پاراليمپياداعا تاعى 16 جولداما الۋ جوسپاردا بار – ەلسيار قاناعاتوۆ

استانادا تۋريزم جانە سپورت مينيسترلىگىنىڭ جانىنانا قۇرىلعان  قىسقى جاسوسپىرىمدەر وليمپياداسى مەن جازعى وليمپيادا جانە پاراليمپيالىق ويىندارعا دايىندىق شتابىندا ۇلتتىق قۇراما كوماندالاردىڭ پاراليمپياداعا دايىندىعىنا قاتىستى مالىمەت بەرىلدى.

شتاب توراعاسى ەلسيار قاناعاتوۆ مينيسترلىك تاراپىنان پارليمپيادا ويىندارىنا دايىندىق بويىنشا اتقارىلىپ جاتقان جۇمىستار تۋرالى حاباردار ەتتى.

جيىنعا پارلامەنتى ءماجىلىسىنىڭ دەپۋتاتتارى ارداق نازاروۆ، نۇرلان اۋەسباەۆ، داۋلەت مۇقاەۆ، قازىبەك يسا، نارتاي سارسەنعاليەۆ، نۇرگۇل تاۋ، تاڭساۋلە سەرىكوۆ قاتىستى.

انىقتاما: بۇل شتاب بيىل پرەزيدەنت قاسىم-جومارت توقاەۆتىڭ تاپسىرماسىمەن وڭتۇستىك كورەيانىڭ كانۆون قالاسىندا وتكەن قىسقى جاسوسپىرىمدەر وليمپياداسى قارساڭىندا تۋريزم جانە سپورت مينيسترلىگى، ۇلتتىق وليمپيادا كوميتەتى جانە سپورت فەدەراتسيالارىنىڭ ۋاكىلەتتى ورگانى رەتىندە وليمپياداعا بىرىگىپ جۇمىس ىستەۋ ءۇشىن قۇرىلعان بولاتىن. ونىڭ نەگىزگى جۇمىسى – سپورتشىلاردىڭ الداعى جارىستارعا ساپالى دايىندىعىن قامتاماسىز ەتۋ.

شتاب بارلىق كەشەندى جارىستار اياقتالعانعا دەيىن تۇراقتى نەگىزدە جۇمىس ىستەيتىن بولادى.

وتىراستا شتابتىڭ جەتەكشىسى ەلسيار قاناعاتوۆ جينالعاندارعا سپورتشىلاردىڭ پاراليمپياداعا دايىندىعى، مەملەكەت تاراپىنان ويىندارعا كورسەتىلىپ جاتقان قولداۋ  جونىندە مالىمەت بەردى.

ونىڭ ايتۋىنشا، جازعى پاراليمپيالىق ويىندارعا وتانداستارىمىز سپورتتىڭ 7 تۇرىنەن 11 جولدامانى جەڭىپ الدى.

بۇل جارىس 28 تامىز بەن 8 قىركۇيەك ارالىعىندا سپورتتىڭ 22 تۇرىنەن وتەدى. قازاقستان اتىنان پاراليمپياداعا 38 سپورتشىنىڭ قاتىسۋى جوسپارلانۋدا. ولار سپورتتىڭ 9 تۇرىنەن ونەر كورسەتەدى. اتاپ ايتقاندا، پارا جەڭىل اتلەتيكا، پارا پاۋەرليفتينگ، پارا تاەكۆوندو، پارا ۇستەل تەننيسى، پارا ءجۇزۋ، پارا دزيۋدو، پارا كانوە، پارا وق اتۋ، ۆولەيبولدى وتىرىپ ويناۋ سىندى سپورت تۇرلەرىنەن جارىسقا شىعۋ جوسپاردا بار.

توكيودا وتكەن پاراليمپيالىق ويىنداردا قازاقستاننىڭ ۇلتتىق قۇراماسىندا 25 سپورتشى بولدى. ولار 1 التىن، 3 كۇمىس جانە 1 قولا جۇلدە الىپ، جالپى كوماندالىق 48 ورىندى يەلەندى.

قازىرگى كەزدە مەملەكەت تاراپىنان پاراليمپياداشىلارعا جان-جاقتى قولداۋ كورسەتىلىپ جاتىر، – دەدى شتاب باسشىسى.

سونىمەن بىرگە ول مامىر-ماۋسىم ارالىعىندا سپورتتىڭ 5 تۇرىنەن 16 ليتسەنزيا جەڭىپ الۋ جوسپارلانىپ وتىرعانىن ايتتى.

ونىڭ سوزىنەن بەلگىلى بولعانداي، بىلتىر ەرلەر اراسىندا ۆولەيبولدى وتىرىپ ويناۋدا سپورتشىلار 3-8 شىلدەدە استانا قالاسىندا وتكەن ازيا چەمپيوناتىندا جولدامانى جەڭىپ الدى.

قازاقستان كومانداسى فينالدا يران قۇراماسىنا جەڭىلدى. الايدا يران كومانداسىندا ليتسەنزيا بولعاندىقتان، ازيا چەمپيوناتىنىڭ كۇمىس جۇلدەگەرى رەتىندە ليتسەنزيا قازاقستان قۇراماسىنا بۇيىردى.

