«قازاق كۇرەسىنىڭ قارا نارلارى» (فوتو)

اقىن ورداباي ۇلىنىڭ كەزەكتى جاڭا كىتابى وقىرمانعا جول تارتتى

2024 جىلدىڭ 27 ءساۋىر كۇنى اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ ءماجىلىس زالىندا بەلگىلى سپورت ءجۋرناليسى، قازاقستان جۋرناليستەر وداعىنىڭ مۇشەسى، س.بەردىقۇلوۆ اتىنداعى سىيلىقتىڭ لاۋرەاتى، جەلتوقسان كوتەرىلىسىنىڭ ارداگەرى، «قازاق كۇرەسىنە ەڭبەگى سىڭگەن» وردەنىنىڭ جۋرناليستەر اراسىنداعى تۇڭعىش يەگەرى  اقىن ورداباي ۇلىنىڭ «قازاق كۇرەسىنىڭ قارا نارلارى» اتتى كىتابىنىڭ تۇساۋكەسەر تانىستىرىلىمى ءوتتى.

ءىس-شاراعا قازاق كۇرەسىنىڭ مايتالماندارى، ەلىمىزگە بەلگىلى باپكەرلەر، ۇلتتىق سپورتتىڭ جاناشىرلارى، زيالى قاۋىم وكىلدەرى، بۇقارالىق اقپارات قۇرالدارىنىڭ وكىلدەرى مەن جاستار قاۋىمى، استانا، اتىراۋ، اقتوبە، قىزىلوردا قالالارىنان ارنايى كەلگەن قۇرمەتتى مەيماندار قاتىستى.

تۇساۋكەسەر ءراسىمىنىڭ قۇتتىقتاۋ سوزىندە «قازاق كۇرەسى» فەدەراتسياسىنىڭ تۇڭعىش پرەزيدەنتى، قازاقستان رەسپۋبليكاسىنا ەڭبەگى سىڭگەن بالۋان، پروفەسسور ەرعالي مۇحيتدينوۆ بۇل كۇندى – قازاق سپورتى، قازاق كۇرەسى ءۇشىن اق تۇيەنىڭ قارنى جارىلعان كۇن دەپ باعالادى.

– وزدەرىڭىزگە بەلگىلى، تالاي ءىرى-ءىرى جارىستاردا، الەم چەمپيوناتىندا وزىمىزبەن بىرگە جۇرگەن بەلگىلى جازۋشى، سەيداحمەت بەردىقۇلوۆ اتىنداعى سىيلىقتىڭ لاۋرەاتى، قازاق سپورتىنىڭ جاناشىرى اقىن ورداباي ۇلىنىڭ «قازاق كۇرەسىنىڭ قارا نارلارى» اتتى كىتابىنىڭ تۇساۋكەسەرى بولىپ وتىر. بۇل كىتاپتىڭ قازاق كۇرەسى تۋرالى باسقا كىتاپتارعا قاراعاندا ايىرماشىلىعى – قازاق كۇرەسىنىڭ بۇگىنى مەن ەرتەڭى جايلى جازىلىپ وتىر. بايراقتى باسەكەلەردە توپ جارىپ جۇرگەن بالۋانداردى باپتايتىن باپكەرلەرى تۋرالى جازىلا بەرمەيتىنى بەلگىلى. اقىن ورداباي ۇلى باپكەرلەر جونىندە كوپ جازدى. وزدەرىڭىز جاقسى بىلەسىزدەر، قازىرگى كەزدە جوعارى وقۋ ورىندارىندا قازاق توپتارى وتە كوپ. بىراق، وقيتىن كىتاپ جوق. ماگيستراتۋرادا، دوكتورانتۋرادا عىلىمي ەڭبەكتەر جازىلىپ جاتىر، ال بۇل كىتاپ سونداي عىلىمي ەڭبەكتەرگە پايدالى ماعلۇمات بەرەتىن قۇندى ەڭبەك بولادى دەپ ويلايمىن. قازاق كۇرەسى تۋرالى جازىپ جۇرگەن جۋرناليستەر بار، بارشىلىق، قۇدايعا شۇكىر. بىراق تا، قامشى سالدىرماي، قازاق كۇرەسىنىڭ دامۋىنا ۇلەس قوسىپ جۇرگەن اقىن ورداباي ۇلىنا مىڭ دا ءبىر العىس، – دەدى.

