ستانيسلاۆ چەرچەسوۆ ۇلتتىق قۇرامانىڭ باس جاتتىقتىرۋشىسى بولىپ تاعايىندالدى

فۋتبولدان قازاقستان ۇلتتىق قۇراماسىنىڭ باس جاتتىقتىرۋشىسى قىزمەتىنە رەسەيلىك مامان ستانيسلاۆ چەرچەسوۆ تاعايىندالدى، دەپ حابارلادى قازاقستان فۋتبول فەدەراتسياسى.

چەرچەسوۆ فۋتبولشى كەزىندە «سپارتاك» (وردجونيكيدزە)، «سپارتاك» (ماسكەۋ)، «لوكوموتيۆ» (ماسكەۋ)، «دينامو» (درەزدەن، گفر)،  «تيرول» (ينسبۋرك، اۋستريا)  كلۋبتارىندا ويناعان.

جاتتىقتىرۋشى رەتىندە رەسەيدىڭ «سپارتاك» (ماسكەۋ)، «جەمچۋجينا» (سوچي)، «تەرەك» (گروزنىي)، «امكار» (پەرم)، «دينامو» (ماسكەۋ)، «لەگيا» (ۆارشاۆا، پولشا)، «فەرەنتسۆاروش» (بۋداپەشت، ماجارستان) كوماندالاردا جۇمىس ىستەگەن.

ول 2007 جىلى ماسكەۋدىڭ «سپارتاك» كلۋبىن جاتتىقتىرعان كەزدە رەسەي چەمپيوناتىنىڭ كۇمىس جۇلدەگەرى، «لەگيا» كومانداسىندا جۇمىس ىستەگەندە پولشانىڭ چەمپيونى (2015/16) مەن وسى ەلدىڭ كۋبوگىنىڭ يەگەرى (2015/16) بولدى.

2018 جىلعى الەم چەمپيوناتىندا رەسەي قۇراما كومانداسىمەن شيرەك فينالعا جەتتى.

ستانيسلاۆ چەرچەسوۆ «فەرەنتسۆاروش» كلۋبىنىڭ باس جاتتىقتىرۋشىسى بولىپ ەكى جىل قاتارىنان ماجارستاننىڭ چەمپيونى (2021/22، 2022/23) اتاندى. ماجارستان كۋبوگىن (2021/22) جەڭىپ الدى.