاماسىز ەتۋ ارقىلى سپورتتىڭ قولجەتىمدىلىگىن ارتتىرۋ قاجەت. جوعارى جەتىستىكتەر سپورتىنىڭ بارلىق ناتيجەسى بۇقارالىق جانە بالالار سپورتىنىڭ دامۋىنا تىكەلەي بايلانىستى. مينيسترلىك دەنە شىنىقتىرۋدى ناسيحاتتاۋ، سونداي-اق سپورتتىڭ قولجەتىمدىلىگىن ارتتىرۋ بويىنشا ۇلكەن جۇمىس اتقارىپ كەلەدى. جاقىن ارادا بۇل جۇمىس قارقىندى تۇردە جالعاساتىن بولادى.