ماگومەد اديەۆ — «احمات» فۋتبول كلۋبىنىڭ باس جاتتىقتىرۋشىسى

فۋتبولدان ەرلەر اراسىنداعى قازاقستان ۇلتتىق قۇراما كومانداسىنىڭ باس جاتتىقتىرۋشىسى ماگومەد اديەۆ رەسەيدىڭ شەشەن رەسپۋبليكاسىنىڭ استاناسى گروزنىي قالاسىنىڭ «احمات» كلۋبىنىڭ باس باپكەرى بولىپ تاعايىندالدى. ول احمات روماششەنكونى الماستىردى.

بۇل مالىمەت رەسەيلىك كلۋبتىڭ سايتىندا شىقتى.

بۇگىن، 5 ساۋىردە «احمات» فۋتبول كلۋبىنىڭ جالپىكوماندالىق جيىنى بولدى. وسى كەزدەسۋدە كلۋبتىڭ پرەزيدەنتى ماگومەد داۋدوۆ كوماندانىڭ جاڭا باس جاتتىقتىرۋشىسى – ماگومەد اديەۆتى تانىستىردى، — دەلىنگەن ماتەريالدا.

ماگومەد اديەۆ 1977 جىلى گروزنىي قالاسىندا تۋعان. ءار جىلدارى رەسەيدىڭ «ينگۋشەتيا»، «انجي»، تسسكا، «سوكول»، «سپارتاك-2» (ماسكەۋ)، «تەرەك»، «نيجني» نوۆگورود» كلۋبتارىندا ويناعان. ودان كەيىن استانانىڭ «جەڭىس» پەن ۋكراينانىڭ «كريۆباسس» كومانداسىندا دوپ تەۋىپ، 2010 جىلدان بەرى جاتتىقتىرۋشىلىق قىزمەتپەن اينالىسا باستادى.

ول قازاقستان قۇراماسىن 2022 جىلدان بەرى جاتتىقتىرىپ كەلەدى. ونىڭ جەتەكشىلىگىمەن ۇلتتىق قۇراما ەۋروپا چەمپيوناتىنا جولداما بەرەتىن ۇلتتار ليگاسىنىڭ پلەي-وفف كەزەڭىنە شىقتى.

«احمات» كلۋبى گروزنىي قالاسىنداعى «احمات ارەنا» ستاديونىندا وينايدى. كلۋبتىڭ ءوز اكادەمياسى بار. ول رامزان دەپ اتالادى.