پارا ۆەلوسپورتشىلار ازيا چەمپيوناتىندا بەس مەدال جەڭىپ الدى

پارا ۆەلوسپورتتان الماتىدا وتكەن XI ازيا چەمپيوناتىندا قازاقستان قۇراماسى ەكى التىن، ەكى كۇمىس جانە ءبىر قولا مەدالدى جەڭىپ الدى.

كورۋ قابىلەتى زاقىمدانعان سپورتشىلار اراسىندا وتكەن تاندەمدىك ديستسيپليناسىندا سەيىتجان كەنجەگۇل (ستوكەر) مەن انتون لاۆرەنتەۆ (پيلوت) مارەگە 20:27.9 ۋاقىتتا جەتىپ، چەمپيون اتاندى.

ەكىنشى ورىندى يەلەنگەن الەكساندر مالىگين (ستوكەر) مەن دەۆيد كۋساكوۆ (پيلوت) مارەگە 21:13.5 مينۋتتا كەسە، قولا مەدال ءتالىم داستان (ستوكەر) مەن ماكسات نۇرپەيسوۆكە (پيلوت) بۇيىردى. ولار جارىستى 22:37.7 ۋاقىتتا اياقتادى.

ايەلدەر اراسىندا چەمپيوناتتىڭ تاندەمدىك ديستسيپليناسىندا جۇلدىز قايناروۆا (ستوكەر) مەن ۋليانا چۋگاي (پيلوت) 22:03.4 ۋاقىتقا مارەگە كەلىپ،  التىن جۇلدەنى جەڭىپ الدى. كۇمىس مەدالدى اسەل كاليەۆا (ستوكەر) مەن ايگەرىم نۇرعالي (پيلوت) يەلەندى. ولار 28:08.8 ۋاقىتتا مارەگە جەتتى.

مەن ۆەلوسپورتپەن 15 جىلدان استام ۋاقىت اينالىسىپ كەلەمىن. الايدا، تاندەمدىك ديستسيپلينا جەكە جارىستان قيىنىراق. سەبەبى، سەرىكتەس ءۇشىن جاۋاپكەرشىلىكتىڭ جۇگى اۋىر. تەحنيكالىق قيىندىقتارعا قاراماستان، ءبىز، ارينە، جەڭىسكە جەتۋدى كوزدەدىك. ەڭ باستىسى، وسى جارىستا ازيانىڭ چەمپيونى اتاندىق، – دەدى انتون لاۆرەنتەۆ.

قازاقستاننىڭ پارا ۆەلوسپورتتان ۇلتتىق قۇرامانىڭ باس جاتتىقتىرۋشىسى نيكولاي زايتسەۆتىڭ ايتۋىنشا، چەمپيونات الدىندا سپورتشىلار ءۇش وقۋ-جاتتىعۋ جيىنىندا بولدى. ونىڭ ەكەۋى الماتى قالاسىندا جانە بىرەۋى تەكەلى اۋدانىندا وتكىزىلدى.

سپورتشىلار تراسسانى مۇقيات زەرتتەپ، شەبەرلىكتىڭ ارتتىرۋعا تالاي جۇمىس اتقاردى. وسىنىڭ ارقاسىندا ەلىمىزدىڭ سپورتشىلارى بەس مەدال جەڭىپ الدى، – دەدى  ول.

پارا ۆەلوسپورتتان ازيا چەمپيوناتى «الماتى ارەنا» الاڭىندا بولدى. وعان ساۋد ارابياسى، تاجىكستان، ءباا، وزبەكستان، تايلاند، ومان، پالەستينا، ءۇندىستان مەن ەلىمىزدىڭ  كورۋ قابىلەتى  جانە تىرەك-قيمىل اپپاراتى زاقىمدالعان پارا ۆەلوسپورتشىلارى قاتىستى.

دودادا بارلىعى 69 سپورتشى كۇش سىناستى (56 ەر جانە 13 ايەل).

قۇرالاي ءاشىمحانوۆا،

استانا