كەزىندە دۇنيەجۇزىلىك قازاق كۇرەسى فەدەراتسياسىنىڭ باس حاتشىسى بولىپ قىزمەت اتقارعان، قازاقستان رەسپۋبليكاسىنا ەڭبەگى سىڭگەن جاتتىقتىرۋشى، عالىم قۇلەكەشەۆ ءوز سوزىندە اقىن ورداباي ۇلىن جارىق كورىپ وتىرعان كىتابىمەن قۇتتىقتاپ، اۆتوردىڭ قازاق كۇرەسىن ناسيحاتتاۋداعى ەرەن ەڭبەگىنە توقتالدى.

كىتاپتىڭ تۇساۋكەسەر لەنتاسىن ەرعالي مۇحيتدينوۆ پەن عالىم قۇلەكەشەۆ قيدى.

رەسپۋبليكالىق «جەلتوقسان اقيقاتى» قوعامدىق بىرلەستىگىنىڭ توراعاسى بولات قۇرىمباەۆ قۇتتىقتاۋ سوزىندە جيناقتىڭ ۇلتتىق سپورتىمىزدى ناسيحاتتاۋداعى ءمان-ماڭىزىنا توقتالىپ، اۆتورعا وسىناۋ قاجىرلى ەڭبەگى ءۇشىن زور العىسىن جەتكىزە وتىرىپ، قوعامدىق بىرلەستىك اتىنان كەۋدەسىنە «ۇلت پاتريوتى» دەگەن وردەندى تاقتى.

كىتاپقا 21 باپكەردىڭ ەسىمدەرى ەنگەن. القالى جيىنعا سولاردىڭ ىشىنەن –عالىم قۇلەكەشەۆ، قاپار راۋانوۆ، وتەباي بىتىكوۆ، بەلاي راحىمباەۆ، ءابدىساتتار سادىقوۆ، ەسەنقوس زۇلحانوۆ، قۋانجان قۇلپەيىسوۆتەر قاتىستى. بارلىعى دا ءبىراۋىزدان اقىن ورداباي ۇلىنىڭ كىتابىنا وڭ بولسىن ايتىپ، بۇل جيناق ستۋدەنت جاستاردىڭ وقۋ قۇرالىنا اينالىپ، قازاق كۇرەسىنىڭ جاس باپكەرلەرى ۇلتتىق سپورتتىڭ دامۋ كوكجيەگىنەن كەڭ ارنالى ماعلۇمات بەرەتىن، ەستە قالاتىنداي دۇنيە بولارىنا سەنىم ءبىلدىردى.

جيىندا اباي اتىنداعى قازۇپۋ-دىڭ ونەر، مادەنيەت جانە سپورت ينستيتۋتى دەنەشىنىقتىرۋ جانە سپورت كافەدراسىنىڭ دوتسەنتى، اقىن ورداباي ۇلىنا مەكتەپتە دەنەشىنىقتىرۋ پانىنەن ساباق بەرگەن العاشقى ۇستازى اسىلحان ابىشەۆ، اباي اتىنداعى قازۇپۋ ونەر، مادەنيەت جانە سپورت ينستيتۋتىنىڭ ديرەكتورى كارىم بايقۇتوۆ، «كيوكۋشينكاي كاراتە-دو» جاتتىقتىرۋشىسى، ازيا چەمپيونى، قازاقستاننىڭ بىرنەشە دۇركىن چەمپيونى اقمىرزا كەنجەباەۆ، «اقيقات» ۇلتتىق قوعامدىق-ساياسي جۋرنالىنىڭ باس رەداكتورى ءداۋىرجان تولەباەۆ «العىس حاتتارمەن» ماراپاتتالدى.

