ورتالىق ازياداعى ەڭ قىمبات فۋتبولشى اتالدى (ۆيدەو)

فۋتبولدان وزبەكستان ۇلتتىق قۇراماسىنىڭ مۇشەسى، ماسكەۋ قالاسىنىڭ تسسكا كلۋبىنىڭ (اسكەريلەردىڭ ورتالىق سپورت كلۋبى) جارتىلاي قورعاۋشىسى اببوسبەك فايزۋللاەۆ ورتالىق ازياداعى ەڭ قىمبات فۋتبولشى اتاندى.

Transfermarkt پورتالىندا جاريالانعان مالىمەتكە قاراعاندا، رەسەي پرەمەر-ليگاسىندا ونەر كورسەتەتىن تەڭبىل دوپ شەبەرىنىڭ باعاسى 6 ملن ەۋروعا جەتكەن.

وسىلايشا، اببوسبەك فايزۋللاەۆ العاش رەت ورتالىق ازيانىڭ ەڭ قىمبات ويىنشىسى اتانىپ وتىر. ال يتاليانىڭ «ا» سەرياسىندا  وينايتىن ەلدور شامۋرودوۆتىڭ باعاسى Transfermarkt پورتالىندا بەس ملن ەۋروعا باعالانعان.

بىلتىر تسسكا اببوسبەك فايزۋللاەۆتى تاشكەنتتىڭ «پاحتاكور» كلۋبىنان نەبارى 500 مىڭ ەۋروعا ساتىپ العان بولاتىن. ول ءبىر جىلدا ماسكەۋ كلۋبىنىڭ قۇرامىندا رەسەي چەمپيوناتى مەن كۋبوگى ويىندارىندا بەس گول سالىپ، 14 ناتيجەلى پاس بەردى.  ەندى ونىڭ باعاسى 10 ەسە ءوسىپ وتىر.

داستان كەنجالين،

استانا