Premer lıga: «Aqtóbe» «Qaıratty» toǵyz jyldan keıin bir-aq jeńdi

20 sáýirde bastaý alǵan fýtboldan Qazaqstan Premer-lıgasynyń 5-týry óz máresine jetti. Qyzyqqa toly bolǵan bul týrda favorıt komandalar óz ara baq synady. Sportpress.kz saıty qysqasha sholý jasap shyqty. 

«Qaısar» — «Atyraý» 1:1

5-týrdyń alǵashqy oıyny Qyzylordadan bastaldy. Matchtyń favorıti bolǵan «Atyraý» bul joly basqa oıyn órnegin kórsetti. Alǵashqy gol ekinshi taımnyń 53-mınýtynda soǵyldy.

Goldyń avtory «Atyraý» qorǵaýshysy Pedro Eýjenıý chempıonattaǵy úshinshi golyn soqty. Al 74-mınýtta «Qaısar» komandasynyń jartylaı qorǵaýshysy Valerıı Gromyko chempıonattaǵy alǵashqy golyn salyp, esepti teńestirdi. Matchtyń 86-mınýtynda «Atyraýlyq» Igor Satasevıch qyzyl qaǵazben jazalanyp, oıynnan shettetildi. Osylaısha Kýmykov shákirtteri chempıonattaǵy alǵashqy upaılaryn enshiledi.

«Jeńis» — «Turan» 1:0

«Jeńistiń» kúmándi jeńisi. Qaraǵandy da ótken bul oıyn da goldar sany az bolsa da, tartysqa toly boldy. Alǵashqy taımnyń 29-mınýtynda «Turan» sapyndaǵy Fedı Ben Chýg gol salǵan edi. Biraq tóreshi VAR teksere kele oıynshynyń offsaıdta qalǵanyn aıtyp, goldy esepke almaı qoıdy. «Sen soqpasań, men soǵamyn» dep, «Jeńis» oıynshysy Denıs Grechıho matchtyń 38-mınýtynda esep ashyp, komandasyn alǵa shyǵardy. Qaraǵandydaǵy tartysty oıyn osylaısha alań ıeleriniń paıdasyna sheshildi.

«Ordabasy» — «Qyzyljar» 1:1

Týrdyń qyzyqty matchtarynyń biri Shymkentte boldy. Oıyn bastala salysymen favorıtterge qarsy des bermeı oınaıtyn «Qyzyljar» tizgindi ózine alyp, birneshe ret Shaızadanyń qaqpasyna qaýip tóndirdi.

Oıynnyń negizgi ýaqytyna úsh mınýt qosylǵan sátte komanda kapıtany Evgenıı Berezkın gol salyp, komandany alǵa súıredi.

Ekinshi taım bastala salysymen 52-mınýtta buryshtamadan Ashat Taǵybergenniń asyrǵan pasyn Sergeı Malyı boıshańdyǵyn paıdalanyp gol soqty. Al 65-mınýtta «Qyzyljardyń» portýgaldyq oıynshysy Rýben Brıjıdý buryshtamadan dopty torǵa toǵytyp edi, tóreshi esepke almady. Bir qyzyǵy oıyndaǵy barlyq gol buryshtamadan soǵyldy.

Alıev shákirtteri osylaısha tańǵaldyrýdy jalǵastyrýda.

«Qaırat» — «Aqtóbe» 1:3

Qyzyqqa toly ári osy týrdyń ortalyq oıyny Almatyda boldy. Matchtyń aldynda «Qaırat» fýtbol klýby 70 jyldyqtaryn atap ótti. Sonymen qatar kórermen jınaý boıynsha osy maýsymdaǵy rekordty jańartty. Bul oıyndy tamashalaýǵa 23 804 jankúıer jınalǵan.

Al oıynǵa keler bolsaq, «Aqtóbe» komandasy match bastaý alysymen «Qaırat» qorǵaýshylaryn biraz ábigerge saldy. 40-mınýtta «Qaırat» qorǵaýshylarynyń biri qolmen oınap, qaqpaǵa penaltı belgilendi. On bir metrlik aıyp dopty «Aqtóbe» sapynan Álibek Qasym teýip, esep ashty.

Aıta keteıik, Álibek Qasym «Jetisýmen» (1:0) bolǵan oıynnan keıin, «barlyq goldardy «Qaıratqa» qaldyrdyq» dep suhbat bergen bolatyn. Al 68-mınýtta aqtóbelik Maksım Samorodov gol salyp, esepti eseledi. Osy sátten keıin almatylyq ujym quramǵa ózgeris engizip, oıynshylardy almastyrdy.

92-mınýtta Dmıtrıı Bessmertnyı asyrǵan pasty Maksım Samorodov taǵy da sátti paıdalanyp, dýbl avtory atandy. Oıynnyń sońǵy mınýtynda «Qaırat»shabýylshysy Vıacheslav Shvyrev gol soǵyp, esep aıyrmasyn qysqartty. Osylaısha «Aqtóbe» syrt alańda «Qaıratty» 9-jyldan keıin bir-aq jeńdi.

«Astana» — «Tobyl» 2:2

Týrdyń taǵy bir mańyzdy matchy Almaty da boldy. Qos komanda tarapynan birneshe qaýipti shabýyldar bolyp, surapyl oıyn kórsetti. Match bastala salysymen 13-mınýtta «Tobyl» qorǵaýshysy Pap-Alıýn Ndıaıe qaqpany dál kózdep, esep ashty.

Matchtyń 27-mınýtynda Marın Tomasov «Astana» sapyndaǵy júzinshi golyn soǵyp, esepti teńestirdi.

Ekinshi taımnyń sońyna qaraı komandalardyń shabýyly odan ári kúsheıe tústi. 78-mınýtta Qostanaılyq komandanyń shabýylshysy Davıd Enen esepti 1:2-ge jetkizdi. Al 93-mınýtta «Astana» klýbynyń shabýylshysy Stanıslav Basmanov esepti teńestirdi. Sonymen qatar, sońǵy mınýtta «Tobyl» oıynshysy Rýslan Valıýllınniń golyn tóreshi esepke almady. Qos komanda bir-bir upaıdan enshilep, jeńimpazdy anyqtaı almady.

«Jetisý» — «Shahter» 1:0

Taldyqorǵanda «Jetiý» Qaraǵandy komandasyna qaraǵanda jaqsy oınady. Machtyń birinshi taımynyń 48-mınýtynda Serikjan Mujyqov penaltıden esep ashty.

Qos komanda tarapynan ózge goldardy kóre almadyq. Jalpy, «Shahter» komandasyn Andreı Fınonchenko óz tizginine alǵaly beri, oıyn jaǵynan úlken ózgerister bar. Qaraǵandylyqtar bul oıynda jeńilse de, tamasha oıyn órnegin kórsetti.

5-týr oıyndarynan keıin týrnırlik keste mynadaı:

1.  « Aqtóbe» — 10 upaı
2.  «Qyzyljar» — 8
3.  «Ordabasy» — 8
4.  «Tobyl» — 8
5.  «Qaırat» — 8
6.  «Astana» — 7
7.  «Elimaı» -7
8. «Jetisý» — 7
9.  «Jeńis» — 6
10.  «Atyraý» — 4
11.  «Turan» — 4
12.  «Shahter» — 3
13.  «Qaısar» — 1

(U-upaı)

 

Aınat QABIDÝLLAEV,

ASTANA