Joldama ala almaǵan balýandarǵa aıtarǵa sózim joq — Madııar Quramysov

Erkin kúresten Qazaqstan ulttyq qurama komandasynyń bas jattyqtyrýshysy Madııar Quramysov Túrkııanyń Ystanbul qalasyda ótken sońǵy irikteý týrnırin qorytyndylady, dep habarlady Olympic.kz

Bul týrnırde erkin kúrestiń balýandary úsh salmaqta (57, 65, 74 keli) synǵa túsip, úsheýinde de joldama ala almaǵan edi.

Bas jattyqtyrýshynyń aıtýynsha, negizi, jigitter jaqsy kúresti. Biraq sheshýshi sátte sheberlik jetpeı qaldy. Quramǵa keler bolsaq, jigitterdiń bárin ádiletti túrde tańdap alyndy.

Adlan Asqarov salystyrmaly túrde Bishkekte kúresken Maıs Alıevten myqtyraq boldy. Rahat Qaljan da eń sońyna deıin kúresti. Al Nurǵoja Qaıpanovtyń áleýeti osy. Budan jaqsy nátıje kórsete almaı júr. Qazir onyń 74 keli salmaǵy erkin kúrestegi eń bedeldi salmaq. Sondyqtan, alysqa barmady. Ystanbuldaǵy týrnırden soń balýandarǵa aıtarǵa sóz joq, — dedi Quramysov.

Túrkııadaǵy týrnırde Rahat Qaljan (57 kg) joldama úshin beldesýde jeńilse, Adlan Asqarov (65 kg) ekinshi aınalymda jarystan shyǵyp qaldy. Nurǵoja Qaıpanov (74 kg) bolsa, qola medal úshin kúreste qarsylasyna ese jiberdi.