SportPress.kz Qazaqstan sport jańalyqtary
Týrızm jáne sport mınıstrligi elimizde jumys istep jatqan dene shynyqtyrý qyzmetkeri men jattyqtyrýshy-oqytýshylardyń sanyn jarııalady.
Vedomstvonyń habarlaýynsha, dene shynyqtyrý jáne sport sabaqtaryn 67 755 shtattyq qyzmetker ótkizedi. Bul – 2022 jylmen salystyrǵanda 1 433 adamǵa kóp.
Aýyldyq jerlerde 31 329 dene shynyqtyrý qyzmetkeri jumys isteıdi. Byltyr 29 796 adam tirkelgen.
Buǵan deıingi esepti kezeńdegi derekterge sáıkes, keı óńirlerde shtattyq qyzmetkerlerdiń kóbeıgeni baıqalady. Dene shynyqtyrý salasynyń shtattyq qyzmetkerleriniń sany artýy boıynsha Almaty (+595), Atyraý (+222), Jetisý (+129) jáne Pavlodar oblystary (+112) kósh bastap keledi.
Elimiz boıynsha 10 myńnan asa jalpy bilim berý uıymdary bar. Onda 32 myńnan astam dene shynyqtyrý salasynyń oqytýshy-muǵalimderi eńbek etedi. Onyń ishinde aýyldy jerlerde 19 myńnan astam adam jumys isteıdi.
Budan bólek, bilim berý jáne sport mekemelerinde sport baǵytyn damytý úshin 15 myńnan asa jattyqtyrýshy-oqytýshy jumys isteıdi. Onyń ishinde aýylda 5 myńnan asa jattyqtyrýshy shákirtterin tárbıeleýge, oqytýǵa jáne sheberlikterin shyńdaýǵa, fýnkıonaldyq múmkindikterin damytýǵa baǵyttalǵan oqý-jattyǵý jumysyn júrgizip, sportshylardy jańa jetistikterge jetýge yntalandyrady.
Sonymen qatar buǵan deıingi esepti kezeńmen salystyrǵanda jattyqtyrýshy-oqytýshylar sany 321 adamǵa artqan. 2023 jyly 13 óńirde oń dınamıka tirkelgen. Atap aıtqanda, eń úlken ósim Almaty (+318), Atyraý (+142) jáne Jetisý oblystarynda (+122) baıqalady.
Týrızm jáne sport mınıstriniń orynbasary Serik Jarasbaevtyń aıtýynsha, qazirgi qoǵamda buqaralyq sportty damytý basty mindetterdiń biri. Deni saý ultty qalyptastyrý úshin sport ınfraqurylymyn damytyp qana qoımaı, dene shynyqtyrý jáne sport salasynyń qyzmetkerlerin kadrlyq resýrstarmen qamtamasyz etý arqyly sporttyń qoljetimdiligin arttyrý qajet. Joǵary jetistikter sportynyń barlyq nátıjesi buqaralyq jáne balalar sportynyń damýyna tikeleı baılanysty. Mınıstrlik dene shynyqtyrýdy nasıhattaý, sondaı-aq sporttyń qoljetimdiligin arttyrý boıynsha úlken jumys atqaryp keledi. Jaqyn arada bul jumys qarqyndy túrde jalǵasatyn bolady.
