شىۇ-عا مۇشە ەلدەردىڭ وكىلدەرى وليمپيادالىق دايارلاۋ ورتالىعىمەن تانىستى (ۆيدەو)

شانحاي ىنتىماقتاستىق ۇيىمىنا مۇشە مەملەكەتتەردىڭ دەنە شىنىقتىرۋ جانە سپورت سالاسىنا جاۋاپتى باسشىلارى الماتى وبلىسىنداعى وليمپيادالىق دايارلاۋ ورتالىعىنىڭ جۇمىسىمەن تانىستى، دەپ حابارلادى تۋريزم جانە سپورت مينيسترلىگى.

كەزدەسۋدە تۋريزم جانە سپورت ءمينيسترى ەرمەك مارجىقپاەۆ شىۇ باس حاتشىسى چجان مين، رەسەي فەدەراتسياسى، يران يسلام رەسپۋبليكاسى، بەلارۋس، وزبەكستان، تاجىكستان مەن ءۇندىستاننىڭتۋريزم جانە سپورت مينيسترلەرى مەن وكىلدەرىنە ورتالىقتىڭ جۇمىسى مەن قىزمەتى تۋرالى ايتىپ بەردى.

وليمپيادالىق دايارلاۋ ورتالىعى تمد-داعى ەڭ ءىرى سپورت كەشەندەرىنىڭ ءبىرى سانالادى. ونىڭ ينفراقۇرىلىمى حالىقارالىق ستاندارتتارعا ساي سالىنعان. سپورت نىسانىندا ءبىر ۋاقىتتا 2300 سپورتشى شىنىعا الادى. مۇندا سپورتتىڭ 23 ءتۇرى بويىنشا وليمپيادالىق رەزەرۆ پەن ۇلتتىق قۇراما كوماندالارى دايارلانادى.

سونداي-اق ءىس-شارادا تۋريزم جانە سپورت ءمينيسترى، شىۇ-عا مۇشە مەملەكەتتەردىڭ دەنە شىنىقتىرۋ جانە سپورت سالاسىنا جاۋاپتى باسشىلارى وليمپيادالىق دايارلاۋ ورتالىعىنىڭ اۋماعىندا «تازا قازاقستان» اكتسياسى اياسىندا اعاش وتىرعىزۋ راسىمىنە قاتىستى.

ۆانكۋۆەر وليمپياداسىنىڭ كۇمىس جۇلدەگەرى ەلەنا حرۋستالەۆا، الەم چەمپيوناتىنىڭ قولا جۇلدەگەرى جانە ازيا چەمپيونى ميلاد كاريمي، 2016 جىلعى وليمپيادا چەمپيونى دميتري بالاندين، 2000 جىلعى وليمپيالىق ويىنداردنىڭ چەمپيوندارى ەرماحان يبرايموۆ پەن ولگا شيشيگينا، سونداي-اق كۇمىس جۇلدەگەرى يسلام بايرامۋكوۆ، 2021 جىلعى وليمپيادانىڭ  قولا جۇلدەگەرلەرى سوفيا بەرۋلتسەۆا مەن ەلدوس سمەتوۆ قوناقتارعا سپورت الاڭدارىن تانىستىرىپ، ەرەكشەلىكتەرىن جەتكىزدى.