Sparrıngtik týrnır: Dýlat Bekbaýov jańa salmaqta kelesi aınalymǵa shyqty

Búgin bokstan Astanada ótip jatqan sparrıngtik týrnır odan ári jalǵasty. Sharshy alańǵa birinshi bolyp  63,5 kelide Serik Temirjanov pen Dýlat Bekbaýovpen judyryqtasty.

Bul jekpe-jekke Dýlat Bekbaýov alǵash ret jańa salmaqta shyqty. Al Serik Temirjanov 2023 jyly Spartakıadada fınalǵa deıin jetip, Muhammedsabyr Bazarbaıulydan 1:4 esebimen jeńilgen edi.

Alǵashqy raýndta Serik Temirjanov ústem boldy. Ekinshi raýndta Dýlat Bekbaýov ózin jınap, taraz basyn teńestirdi.  Úshinshi raýnd alma-kezek shabýylmen ótti. Degenmen, tájirıbeli Bekbaýov jeńisti óz ýysynda saqtap qaldy.

Bul jekpe-jekte álem chempıonatynyń kúmis júldegerleri bokstasty. Serik Temirjanov – 2021 jyly Belgradta ótken álem chempıonatynda 57 kelide kúmis júlde alǵan.

Dýlat Bekbaýov byltyr Tashkentte ótken álem chempıonatynda 67 kelide kúmis medal ıelengen.

Qyzdardyń sparrıngtik jekpe-jegi de tartysty jáne qyzyqty boldy. Onda birinshi bolyp rıngke 54 keli salmaq dárejesindegi boksshylar Jaına Shekerbekova men Uljan Sársenbek kóterildi. Jartylaı fınalda ekeýi de aıanyp qalǵan joq. Degenmen tóreshiler sheshimimen fınalǵa Uljan Sársenbek shyqty.

Osy salmaqtaǵy jartylaı fınalda Symbat Álıasqar Ánel Saqyshpen judyryqtasty.

Symbat birinshi raýndta jeńilip jatyp, qalǵan raýndtarda qolynyń uzyndyǵyn paıdalanyp, jeńdi.

Endi Symbat Álıasqar fınalda jastar arasyndaǵy álem chempıony Uljan Sársenbekpen kezdesedi.

66 keli salmaqta Azııa oıyndarynyń qola júldegeri Natalıa Bogdanova tájirıbeli Mılana Safronovany jeńdi.

32 jastaǵy Safronova álem chempıonatynyń qola júldegeri atanǵanyna qaramastan, jas ári baby men baǵy kelisken Bogdanovaǵa qarsylyq kórsete almady.

Natalıa Bogdanova erteń fınaldyq jekpe-jekte óner kórsetedi.

Dastan KENJALIN,

ASTANA