تۇساۋكەسەردىڭ قورىتىندى سوزىندە اقىن ورداباي ۇلى جينالعان قاۋىمعا، وسى ءىس-شارانىڭ وتكىزىلۋىنە قولداۋ كورسەتكەن اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ باسقارما توراعاسى  – رەكتورى بولات اناپيا ۇلى تىلەپ مىرزاعا زور العىسىن جەتكىزدى. جارىققا شىعىپ وتىرعان كىتابىندا قازاق كۇرەسى مەن كەشەگىسى مەن بۇگىنىن تۇگەندەپ جازعانىن، اتتارى ۇمىت قالعان ەسىمدەردى جاڭعىرتۋعا ءمان بەرگەنىن، كوپتەگەن تىڭ دەرەكتەردى قامتىعانىن اتاپ ءوتتى. مۇنداعى شەجىرەلىك دۇنيەلەر مەن دەرەكتەر سپورتسۇيەر قاۋىم ءۇشىن پايدالى بولادى دەگەن وي-پىكىرىن ورتاعا سالدى.

– جىلدار بويى تەر توگىپ، قانشاما مۇزبالاق، ءاپايتوس بالۋانداردى تاربيەلەپ شىعارىپ قانا قويماي، ەلىمىزدىڭ ءار وڭىرىندە قالىڭ ەلدىڭ قازاق كۇرەسىنە دەگەن سۇيىسپەنشىلىگىن ارتتىرىپ، وسى بەكزات ونەرىمىزدىڭ قىپ-سىرىن قالىڭ ەلگە بارىنشا كەمەل كورسەتىپ كەلگەن باپكەرلەردىڭ ەڭبەگىنە زور العىس ايتامىز. قازاق كۇرەسىنىڭ تاريحى تەرەڭدە جاتىر. دەسەك تە، سوڭعى 20-30 جىل ارالىعىندا ايلىعى شايلىعىنا جەتپەسە دە، اتا كۇرەسىمىزدەن بەرەكە تاۋىپ، بالالاردى جاتتىقتىرىپ، ۇلكەن الامانعا قوسىپ كەلگەن باپكەرلەردىڭ ەڭبەگى ادال، كوپكە ۇلگى. ولار ءوز ىسىنە جان-تانىمەن بەرىلگەن بىلىكتى ماماندار دەپ ايتامىز. سوندىقتان دا بۇل كىتاپتا 1990-2015 جىلدارى ارالىعىندا قازاق كۇرەسىندە ەسىل ەڭبەكتەرى ەش كەتپەگەن ارداگەر جاتتىقتىرۋشىلار مەن تورەشىلەر تۋرالى كەڭىنەن ايتىلادى. «ەلىڭ ەمىرەنسە – سەن تەبىرەن» دەمەكشى، ەل العىسىنا بولەنگەن باپكەرلەرگە دەگەن قۇرمەم-قوشەمەت ۇمىتىلماق ەمەس. باپكەرلەردى ۇلاعاتتى ۇستاز ءارى بوتا بالۋاننىڭ ەكىنشى اتا-اناسى دەپ بىلگەن ورىندى. ەندەشە، وقىرمانعا ۇسىنىلىپ وتىرعان بۇل كىتاپتا قازاق كۇرەسىنىڭ تاريحىنان از-كەم ءسوز قوزعالىپ، ءتول كۇرەسىمىزدىڭ ورلەۋ جىلدارىندا ەلگە ەڭبەگى سىڭگەن باپكەرلەرمەن بىرگە ۇلتتىق كۇرەسىمىزدى الەم ساحناسىنا الىپ شىققان ارداقتى جاندار تۋرالى ايتىلادى. قازاق كۇرەسى ول ۇلتتىق قۇندىلىعىمىزدىڭ بىرەگەي ءتۇرى. سوندىقتان دا ۇلتتىق كۇرەس جايىندا بىلگىسى كەلگەن وقىرمانعا بۇل كىتاپتىڭ بەرەرى كوپ، تانىمدىق جاعى باسىم دەپ بىلەمىز، – دەدى اقىن ورداباي ۇلى.

