پرەمەر ليگا: «اقتوبە» «قايراتتى» توعىز جىلدان كەيىن ءبىر-اق جەڭدى

20 ءساۋىردە باستاۋ العان فۋتبولدان قازاقستان پرەمەر-ليگاسىنىڭ 5-تۋرى ءوز مارەسىنە جەتتى. قىزىققا تولى بولعان بۇل تۋردا فاۆوريت كوماندالار ءوز ارا باق سىنادى. Sportpress.kz سايتى قىسقاشا شولۋ جاساپ شىقتى. 

«قايسار» — «اتىراۋ» 1:1

5-تۋردىڭ العاشقى ويىنى قىزىلوردادان باستالدى. ماتچتىڭ ءفاۆوريتى بولعان «اتىراۋ» بۇل جولى باسقا ويىن ورنەگىن كورسەتتى. العاشقى گول ەكىنشى تايمنىڭ 53-مينۋتىندا سوعىلدى.

گولدىڭ اۆتورى «اتىراۋ» قورعاۋشىسى پەدرو ەۋجەنيۋ چەمپيوناتتاعى ءۇشىنشى گولىن سوقتى. ال 74-مينۋتتا «قايسار» كومانداسىنىڭ جارتىلاي قورعاۋشىسى ۆالەري گرومىكو چەمپيوناتتاعى العاشقى گولىن سالىپ، ەسەپتى تەڭەستىردى. ماتچتىڭ 86-مينۋتىندا «اتىراۋلىق» يگور ساتاسەۆيچ قىزىل قاعازبەن جازالانىپ، ويىننان شەتتەتىلدى. وسىلايشا كۋمىكوۆ شاكىرتتەرى چەمپيوناتتاعى العاشقى ۇپايلارىن ەنشىلەدى.

«جەڭىس» — «تۇران» 1:0

«جەڭىستىڭ» كۇماندى جەڭىسى. قاراعاندى دا وتكەن بۇل ويىن دا گولدار سانى از بولسا دا، تارتىسقا تولى بولدى. العاشقى تايمنىڭ 29-مينۋتىندا «تۇران» ساپىنداعى فەدي بەن چۋگ گول سالعان ەدى. بىراق تورەشى VAR تەكسەرە كەلە ويىنشىنىڭ وففسايدتا قالعانىن ايتىپ، گولدى ەسەپكە الماي قويدى. «سەن سوقپاساڭ، مەن سوعامىن» دەپ، «جەڭىس» ويىنشىسى دەنيس گرەچيحو ماتچتىڭ 38-مينۋتىندا ەسەپ اشىپ، كومانداسىن العا شىعاردى. قاراعاندىداعى تارتىستى ويىن وسىلايشا الاڭ يەلەرىنىڭ پايداسىنا شەشىلدى.

«ورداباسى» — «قىزىلجار» 1:1

تۋردىڭ قىزىقتى ماتچتارىنىڭ ءبىرى شىمكەنتتە بولدى. ويىن باستالا سالىسىمەن فاۆوريتتەرگە قارسى دەس بەرمەي وينايتىن «قىزىلجار» تىزگىندى وزىنە الىپ، بىرنەشە رەت شايزادانىڭ قاقپاسىنا قاۋىپ ءتوندىردى.

ويىننىڭ نەگىزگى ۋاقىتىنا ءۇش مينۋت قوسىلعان ساتتە كوماندا كاپيتانى ەۆگەني بەرەزكين گول سالىپ، كوماندانى العا سۇيرەدى.

ەكىنشى تايم باستالا سالىسىمەن 52-مينۋتتا بۇرىشتامادان اسحات تاعىبەرگەننىڭ اسىرعان پاسىن سەرگەي مالىي بويشاڭدىعىن پايدالانىپ گول سوقتى. ال 65-مينۋتتا «قىزىلجاردىڭ» پورتۋگالدىق ويىنشىسى رۋبەن بريجيدۋ بۇرىشتامادان دوپتى تورعا توعىتىپ ەدى، تورەشى ەسەپكە المادى. ءبىر قىزىعى ويىنداعى بارلىق گول بۇرىشتامادان سوعىلدى.

اليەۆ شاكىرتتەرى وسىلايشا تاڭعالدىرۋدى جالعاستىرۋدا.

«قايرات» — «اقتوبە» 1:3

قىزىققا تولى ءارى وسى تۋردىڭ ورتالىق ويىنى الماتىدا بولدى. ماتچتىڭ الدىندا «قايرات» فۋتبول كلۋبى 70 جىلدىقتارىن اتاپ ءوتتى. سونىمەن قاتار كورەرمەن جيناۋ بويىنشا وسى ماۋسىمداعى رەكوردتى جاڭارتتى. بۇل ويىندى تاماشالاۋعا 23 804 جانكۇيەر جينالعان.

