ەلگە ەۆەرەستكە شىققان الپينيستەر ورالدى (ۆيدەو)

دۇنيەجۇزىنىڭ ەڭ بيىك شىڭى — ەۆەرەست شىڭىنا (8848 م) شىققان قازاقستاندىق الپينيستەر ماقسۇت جۇماەۆ، انار بۋراشەۆا پەن ءالمىر قىمباتباي ۇلى ەلگە ورالدى. قازاقپاراتتىڭ حابارلاۋىنشا، ولاردى الماتىنىڭ اۋەجايىندا قاۋمالاعان حالىق كۇتىپ الدى.

بۇل ەكسپەديتسيا ەلىمىزدىڭ مەملەكەتتىك تۋىن الەمنىڭ ەڭ بيىك شىڭىندا كوتەرۋ ماقساتىندا بولدى. وسى جەردە اتاپ وتەتىن ءبىر نارسە، ەۆەرەستكە (دجومالۋنگما، — تيبەتشە، ساگارماتحا، — نەپالشا) شىققان انار بۋراشەۆا قازاق ايەلدەرىنەن تۇڭعىش رەت الەمنىڭ ەڭ بيىك شىڭىنا كوتەرىلگەن الپينيست اتاندى. بۇل توپتا عالامشارداعى 14 سەگىز مىڭدىقتىڭ بارلىعىن باعىندىرعان اتى اڭىزعا اينالعان قازاق ءالپينيسى ماقسۇت جۇماەۆ انار بۋراشەۆاعا جەتەكشىلىك ەتتى.

قورعانىس مينيسترلىگىنىڭ ۇجىمى الپينيستەرگە كوماندانىڭ گيمالاي تاۋىندا بولىپ، اۋا رايىنىڭ قيىندىعىنا قاراماستان بيىك شىڭعا كوتەرىلۋ كەزىندە كورسەتكەن باتىلدىعى مەن باتىرلىعى ءۇشىن العىس ءبىلدىردى.

كەزدەسۋدە ماقسۇت جۇماەۆ انار بۋراشەۆاعا ەۆەرەستكە شىعۋعا كومەكتەسۋ بۇرىننان بەرگى ارمانى بولعانىن ايتىپ، سول ماقساتقا جەتۋگە كومەكتەسكەن ادامدارعا العىس سەزىمىن جەتكىزدى.

انار بۋراشەۆا بولسا، ەكسپەديتسيا كەزىندە ءوز وتباسىنىڭ باستى موتيۆاتورى بولعانىن ايتتى.

وتباسىمنىڭ سۋرەتتەرى كۇرتەشەمنىڭ جۇرەك تۇسىنداعى قالتادا بولدى. تاۋعا شىقپاس بۇرىن ءبىز «پۋدجا» ءراسىمىن جاسادىق. تاۋدان كوتەرىلۋگە رۇقسات سۇراپ، امان-ەسەن ورالۋىمىزدى تىلەدىك. انامنىڭ دۇعاسى مەنى امان ساقتاپ قالعانىن دا بىلەمىن. ءبىزدىڭ ەكسپەديتسيامىزعا قىزىعۋشىلىق تانىتىپ، قولداۋ كورسەتكەن بارلىق وتانداستارىمىزعا راحمەت!، — دەدى انار بۋراشەۆا.

ەسكە سالا كەتسەك، 12 مامىردا نەپال ۋاقىتىمەن تاڭعى ساعات 07:25-تە قۇرامىندا انار بۋراشەۆا مەن ماقسات جۇماەۆ بار Kazakh Everest Team كومانداسى الەمنىڭ ەڭ بيىك شىڭى – ەۆەرەست شىڭىنا (8 848 م) كوتەرىلگەن بولاتىن.

12 مامىردا داۋىل مەن بورانعا بايلانىستى كوپ ەكسپەديتسيا باعىتىنان كەرى قايتتى. تەك بەس ەلدىڭ الپينيستەرى عانا ەۆەرەستكە شىقتى. ولاردىڭ اراسىندا ءبىزدىڭ وتانداستارىمىز بار. تاريحتا الەمنىڭ ەڭ بيىك شىڭىنا شىققان تۇڭعىش قازاق قىزى انار بۋراشەۆا مەن الپينيست ماقسۇت جۇماەۆ ەۆەرەستكە شىعىپ، تاۋعا قازاقستان رەسپۋبليكاسىنىڭ مەملەكەتتىك تۋىن قاداپ، قول بۇلعادى، — دەپ حابارلاعان ەدى Kazakh Everest Team ءباسپاسوز قىزمەتى.

جالپى، Kazakh Everest Team كومانداسى شىڭعا كوتەرىلۋ ءۇشىن بەس تاۋلىككە ءجۇردى.

7 مامىردا بازالىق لاگەردەن (5 350 م) شىعۋدان باستالىپ، سودان كەيىن الپينيستەر I لاگەر (6 100 م) ارقىلى ءوتىپ، ودان كەيىن II لاگەرگە (6 400 م)، III لاگەرگە (7 100 م.) كوتەرىلدى. IV لاگەرگە (8 000 م) جەتكەن سوڭ ودان ءارى ەۆەرەستكە (8 848 م) شىقتى.