اۆتوردىڭ ايتۋىنشا، سوناۋ 2004 جىلى بەرليندە دۇنيەجۇزى قازاقتارىنىڭ قۇرىلتاي ءوتىپ، سول جەردە قازاق كۇرەسىنىڭ بولاشاعى جايلى ءسوز قوزعالىپ، دۇنيەجۇزىلىك «قازاق كۇرەسى» فەدەراتسياسى قۇرىلعان.

– ءبىزدىڭ جاس ۇرپاق قازاق كۇرەسى ءۇشىن قىسى-جازى ءۇي كورمەي، بالالاردى جاتتىقتىرىپ، جان اياماي تەر توككەن جاتتىقتىرۋشىلاردىڭ ەرەن ەڭبەگىن ەستەن ءبىر ءسات شىعارماۋى كەرەك. «ءبىر كىسى جاققان وتقا مىڭ كىسى جىلىنادى» دەگەن قازاق. باپكەرلەردىڭ سالعان سارا جولى – دارا جول. وتكەنگە قۇرمەت ەتپەي، جاڭا كۇن جاقسىلىعىن توگىپ بەرە سالمايدى. سوندىقتان دا قازاق كۇرەسىنىڭ وسى كۇنگى تولاعاي تابىستارى مەن الامان جارىستارداعى توپ جارىپ، ەل ماقتانىشىنا اينالعان بالۋاندارىمىزدىڭ بارلىعى دەرلىك كەشەگى كۇنگى بارىن سالىپ ەڭبەك ەتكەن باپكەرلەردىڭ ەڭبەگىنىڭ جەمىسى، – دەيدى اقىن ورداباي ۇلى.

القالى جيىننان سوڭ كىتاپتىڭ تۇساۋكەسەر قۇرمەتىنە وراي ۋنيۆەرسيتەتتىڭ مۇحتار اۋەزوۆ اتىنداعى سپورت زالىندا جۋرناليستەر اراسىندا شاعىن فۋتبولدان تۋرنير ۇيىمداستىرىلدى. تۋرنيرگە «قازاقستان ۇلتتىق تەلەارناسى»، «الماتى تەلەارناسى»، اباي اتىنداعى قازۇپۋ، «الاتاۋ-اقپارات»، «قازاق سپورتى» گازەتى، «قالامگەر» كوماندالارى قاتىسىپ، تارتىستى باسەكەنىڭ كورىگىن قىزدىردى. فۋتبول ءتۋرنيرىنىڭ باس تورەشىسى – اسىلحان ابىشەۆ بولدى.

ناتيجەسىندە «الاتاۋ-اقپارات» كومانداسى ءتۋرنيردىڭ ءبىرىنشى ورىنىن قانجىعالارىنا بايلاسا، ەكىنشى ورىندى – اباي اتىنداعى قازۇپۋ كومانداسى، ءۇشىنشى ورىندى – «قالامگەر» كومانداسى ەنشىلەدى. جۇلدەگەر كوماندالارعا سايىستىڭ كۋبوكتارى مەن باعالى سىيلىقتار تاپسىرىلدى. جەكەلەي اتالىمداردا ۇزدىك ونەر كورسەتكەن ويىنشىلارعا دا ماراپاتتار بەرىلدى.

***

كىتاپتىڭ مازمۇنى مەن قۇرىلىمى تۋرالى بىرەر ءسوز ايتا كەتەلىك.