ازيا چەمپيوناتىنا 9 ازيا مەملەكەتىنەن  15 قۇراماسى، 7 ەرلەر جانە 8 ايەلدەر كومانداسى قاتىستى.

يادرونى يتەرۋ ديستسيپليناسىندا پارا جەڭىل اتلەتيكادان جولدامانى بىلتىر 3-17 شىلدەدە پاريج قالاسىندا وتكەن پارا جەڭىل اتلەتيكادان الەم چەمپيوناتىندا جەڭىپ الدىق. داستان مۇقاشبەكوۆ ءۇشىنشى ورىندى يەلەنىپ، قولا مەدالعا يە بولدى. بۇل ليتسەنزيا وسى سپورت تۇرىندە 1-4 ورىن العان سپورتشىلارعا بەرىلدى.

بۇل دوداعا 107 مەملەكەتتەن شامامەن 1200 سپورتشى قاتىستى.

سونىمەن بىرگە وتانداستامىمىز براسسپەن 100 مەتر ديستسيپليناسىندا پارا جۇزۋدەن ءۇش ليتسەنزياعا يە بولدى.

بۇل جولدامانى جۇماعالي نۇرداۋلەت  27 شىلدە – 8 تامىز ارالىعىندا ۇلىبريتانيانىڭ مانچەستەر قالاسىندا پارا جۇزۋدەن وتكەن الەم چەمپيوناتىندا يەلەندى. ول ەكىنشى ورىن الىپ، كۇمىس مەدالعا يە بولدى. جولداما وسى سپورت تۇرىندە 1-3 ورىن العان سپورتشىلارعا بەرىلدى. ال قالعان جولدامانى بيىل اقپان ايىنىڭ باسىندا حالىقارالىق فەدەراتسيا تابىس ەتتى.

200 مەترگە KL 200 ديستسيپليناسىندا پارا كانوەدەن جولدامانى بىلتىر 19-29 تامىزدا بايداركا مەن كانوە جانە پارا كانوەدەن گەرمانيانىڭ دۋيسبۋرگ قالاسىندا وتكەن الەم چەمپيوناتىندا بيبارىس سپاتاي الدى. ول بەسىنشى ورىن الىپ، جولدامانى يەلەندى.

پارا پاۋەرليفتينگتەن جولداماعا كەلسەك، قازىرگى ۋاقىتتا  داۆيد دەگتيارەۆ رەيتينگتىڭ ءبىرىنشى ورنىندا تۇر. وعان جولداما الۋ ءۇشىن ەكى الەم كۋبوگىنا قاتىسۋ كەرەك.

پارا تاەكۆوندودان ءۇش ليتسەنزيا  رەيتينگ قورىتىندىسى بويىنشا 57 كەلىگە دەيىنگى سالماقتاعى كاميلا دوسمالوۆاعا،  80 كەلىگە دەيىن سالماقتا كۇش سىناسىپ جۇرگەن نۇرلان دومباەۆ پەن 80 كەلىدەن اسا سالماقتاعى ءومىرالى نىشانعا بەرىلدى.

پارا وق اتۋدان جولداماعا ەركىن عابباسوۆ پنەۆماتيكالىق مىلتىقتان پاراليمپيادالىق اتۋ بويىنشا الەم كۋبوگىندا ەكىنشى ورىن الىپ، يە بولدى.

سونىمەن قاتار، مامىر-ماۋسىم ارالىعىندا سپورتتىڭ 5 ءتۇرى بويىنشا 16 ليتسەنزيا جەڭىپ الۋ جوسپارلانۋدا، — دەدى ەلسيار قاناعاتوۆ.

انىقتاما: پاراليمپيادا ويىندارى – 1960 جىلدان باستاپ ءار ءتورت جىل سايىن دەنە مۇمكىندىكتەرى شەكتەۋلى سپورتشىلار اراسىندا وتكىزىلەتىن سپورتتىق جارىس.

№	جارىستىڭ اتاۋى	وتەتىن ۋاقىتى	وتەتىن جەرى	ىقتيمال جولداما
1	2	3	4	7
1. پارا كانوە
1.	ليتسەنزيالىق الەم چەمپيوناتى	مامىر-ماۋسىم	سەگەد قالاسى (ماجارستان)	2 جولداما
2. پارا دزيۋدو
1.	گران-پري تبيليسي	مامىر	تبيليسي قالاسى (گرۋزيا)	8 جولداما
3. پارا پاۋەرليفتينگ
1.	الەم كۋبوگى	ماۋسىم	تبيليسي قالاسى (گرۋزيا)	3 جولداما
4. پارا جەڭىل اتلەتيكا
1.	ليتسەنزيالىق گران پري	ماۋسىم	پاريج قالاسى (فرانتسيا)	1 جولداما
5. پارا ۇستەل تەننيسى
1.	الەمدىك ىرىكتەۋ تۋرنير	مامىر	پاتتايا قالاسى (تايلاند)	2 جولداما