SportPress.kz قازاقستان سپورت جاڭالىقتارى
قازاقستان جاستارىنىڭ فۋتبول كوماندالارى حورۆاتيانىڭ زادار قالاسىندا ءوتىپ جاتقان Dalmatinko Cup حالىقارالىق تۋرنيرىنە قاتىسىپ جاتىر.
جارىستا الەمنىڭ 22 ەلىنەن 220 كوماندا باق سىنايدى. بيىلعى دوداعا ەلىمىزدىڭ «وڭتۇستىك» پەن «ورداباسى» كوماندالارى وينايدى.
قازاقستاننىڭ حورۆاتياداعى ەلشىلىگىنىڭ قولداۋىمەن 2019 جىلدان باستاپ ەلدىڭ جاستار فۋتبول كوماندالارى وسى تۋرنيرگە قاتىسىپ، دوپتى يگەرۋ شەبەرلىگىن ارتتىرىپ، جاتتىقتىرۋشىلار حالىقارالىق ماماندارمەن ءوز بىلىمدەرى مەن تاجىريبەلەرىمەن الماسادى.
ءتۋرنيردى ۇيىمداستىرۋشىلاردىڭ ءبىرى — حورۆاتيا قۇراماسىندا ويناعان قازاقستان ەلشىلىگىنىڭ شتاتتان تىس كەڭەسشىسى يۆيتسا پيريچ. ول الەمدىك فۋتبولدىڭ اڭىزىنا اينالعان ويىنشىسى لۋكا مودريچكە بەينە قوڭىراۋ شالىپ، «العا شىمكەنت» دەگەن سوزدەرمەن بالالارعا ساتتىلىك تىلەدى.
ءتۋرنيردىڭ اشىلۋىنا قازاقستان ەلشىسى اقىلبەك كامالدينوۆ قاتىسىپ، بالالارعا جەڭىس تىلەپ، ۇيىمداستىرۋشىلارعا بالالار مەن جاسوسپىرىمدەر فۋتبولىن دامىتۋ جانە جاس فۋتبولشىلاردىڭ حورۆاتياعا ساپارىن ۇيىمداستىرۋعا كوڭىل بولگەنى ءۇشىن شىن جۇرەكتەن ريزاشىلىعىن ءبىلدىردى. وسىنداي تۋرنيرلەرگە قاتىسۋ جاس فۋتبولشىلارعا تاجىريبە جيناۋعا، وتاندىق فۋتبولدىڭ دەڭگەيى مەن ساپاسىن ارتتىرۋعا مۇمكىندىك بەرەتىنى ءسوزسىز.
تۋرنيرگە قاتىسۋمەن قاتار، قازاقستاننان كەلگەن جاس فۋتبولشىلارعا حورۆاتياداعى دالماتسيا جاعالاۋىندا قىزىقتى ەكسكۋرسيالىق باعدارلاما ۇيىمداستىرىلدى.
انىقتاما: «Dalmatinko Cup» ءتۋرنيرى — 2016 جالدان بەرى جىل سايىنعى بالالار ءتۋرنيرى.
2019 جىلدان باستاپ وسىنداي كولەمدەگى حالىقارالىق جارىسقا العاش رەت «كاسپي» جاسوسپىرىمدەر كومانداسى جىبەرىلدى. قازىر Dalmatinko Cup تۋرنيرىنە قاتىسىپ جاتقان كوماندالاردىڭ سانى كوبەيىپ كەلەدى.
بىلتىر ەلىمىزدەن تۋرنيرگە «تۇران-2013»، «اقتوبە-2013»، «استانا-2012»، «اقجايىق-2012» پەن «وقجەتپەس-2012» سياقتى بەس كوماندا قاتىسىپ، وتانداستارىمىز العاش رەت كۇمىس مەدال جەڭىپ الدى.
2022 جىلى قازاقستان فۋتبول فەدەراتسياسىنىڭ پرەزيدەنتى ادىلەت بارمەنقۇلوۆ Dalmatinko Cup ءتۋرنيرىن تاماشالاعان بولاتىن.
ءىلياس وماروۆ،
استانا
View this post on Instagram