«قازاق كۇرەسىنىڭ قارا نارلارى» كىتابى قازاقستان رەسپۋبليكاسىنىڭ ەڭبەك سىڭىرگەن قايراتكەرى، ەڭبەك سىڭىرگەن جاتتىقتىرۋشى، پروفەسسور سەرىك تۇكەەۆ كىتاپتىڭ العى سوزىمەن باستالادى. سەرىك ادامبولسىن ۇلى ءوز سوزىندە:  «قازىرگى كەزدە ءتول كۇرەسىمىز اياعىنان نىق تۇرىپ، الەم نازارى اۋا باستاعان بەلدى سپورت تۇرىنە اينالىپ كەلەدى. الەمنىڭ 5 قۇرلىعىندا 50-دەن اسا مەملەكەتتەردە ۇلتتىق كۇرەسىمىزدەن فەدەراتسيالار اشىلىپ، قارقىندى جۇمىس جاساپ كەلەدى. سونىمەن قاتار حالىقارالىق بىرىككەن كۇرەس تۇرلەرى فەدەراتسياسى UWW تولىقتاي مۇشە بولىپ كىردى…كەلەشەك ءۇشىن قازاق كۇرەسىنىڭ ورلەۋ جىلدارى، تاريحىمەن قاتار وعان زور ۇلەس قوسقان مايتالماندار تۋرالى وسى شىعارىلىپ وتورعان كىتاپتىڭ ماڭىزى ەرەكشە دەپ سانايمىن. جاس ۇرپاق اتا كۇرەسىمىزدىڭ تاريحى مەن ورلەۋ جىلدارىناد ولشەۋسىز ەڭبەك قوسقان قازاق كۇرەسىندەگى جاتتىقتىرۋشىلار مەن تورەشىلەردىڭ ەسىمدەرىن ءبىلىپ، ەڭبەگىن باعالاۋى كەرەك. قالىڭ وقىرمان قاۋىمعا جول تارتقان «قازاق كۇرەسىنىڭ قارا نارلارى» اتتى اقىن ورداباي ۇلىنىڭ كىتابى بولاشاق ءۇشىن ۇلكەن قازىنالى مۇرا. بارشا قازاقتىڭ ارمانى – اتا كۇرەسىمىزدى وليمپيادا ويىندارىنان كورۋ ەكەنى بەلگىلى. مەن الدىمەن قازاق كۇرەسىنىڭ جازعى ازيا ويىندارىنا كىرۋىن قالار ەدىم. ول كۇننىڭ دە اۋىلى الىس ەمەس دەپ ويلايمىن. «كوپ تەپكەن جەردەن كول شىعادى» دەمەكشى، اتا سپورتىمىزدى دارىپتەۋگە كوپ بولىپ كىرىسكەنىمىز ابزال. بولاشاقتا ءتول كۇرەسىمىزدەن توبەلى جەتىستىكتەر كۇتەمىز» دەگەن ويىن ءبىلدىرىپتى.

ەنتسيكلوپەديالىق جيناق «قازاق كۇرەسىنىڭ قىسقاشا تاريحى»، «اتا كۇرەسىمىزدىڭ الىپتارى»، «العاشۇقى چەمپيوناتتاردىڭ اپايتوستەرى»، «قازاق كۇرەسىنە ەڭبەگى سىڭگەن ارداقتى ارداگەرلەر»، «قازاق كۇرەسىنىڭ مايتالمان باپكەرلەرى»، «قازاق كۇرەسىنىڭ ورلەۋ جىلدارى»، «قازاق كۇرەسىنىڭ ورلەۋ جىلدارىنان فوتوكورىنىستەر»، «كەمەل كەلەشەك»، «الەمدىك دەڭگەيدەگى بايراقتى جارىستار»، «كورەگەن كىسى كورگەنىن ايتار» دەپ اتالاتىن بولىمدەردەن تۇرادى. اتا كۇرەسىمىزدىڭ الىپتارى – قاجىمۇقان مۇڭايتپاس ۇلى، نۇرماعانبەت بايمىرزا ۇلى (بالۋان شولاق)، بورانقۇل سادىر ۇلىنان باستاپ ەلىمىزدەگى العاشقى چەمپيوناتتاردىڭ اپايتوستەرى – س.اداسقانوۆ، ق.التىباساروۆ، ي.تۇمەنوۆ، ە.دوسقاليەۆ، ا.مۋسين، ق.بيباتىروۆ، ك.باكىجانوۆ، ءا.سالىمباەۆ جانە ت.ب. تۋرالى ماعلۇماتتار ۇسىنىلعان. اۆتور ءوز كىتابىندا 1938 جىلدان باستاپ 1972 جىلدار ارالىعىنداعى چەمپيوناتتارعا قاتىسىپ، جۇلدەلى ورىنداردان كورىنگەن بالۋانداردىڭ ەسىمدەرىن اتاي وتىرىپ، سول ارقىلى قازاق كۇرەسىنىڭ كەشەگى كەڭەس زامانىنداعى دامۋ ۇردىستەرىنەن دە پايدالى مالىمەتتەر كەلتىرگەن. تۋىندىنىڭ «قازاق كۇرەسىنە ەڭبەگى سىڭگەن ارداقتتى اعالار» بولىمىندە باۋىرجان جانالين، سەرىك تۇكەەۆ، مارات جاحيتوۆ، ديقانباي بيتكوزوۆ، ەرعالي مۇحيتدينوۆ، باقىت جاڭبىرباەۆ، ماركس قىزىكەنوۆ، ومار يساحانوۆ، اۋەلحان جاتقانباەۆتاردىڭ اتالعان سپورت ءتۇرىنىڭ دامۋىنا قوسقان سۇبەلى ۇلەستەرى بايان ەتىلگەن.