ال ويىنعا كەلەر بولساق، «اقتوبە» كومانداسى ماتچ باستاۋ الىسىمەن «قايرات» قورعاۋشىلارىن ءبىراز ابىگەرگە سالدى. 40-مينۋتتا «قايرات» قورعاۋشىلارىنىڭ ءبىرى قولمەن ويناپ، قاقپاعا پەنالتي بەلگىلەندى. ون ءبىر مەترلىك ايىپ دوپتى «اقتوبە» ساپىنان الىبەك قاسىم تەۋىپ، ەسەپ اشتى.

ايتا كەتەيىك، الىبەك قاسىم «جەتىسۋمەن» (1:0) بولعان ويىننان كەيىن، «بارلىق گولداردى «قايراتقا» قالدىردىق» دەپ سۇحبات بەرگەن بولاتىن. ال 68-مينۋتتا اقتوبەلىك ماكسيم سامورودوۆ گول سالىپ، ەسەپتى ەسەلەدى. وسى ساتتەن كەيىن الماتىلىق ۇجىم قۇرامعا وزگەرىس ەنگىزىپ، ويىنشىلاردى الماستىردى.

92-مينۋتتا دميتري بەسسمەرتنىي اسىرعان پاستى ماكسيم سامورودوۆ تاعى دا ءساتتى پايدالانىپ، دۋبل اۆتورى اتاندى. ويىننىڭ سوڭعى مينۋتىندا «قايرات»شابۋىلشىسى ۆياچەسلاۆ شۆىرەۆ گول سوعىپ، ەسەپ ايىرماسىن قىسقارتتى. وسىلايشا «اقتوبە» سىرت الاڭدا «قايراتتى» 9-جىلدان كەيىن ءبىر-اق جەڭدى.

«استانا» — «توبىل» 2:2

تۋردىڭ تاعى ءبىر ماڭىزدى ماتچى الماتى دا بولدى. قوس كوماندا تاراپىنان بىرنەشە قاۋىپتى شابۋىلدار بولىپ، سۇراپىل ويىن كورسەتتى. ماتچ باستالا سالىسىمەن 13-مينۋتتا «توبىل» قورعاۋشىسى پاپ-اليۋن نديايە قاقپانى ءدال كوزدەپ، ەسەپ اشتى.

ماتچتىڭ 27-مينۋتىندا مارين توماسوۆ «استانا» ساپىنداعى ءجۇزىنشى گولىن سوعىپ، ەسەپتى تەڭەستىردى.

ەكىنشى تايمنىڭ سوڭىنا قاراي كوماندالاردىڭ شابۋىلى ودان ءارى كۇشەيە ءتۇستى. 78-مينۋتتا قوستانايلىق كوماندانىڭ شابۋىلشىسى داۆيد ەنەن ەسەپتى 1:2-گە جەتكىزدى. ال 93-مينۋتتا «استانا» كلۋبىنىڭ شابۋىلشىسى ستانيسلاۆ باسمانوۆ ەسەپتى تەڭەستىردى. سونىمەن قاتار، سوڭعى مينۋتتا «توبىل» ويىنشىسى رۋسلان ءۆاليۋلليننىڭ گولىن تورەشى ەسەپكە المادى. قوس كوماندا ءبىر-ءبىر ۇپايدان ەنشىلەپ، جەڭىمپازدى انىقتاي المادى.

«جەتىسۋ» — «شاحتەر» 1:0

تالدىقورعاندا «جەتىۋ» قاراعاندى كومانداسىنا قاراعاندا جاقسى وينادى. ماچتىڭ ءبىرىنشى تايمىنىڭ 48-مينۋتىندا سەرىكجان مۇجىقوۆ پەنالتيدەن ەسەپ اشتى.

قوس كوماندا تاراپىنان وزگە گولداردى كورە المادىق. جالپى، «شاحتەر» كومانداسىن اندرەي فينونچەنكو ءوز تىزگىنىنە العالى بەرى، ويىن جاعىنان ۇلكەن وزگەرىستەر بار. قاراعاندىلىقتار بۇل ويىندا جەڭىلسە دە، تاماشا ويىن ورنەگىن كورسەتتى.

5-تۋر ويىندارىنان كەيىن تۋرنيرلىك كەستە مىناداي:

1.  « اقتوبە» — 10 ۇپاي
2.  «قىزىلجار» — 8
3.  «ورداباسى» — 8
4.  «توبىل» — 8
5.  «قايرات» — 8
6.  «استانا» — 7
7.  «ەلىماي» -7
8. «جەتىسۋ» — 7
9.  «جەڭىس» — 6
10.  «اتىراۋ» — 4
11.  «تۇران» — 4
12.  «شاحتەر» — 3
13.  «قايسار» — 1

(ۇ-ۇپاي)

 

اينات قابيدۋللاەۆ،

استانا