SportPress.kz قازاقستان سپورت جاڭالىقتارى
امانگەلدى سەيىتحانوۆ — قازاق سپورت جۋرناليستيكاسىندا ايقىن قولتاڭباسىن قالدىرعان ازامات. 52 جاس قانا ءومىر كەشتى.
قازاققا ءالى بەرەرى كوپ ەدى. كەيبىر جۋرناليستەر سەكىلدى بيلىكتى ماقتاپ كرەسلودا شالقايىپ، توردە وتىرمادى. ءمينيستردىڭ كەڭەسشىسى دە بولمادى. بىراق حالىق ونى سىيلادى. سپورت جۋرناليستيكاسىنا ايانباي ەڭبەك ەتتى. بيلىگى بارلار ونىڭ باعىن قىزعانىپ، تاسادا ۇستاۋعا تىرىستى. ماقساتىنا جەتە الماعان امان اعامىز ارماندا كەتتى.
امانگەلدى سەيىتحانوۆتى 2000 جىلعى سيدنەي وليمپياداسىنان كەيىن تەلەارنادان كورمەي كەتتىك. مۇمكىن، تاعى دا وليمپيادالارعا بارعاندا ءبىراز دۇنيە جازار ەدى. ودان كەيىن بەس وليمپيادا بولدى. افينا-2004، پەكين-2008، لوندون-2012، ريو-2016، توكيو-2020 جىلدارى وتكەن وليمپيادالارعا بارا المادى. جوعارىداعى بيلىك وكىلدەرى ا.سەيىتحانوۆتى جارىستارعا حابار تاراتۋعا جىبەرۋ كەرەك ەدى. بىراق جولىن كەستى.
مەن ءوزىم سول امان اعامىزدىڭ ءىزباسارىنداي كورەتىن اسلان كاجەنوۆ ارىپتەسىمدى فرانتسيادا وتەتىن پاريج وليمپياداسىنا جىبەرۋ ءۇشىن تۋريزم جانە سپورت مينيسترلىگىنە ۇسىنىس ايتقىم كەلەدى.
ۇلتتىق وليمپيادا كوميتەتىنىڭ پرەزيدەنتى گەننادي گولوۆكين يتاليادا بولعان ليتسەنزيالىق جارىستاردا باۋىرى ماكسيم گولوۆكيندى قاسىنا ەرتىپ ءجۇردى. سوندا ماكسيمگە اقشانى كىم تولەيدى؟
سپورت ءجۋرناليسى، ساۋاتتى ساراپشى اسلان كاجەنوۆ وليمپيادا ورتاسىندا ءجۇرىپ اقپارات تاراتسا، حالىققا دا ءوتىمدى بولار ەدى. ءوزى دە كاسىبي تۇرعىدا جەتىلە تۇسەر ەدى. ەل ازاماتتارى وسى ءۋاجىمىزدى ەسكەرسە دەيمىز.
ايبەك مۇحانوۆ،
اقتاۋ
