قفف ۋەفا-نىڭ فۋتبولعا باۋلۋ جوباسىندا ۇزدىك دەپ تانىلدى

ۋەفا-نىڭ شۆەيتساريانىڭ نون قالاسىنداعى شتاب-پاتەرىندە 2023/2024 جىلعى UEFA Grassroots Awards بۇقارالىق فۋتبول بويىنشا ماراپاتتاۋ ءراسىمى ءوتتى، دەپ حابارلادى قازاقستان فۋتبول فەدەراتسياسى.

راسىمدە بىلتىر قازاقستان فۋتبول فەدەراتسياسىنىڭ وتكىزگەن «بالالار ءۇيى تاربيەلەنۋشىلەرى اراسىنداعى فۋتبول فەستيۆالى» ۋەفا-نىڭ 2023/2024 جىلعى ماۋسىمىنىڭ قورىتىندىسى بويىنشا فۋتبولعا باۋلۋ جوباسىندا ۇزدىك دەپ تانىلدى.

قفف ۇيىمداستىرعان «بالالار ءۇيى تاربيەلەنۋشىلەرى اراسىنداعى فۋتبول فەستيۆالى» 2023 جىلى بىرنەشە ايعا سوزىلعان بولاتىن. جوبا بالالار ۇيلەرىنىڭ تاربيەلەنۋشىلەرى ءۇشىن ۇجىمدا جۇمىس ىستەۋ داعدىلارىن دامىتۋعا، فيزيكالىق جانە پسيحولوگيالىق دەنساۋلىقتارىن نىعايتۋعا جانە قولايلى الەۋمەتتىك ورتانى قۇرۋعا باعىتتالدى.

فەستيۆال قوستاناي، پاۆلودار، تاراز، الماتى، پەتروپاۆل، شىمكەنت، قىزىلوردا، بۋراباي، وسكەمەن جانە قاراعاندى قالالارىندا ۇيىمداستىرىلدى.

UEFA Grassroots Awards پرەمياسىنا ۇمىتكەرلەردى ەۋروپانىڭ ۇلتتىق فۋتبول قاۋىمداستىقتارى ۇسىنادى.  ال جەڭىمپازداردى ۇيىمنىڭ تومەنگى توبىنىڭ ۇسىنىستارى نەگىزىندە ۋەفا-نىڭ دامۋ جانە تەحنيكالىق كومەك كوميتەتى تاڭدايدى.

ۋەفا تەحنيكالىق ديرەكتورى فرەنك ليۋدولف قفف-نى ماراپاتىمەن قۇتتىقتادى.

قازاقستاننىڭ ۋەفا-عا مۇشەلىگىنە وتكەنى ءالى ەسىمدە. ول كەزدە مەن وسى ماسەلە بويىنشا جۇمىس توبىندا بولعان ەدىم. ال قازىر سىزدەر ەرەكشە فۋتبول جوباسىن ىسكە قوستىڭىزدار. بۇل فۋتبول ويىننان دا جوعارى ەكەنىن دالەلدەيدى. فۋتبول وتباسى نە جەكە جاعدايىنا قاراماستان كەز كەلگەن ادامدى بىرىكتىرەدى. قازاقستان فۋتبول فەدەراتسياسىن جەڭىسىمەن قۇتتىقتايمىن! جوبالارىڭىز بولاشاقتا فۋتبولدا دا، قوعامدا دا پايداسىن تيگىزەتىنىنە سەنىمدىمىن، – دەدى  ليۋدولف.

ەسكە سالا كەتسەك، UEFA Grassroots Awards ماراپاتى 2010 جىلدان بەرى فۋتبولدىڭ دامۋىنا قوسقان ۇلەسى مەن جەتىستىكتەرى ءۇشىن بەرىلىپ كەلەدى.