ماگومەد اديەۆ ۇلتتىق قۇرامانىڭ باس جاتتىقتىرۋشى قىزمەتىنەن كەتتى

قازاقستان فۋتبول فەدەراتسياسىنىڭ پرەزيدەنتى ادىلەت بارمەنقۇلوۆ ۇلتتىق قۇرامانىڭ جاتتىقتىرۋشىلار شتابىمەن كەزدەستى، دەپ حابارلادى فەدەراتسيانىڭ ءباسپاسوز قىزمەتى.

وسى جەردە ماگومەد اديەۆ قۇرامانىڭ باس جاتتىقتىرۋشىسى قىزمەتىنەن كەتەتىنىن، مۇنداي شەشىمدى وتباسىلىق جاعدايىنا بايلانىستى قابىلداعانىن ايتتى.

قفف اديەۆتىڭ شەشىمىمەن كەلىستى.  ەندى فەدەراتسيا كەلەسى اپتانىڭ باسىندا جاڭا باس جاتتىقتىرۋشىنى تاڭدايدى.

قازاقستان ۇلتتىق قۇراماسىنىڭ ۇلتتار ليگاسىنداعى جەتىستىگىمىزدەن كەيىن ماگومەد اديەۆ كوماندانىڭ باس باپكەرى رەتىندە كەلىسىمشارتىن 2024 جىلدىڭ جەلتوقسان ايىنا دەيىن ۇزارتقان ەدى.

اديەۆ كەلگەلى ۇلتتىق قۇراما 21 ماتچ وتكىزىپ، 11 ويىندا جەڭىسكە جەتتى. 9 ماتچتا جەڭىلىپ، ءبىر ويىندا قارسىلاسىمەن تەڭ ەسەپپەن تارقاستى.

ۇلتتار ليگاسى (6 ماتچ)، جولداستىق كەزدەسۋ (4 ماتچ)، ەۋرو ىرىكتەۋى (10 ماتچ).

اديەۆتىڭ كومانداسى 21 ماتچتا قارسىلاس قاقپاسىنا 28 گول سالعان – ءوز قاقپاسىنا 29 گول جىبەرگەن.