قازاق كۇرەسىنىڭ مايتالمان باپكەرلەرى: عالىم قۇلەكەشەۆ، قۋانىشبەك ناحانوۆ، الماس مۇسابەكوۆ، سەرىك قاپالباەۆ، قاپار راۋانوۆ، شىڭعىسبەك تۇرسىنوۆ، قۋاتبەك بايحوجاەۆ، وتەباي بىتىكوۆ، بەلاي راحىمباەۆ، ورىنباسار جولماعانبەتوۆ، ءابدىساتتار سادىقوۆ، ەسەنقوس زۇلحانوۆ، قايىربەك وڭداعانوۆ، اناس يسين، كەنجەباي ەلۋباي، قۋانجان قۇلپەيىسوۆ، رۋسلان ماحمۇت ۇلى مۇحامەدعاليەۆ، ەرلان يمانعاليەۆ، نۇرجان رىسكيەۆ، جۇماعان قاسىمحانوۆ، ادىلبەك سەرىكباەۆ، نۇرجان وتەنوۆ تۋرالى ماعلۇماتتار كەلتىرىلگەن.

جالپى، بۇل كىتاپتىڭ قازاق كۇرەسىنىڭ كەڭ كولەمدى ەنتسيكلوپەديالىق جيناعى دەپ ايتۋعا تولىق نەگىز بار. ويتكەنى، مۇندا قازاق كۇرەسىنىڭ دامۋ تاريحى سوناۋ ساق داۋىرىنەن باستاپ اقساق تەمىر كەزەڭىن قامتيدى. سونىمەن قاتار ۇلتتىق كۇرەسىمىزدىڭ ەرەكشەلىكتەرى، كورشى ەلدەردىڭ كۇرەسى (وزبەكشە «كۋرەش»، قىرعىزشا «كۇرەش»، ءازىربايجان مەن تۇرىكمەنشە «گۇلەشش»، تاتار باشقۇرتتاردا «كۇرياشش»، تاتارلاردا «بەلبەۋلى كۇرەس»)، قاريالار مەن ايەلدەر كۇرەسى، ءتول كۇرەسىمىزدىڭ تاريحي باستاۋ بۇلاعى تۋرالى ايتىلادى. باتىرلارىمىزدىڭ دا ۇلتتىق جەكپە-جەكتەن كۇرەسكەنى تارقاتىلادى.

