جاڭىل بالتاباەۆا پارا كانوەدەن پاراليمپياداعا جولداما الدى

پارا كانوەدان ماجارستاننىڭ سەگەد قالاسىندا وتكەن ليتسەنزيالىق الەم چەمپيوناتىندا جاڭىل بالتاباەۆا پاراليمپيادا ويىندارىنا جولدامانى جەڭىپ الدى.

چەمپيوناتتىڭ ۆ فينالىندا (VL3 كلاسسى) ونەر كورسەتكەن سپورتشى 200 مەتر قاشىقتىقتى 1:05.83 سەكۋندتا ءجۇرىپ ءوتىپ، مارەگە ەكىنشى بولىپ جەتتى. وسى باسەكەدە مارەگە پولشالىق مونيكا كۋكلا 1:05.45 سەكۋند ناتيجەسىمەن ءبىرىنشى، ال فرانتسيالىق ەلەا چارۆەت 1:07.33 ناتيجەسىمەن ءۇشىنشى بولىپ كەلدى.

الەم چەمپيوناتىندا پاراليمپياداعا ءتورت جولداما ويناتىلدى.

چەمپيوناتتىڭ فينالى ا جانە ۆ توپ اراسىندا بولدى. ا توبىنا الدىڭعى ليتسەنزيالىق تۋرنيرلەردە جەڭىسكە جەتكەن 6 سپورتشى جانە وسى چەمپيوناتتىڭ جارتىلاي فينالىندا ۇزدىك ونەر كورسەتكەن وزبەكستاندىق سپورتشى ىرىكتەلدى. ءبىزدىڭ سپورتشىمىز جاڭىل بالتاباەۆا ۆ توبىندا سىنعا ءتۇستى.

جاڭىل بالتاباەۆا مارەگە ءبىرىنشى بولىپ جەتكەن سپورتشىدان تەك 0،38 سەكۋندقا قالىپ قويدى. جارىستىڭ ەرەجەسىنە ساي ا توبىنىڭ 7 سپورتشىسى جانە ۆ توبىنىڭ 3 سپورتشىسى پاراليمپيادا ويىندارىنا جولداما الادى، — دەدى دەنە مۇمكىندىكتەرى شەكتەۋلى ادامدارعا ارنالعان سپورتتىق دايارلاۋ ورتالىعىنىڭ كوماندا باسشىسى ەرسۇلتان جولشيەۆ.

جانىل بالتاباەۆا وسىمەن پاراليمپيادا ويىندارىنا ەلىمىزدىڭ 12-ءشى ليتسەنزياسىن يەلەندى. بۇعان دەيىن ليتسەنزيانى پارا كانوەدان سپاتاي بيبارىس، پارا پاۋەرليفتينگتەن داۆيد دەگتيارەۆ، پارا جەڭىل اتلەتيكادان داستان مۇقاشبەكوۆ، ۆولەيبولدى وتىرىپ ويناۋدان ۇلتتىق قۇراما، پارا وق اتۋدان ەركىن عابباسوۆ، پارا جۇزۋدەن ءۇش جولداما، پارا تاەكۆوندودان نۇرلان دومباەۆ، كاميليا دوسمالوۆا مەن نىشان ءومىرالى العان بولاتىن.

پاراليمپيادا ويىندارى 28 تامىز بەن 8 قىركۇيەك ارالىعىندا بولادى.

قۇرالاي ءاشىمحانوۆا،

استانا