Olımpıadaǵa jeti-segiz joldama alatyn múmkindik bar – Dmıtrıı Karpov

Qazir jeńil atletıkadan Qazaqstan komandasy Olımpııalyq oıyndarǵa eki joldama bar. Bul lıenzııany marafonnan Janna Mamajanova men 3 000 metrge kedergiler arqyly júgirýden irikteý normatıvin oryndaǵan Nora Djerýto aldy. Bas jattyqtyrýshy Dmıtrıı Karpovtyń aıtýynsha, quramanyń áli Olımpıadaǵa jeti-segiz joldama alatyn múmkindigi bar, dep habarlady Olympic.kz. 

30 sáýirde marafonnan irikteý kezeńi aıaqtalyp, Janna Mamajanova Qazaqstan rekordyn jańartty. Osydan keıin ol Olımpıada joldamasyna ıe boldy. Basqa sportshylar úshin joldamaǵa talas 30 maýsymda aıaqtalady. Qazir jeńil atletter babyna kelip, reıtıngilik upaılarǵa talasýǵa daıyndalyp jatyr.

Bas jattyqtyrýshy sportshylardyń Olımpadaǵa áli kem degende segiz lıenzııany jeńip alatyn áleýeti bar ekenin eskertti.

Jeńil atletıkadan jazǵy jarys maýsymy endi ǵana bastaldy. Ulttyq quramanyń sportshylary birneshe týrnırge qatysyp úlgerdi. Qazir bári de jospar boıynsha jasalyp jatyr.

Olımpıadaǵa irikteýge keler bolsaq, biz Olımpıadaǵa qatysa alatyn jeti-segiz sportshynyń aıaq alysyn baqylap otyrmyz.

Týrnırdiń kóbisi maýsym aıynda bolady. Osy ýaqytta komandanyń jarys kestesi de óte tyǵyz  bolady.

2 maýsymda Olga Safronova «Gaýhar lıgasyna» qatysady. Dısk jáne ıadro laqtyratyn sportshylarymyz Mokpodaǵy Azııa chempıonatynda kúsh synap kóredi.

Bul jarys 12-14 maýsymda bolady. 22 maýsymda Dýblınde ótetin sporttyq júristen halyqaralyq týrnırge aralas komandalyq estafeta ókilderin aparýdy josparlap otyrmyz. Kedergiler arqyly júgiretin Davıd Efremov Eýropadaǵy jarystarǵa, Nadejda Dýbovıkaıa ulttyq chempıonattarǵa qatysady, — dedi ol.

Onyń aıtýynsha, Olımpıadaǵa irikteý júıesi eki kezeńnen turady. Birinshisi – arnaıy normatıvti oryndaý arqyly, ekinshisi – álemdik reıtıng arqyly joldama alý.

Osy rette ol mejeli normatıvti  oryndaýdyń jyl saıyn qıyndap jatqanyn jasyrmady.

Olımpıadaǵa irikteý burynǵydaı tek qana nátıjege ǵana qaramaıdy. Osymen ekinshi jazǵy oıyndarǵa nátıje men normatıvten basqa, reıtıng arqyly da sportshylar tańdalady.

Jarystyń deńgeıine qaraı upaı da sonshalyqty beriledi. Sondyqtan sportshylar halyqaralyq týrnılerge jıi shyǵady. Týrnır tańdaǵan kezde komandadaǵy árbir atlettiń jeke áleýetine nazar aýdaramyz. Sheshim qabyldaýǵa jeke menedjerler, jeke jattyqtyrýshylar men bas jattyqtyrýshy kirisedi, — dedi Karpov.

Qazir bas jattyqtyrýshy elimizde Nadejda Dýbovıkaıa men Ivan Ivanovty jeńil atletıkanyń kóshbasshylary retinde sanaıtynyn aıtty. Sonymen birge ol Parıj Olımpıadasynda 2022 jylǵy álem chempıony Nora Djerýtonyń da laıyqty nátıje kórseteninine senimdi.

Osy kúnderi jeńil atletıkadan Qazaqstan komandasy Almaty oblysyndaǵy jańa bazada jattyǵyp jatyr. Osy bazada Olımpıada qarsańyndaǵy mańyzdy jıyn bolady.