قازاق كۇرەسىنىڭ دارابوزدارى رەتىندە – قاجىمۇقان مۇڭايتپاس ۇلى، بالۋان شولاق (نۇرماعانبەت بايمىرزا ۇلى)، بورانقۇل سادىر ۇلى، مولداباي توكە ۇلىنىڭ ەسىمدەرى اتالادى. قاراعاندى مەن قازالىادن شىققان باتىر بالۋاندار الىمشايقى سالىمباەۆ، بالۋان شەرىپباي تۋرالى دەرەكتەر ۇسىنىلعان. قازاق كۇرەسىنىڭ ورلەۋ جىلدارى كورسەتىلە وتىرىپ، اتالعان سپورت ءتۇرىنىڭ تاريحي تابىستارى، ءىىى دۇنيەجۇزىلىك كوشپەندىلەر ويىندارىنىڭ باعدارلماسىنا ەنگەنى، بەيجىڭدە كەڭسەسى اشىلعانى، قازاق كۇرەسىنەن ءبىرىنشى الەم چەمپيوناتى پەلەنىڭ وتانىندا وتكىزىلگەنى، قازاق كۇرەسى ارقىلى انا ءتىلىمىزدىڭ الەمگە قالاي دارىپتەلگەنى دە قىزىقتى دەرەكتەرمەن ورىلگەن.

«قازاق كۇرەسىنىڭ ورلەۋ جىلدارىنان فوتوكورىنىستەر» بولىمىندە ۇلتتىق سپورتىمىزدىڭ شەجىرەسىنەن سىر شەرتەتىن ايشىقتى فوتو تۋىندىلار ۇسىنىلعان. جالپى، كىتاپتاعى فوتوسۋرەتتەردىڭ اۆتورى، ارداگەر فوتوجۋرناليست قۋانتقان ساپاروۆتىڭ كۇرەس تاريحىن فوتودەرەكتەر رەتىندە قاتتاۋداعى ەڭبەگىن ەرەكشە اتاپ ايتۋعا تۇرارلىق.

اۆتور ا.ورداباي ۇلى قازاق كۇرەسىنىڭ جىلت ەتكەن جاعىمدى جاڭالىقتارىن قالت جىبەرمەي، كوزىنەن تاسا قىلماي، قويىن داپتەرىنە ءتۇرتىپ جۇرەتىنى بايقالادى. ءاربىر جەتىستىككە ءتول ونەرىمىزدىڭ كەزەكتى ءبىر اسۋى مەن بيىك بەلەسى رەتىندە زەر سالىپ، مارتەبەسى مەن تۇعىرىن كوتەرگەن جارىستار مەن سايىستاردى، ءارتۇرلى دارەجەدەگى چەمپيوناتتاردى، ءدۇبىرلى دودالاردى، الەمنىڭ باسقا مەملەكەتتەرىندەگى يگى جەتىستىكتەردى جىپكە تىزگەندەي ەتىپ، سۇيىنشىلەي جەتكىزىپ، قازا كۇرەسىنىڭ كيىم ۇلگىسىنە دەيىن بەيجاي قاراماي، ۇلكەن جاۋاپكەرشىلىكپەن جازىپ شىققانى اڭعارىلادى. ءيا، «ءجۇز رەت ەستىگەننەن ءبىر كورگەن ارتىق» دەگەندەي، اتالعان اۋقىمدى ەڭبەكتى، اۆتوردىڭ ۇزاق جىلدار بويى تالماي ىزدەنىپ، قاجىر-قايرات تانىتا وتىرىپ جازىپ شىققان كىتابىن – قازاق رۋحانياتى مەن مادەنيەتىنىڭ، ۇلتتىق سپورت ونەرىنىڭ قوماقتى قازىناسى دەپ باعالاۋعا ابدەن بولادى.

ايتا كەتەيىك، اتالعان ءىس-شاراعا «قازاقستان» ۇلتتىق ارناسى، «قازسپورت»، «قازاق راديوسى»، «الماتى» تەلەارناسى، «الماتى اقشامى»، «اقيقات»، «قازاقستان ءداۋىرى»، «قازاق ادەبيەتى»، «سپورت جۇلدىزدارى»، «قالا مەن دالا»، «قازاق سپورتى» باسىلىمدارى، «Sportpress» سايتى اقپاراتتىق قولداۋ كورسەتتى.

 

ءداۋىرجان تولەباەۆ،

الماتى